Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxvij. Capittel.

1. Uan desen Cap. aen tot int xxxij. vechtet Hiob teghen syne vrienden, ende beweeret, dat God niet en straffet na onsen verdiensten: so hy (teghen andere gherekent) vroom zy, ende ghelijckewel ghestraffet werde.

A.1

ENde Hiob sprack voorder, ende hief aen syne spreucken, ende seyde:

2

So waer als God leeft, die my mijn recht niet en laet, ende de Almachtige, die mijn ziele bedroeuet.

3

So langhe als mynen adem in my is, ende het snuyuen van God in myner neusen is.

4

Sullen myne lippen niet onrechts spreken, ende mijn tonge en sal gheen bedriegerie seggen.

5

Dat zy verre van my, dat ick v recht gheue: tot dat mijn eynde koemt, en wil ick niet wijcken van myner vromicheyt.

6

Van myner gherechticheyt die ick hebbe, en wil ick niet aflaten: mijn consciencie en bijtt my niet, mijns gantschen leuens haluen.

7

^a Doch mynen vyandt sal een Godlooser beuonden worden, ende die hem teghen my verheft, een onrechtueerdigher.

a Hiob. 42.a.7.

8

Want wat is de hope des ^† huychelaers, dat hy so ghierich is, ende God doch zijn ziele wech scheurt?

† Eenen huychelaer heet hy in desen boeck allomme eenen valschen mensche, als sy al te mael zijn voor God sonder het ghelooue.

9

Meynstu dat ^b God zijn schreyen hooren sal, wanneer den angst ouer hem koemt?

b Prouer. 1.c.28.

B.10

Hoe kan hy aen den Almachtighen lust hebben, ende God eenmael aenroepen?

11

Ick wil v leeren van der hant Gods, ende wat by den Almachtighen gheldt, en wil ick v niet verhelen.

12

Siet, ghy houdet v al te mael kloec: waerom gheuet ghy dan sulcke onnutte dinghen voor?

13

Dat is het loon eens Godloosen menschen by God, ende het erue der tyrannen, dat sy van den Almachtighen nemen sullen.

[fol. 174v]

14

Sal hy vele kinderen hebben, ⁺ so sullen sy des sweerts zijn: ende syne nakomelinghen, en sullen des broots niet sat worden.

+ Het loon der godloosen mensen. Hiob 20.c.29.

15

Syne ouerbleuene sullen in den doot begrauen worden, ende syne weduwen en sullen niet ^c weenen.

c Dat is: Sy sullen vrolic zijn, dat hy slechts doot is.

16

Wanneer hy ghelt te samen brengt als Aerde, ende vegadert kleederen als leem:

17

So sal hyse wel bereyden, doch de rechtueerdighe salse aentrecken, ende de onschuldighe sal dat ghelt wtdeylen.

18

Hy bouwet zijn huys gelijck als een spinne, ende gelijck als een hoeder een schuylhutte maect.

19

^d De rijcke wanneer hy hem leyt, en sal hy het niet mede rapen: hy sal syne oogen opdoen, ende daer en sal niets zijn.

d Psalm. 39.a.7. ende 48.b.18. ende 92.a.8. Hiob 1.c.21. Luce 12.c.20. Eccles. 5.b.14. 1.Timoth. 6.a.7. Syrach 11.b.10.

C.20

Verschrickinghe sal hem aenuallen, ghelijck als water, des nachts sal hen het onweder wech nemen.

21

Den Oosten windt sal hem wech voeren, dat hy daer henen vaert, ende onstuymicheyt sal hem van syner plaetse drijuen.

22

Hy sal sulcx ouer hem voeren, ende en sal syner niet verschoonen: alle dinck sal hem wt synen handen ontulieden.

23

Men sal ouer hem met den handen kloppen, ende ouer hem tisschen. daer hy gheweest is.