Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxiij. Capittel.

1. Hiob dringt noch daer op: Somen menschelicker wijse soude richten, so zy hy vroom: ende, oft hy schoon de vroomste ende onschuldichste ware, noch gelijcke wel so straft hem God.

A.1

HIob antwoordde, ⁺ ende sprack:

+ Hiob antwoordt.

2

Mijn reden blijft noch bedroeft, mijne macht is swack ouer mijn suchten.

3

Och dat ick wiste, hoe ick hem vinden, ende tot synen stoel komen mochte.

4

Ende het rechte voor hem soude voorleggen, ende den mont vol straffinghe vaten.

5

Ende vernemen de reden, die hy my antwoorden, ende verstaen, wat hy my segghen soude.

6

Wil hy met grooter macht met my rechten? hy en stelle hem so niet teghen my.

7

Maer legghe het my gelijck voor, so wil ick mijn recht wel ghewinnen.

8

Doch gae ick nu stracks voor my wech, so en is hy daer niet: ga ick te rugghe, so en speure ick hem niet.

9

Is hy ter slincker ^a† hant, so en grijpe ick hem niet:verbercht hy hem ter rechter hant, so en sie ick hem niet.

a† An. hant, daer hy zijn werck wtrichtet, so etc.

B.10

Doch hy kent mynen wech wel: ^b hy versoecke my, so wil ick beuonden werden, gelijck als het gout.

b 1.Petri 1.a.7. Sapient. 3.a.6.

11

Want ick sette mynen voet op syne bane, ende houde synen wech, ende en wijcke daer niet af.

12

Ende en trede niet van den gheboden syner lippen, ende beware de reden zijns monts, ^c† meer dan ick schuldich ben.

c† And. meer dan mijns lijfs nootdruft. and. dat sy my een gebruyck zijn.

13

Hy is ^d eenich, wie wil hem ^e† antwoorden? ende hy maket so hy wil.

d Also oock Gal. 3. God is eenich: daer en is gheen middelaer eens eenighen.

e† an. afwenden?

14

Ende wanneer hy my alreede betaelt, wat ick verdient hebbe, so is dies noch meer daer achter.

15

Daerom verschricke ick voor hem, ende wanneer ick het mercke, so vreese ick my voor hem.

16

God heeft mijn herte bloode ghemaect, ende de Almachtighe heeft my verschrickt.

17

Want de duysternisse en maeckt dies gheen eynde met my, ende de donckerheydt, en wil voor my niet bedeckt worden,