Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den iiij. Psalm.

1. Een ghebet teghen het cruyce, dat den Gheloouighen der bekentenisse haluen, aengheleyt wert, 3. met eener troostelicker leere, tegen des cruyces erghernisse, namelicken, dat God seer wonderbaerlicken omgaet, ende hen aent allerhoochste beschermt, wanneer sy aent meeste verlaten schijnen.

1

Eenen Psalm Dauids voor te singhen op snarenspelen.

A.2

VErhoort my, wanneer ick roepe, God myner gerechticheyt, ^a die du my troostest in angste: weest my ghenadich, ende hoort mijn ghebet.

a Psalm. 91.b.10.

3

^b Lieue heeren, hoe langhe sal mijn ^c eere gheschendt worden? hoe hebt ghy het ijdele so lief, ende de leughenen so gheerne? Sela.

b dat is, ghy groote Hansen, ende wat groot gheachtet wil zijn.

c Dat is, mynen Psalm ofte leere, daer ic God mede eere.

4

Bekennet doch dat de Heere syne Heylighen wonderlick leydet: de Heere hoort, wanneer ick hem aenroepe.

5

^d Toornet ghy, so sondighet niet: spreect met uwer herten op uwen legher, ende ^e verbeydet. Sela.

d Oft, Beweecht v wat tot onluste An. Uerschrickt ende sond. etc. Ephes. 4.c.26.

e Dat is, weest stille.

6

Offert rechtueerdicheydt, ende hoept op den Heere.

7

Vele segghen: Hoe soude ons dese wysen, wat goedt is? doch Heere verheft ouer ons het ^f licht dijns aensichts.

f Is een vriendelick ende ghenadich aensien.

8

Du verheugest mijn herte, ^g† hoewel ghene gelijcke vele wijn ende koren hebben.

g† And. Uan der tijt aen, als genen vele koorns ende mosts geworden is.

9

^h Ick ligghe ende slape gantsch met vreden: want alleene du Heere helpest my, dat ick seker woone.

h Psalm. 3.a.6. Leuiti. 26.a.4. Iob. 11.b.19. Prouer. 3.c.24.