Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxij. Capittel.

1. Eliphas besluyt met syner rede, dewijle Hiob ghestraft wert, so zy hy onvroom, 5. vertelt, doch met onwaerheyt, wat misdaden hy ghedaen heeft, 13. ende hoe hy Gods voorsichticheyt versaket, 21. ende vermaent hem ter boete.

A.1

DOe antwoordde Eliphas van Thema, ⁺ ende sprack:

+ Eliphas spreeckt.

2

Wat behoeft God eens stercken? ende wat is hem nut eenen kloecken?

3

Meynstu dat den Almachtigen wel beualt, dat du dy vroom makest? Oft wat helpet het hem, wanneer du dyne weghen alreede sonder vlecke makest?

4

Meynstu hy sal hem voor dy vreesen, dy te straffen, ende met dy voort ghericht te treden?

5

^a Ia dyne boosheydt is te groot, ende dyner misdaet en is gheen eynde.

a Ierem. 2.b.19. Osee 13.a.9.

6

Du hebst dynen broeder erghens eenen pant ghenomen, sonder oorsake: du hebst den naeckten de kleederen wtghetoghen.

7

^b Du en hebst de vermoeyde niet gedrencket met water, ende hebst den hongherigen dijn broot ontseyt.

b Iob. 27. 29. 30. 31

8

^c† Du hebst gewelt in den lande gheoeffent, ende ^d moetwillich daer in gheseten.

c† an. Die gewelt oeffende, [satt] inden lande, ende die hooch aenghesien wert, woonde daer in.

d Of met onbillicken moetwillle

9

De weduwen hebstu ledich laten gaen, ende de armen der weesen ghebroken.

B.10

Daerom bistu met stricken omuanghen, ende vreese heeft dy onuersiens verschrickt.

11

Soudestu dan niet de ^* duysternisse sien, ende den wateruloet dy niet bedecken?

* Duysternisse heet, droeffenisse ende ongheluck: wederom, Licht, heet, gheluck ende heyl.

12

^e Siet, God is hooch daer bouen in den Hemel, ende siet de sterren daer bouen in der hoochte.

e Syrach 23.c.25. Esaie. 29.b.15. Hesek. 8.b.12. ende 9.a.9.

13

Ende du sprekest: Wat weet God daer van? soude hy dat ghene dat in donckeren is, richten konnen?

14

De wolcken zijn zijn voordecksel, ende en siet het niet, ende wandelt in den omganck des Hemels.

15

Wilstu ^f† der wereldt loop achten, daer de onrechtueerdighe in ghegaen hebben?

f† And. den ouden wech houden, daer etc.

16

Die vergaen zijn eer het tijt was, ende het water heeft haren gront wech ghewasschen?

17

Die tot God spraken: ^g Maeckt dy van ons: wat soude hen de Almachtighe doen konnen?

g Hiob. 21.b.14.

18

So hy doch haer huys met goederen veruullet: doch der Godloosen meyninghe zy verre van my.

19

^h De rechtueerdige sullent sien, ende hen verblijden, ende de onschuldighe salse bespotten.

h Psal. 107.e.42.

C.20

Wat gheldt het, haer wesen sal verdwijnen, ende haer ouerblijfsel sal het vyer verteeren.

21

So vereenicht dy nu met hem, ende hebt vrede, daer sal dy veel goets wtkomen.

22

ⁱ Hoort de Wet van synen monde, ende vatet syne reden in dijn herte.

i Prouer. 2.a.2.

23

^* Salstu dy bekeeren tot den Almachtighen, so salstu ghebouwet werden, ende onrecht verre van dyner hutten doen.

* Gene. 15.a.1. Deuter. 4.c.29. ende 30.a.1.

24

So saltu voor Aerde gout gheuen, ende voor den ^k† rotzsteen gulden beken.

k† and. beecksteenen Ophyrisch gout.

25

Ende de Almachtighe sal dijn ^l†. gout zijn, ende siluer sal dy toeghehoopt werden.

l†. and. vasticheyt

26

Dan saltu dynen lust hebben aen den Almachtighen, ende dijn aensicht tot God opheffen:

27

^m So saltu hem bidden, ende hy sal dy hooren, ende salt dyne beloften houden.

m Ierem. 29.b.12 Matth. 7.a.7. Ioannis 14.b.13. ende 16.c.23.

28

Wat du salt voornemen, dat sal hy dy laten wel ghelucken, ende het licht sal op dynen weghe schijnen.

29

^n† Want die hen verootmoedighen, die verhoocht hy: ende wie syne ooghen neder slaet, die sal ghenesen.

n† An. Wanneer [de godloosen] vernedert worden, saltu seggen: Ick ben hooch: want wie etc. Prou. 29.c.23.

30

Ende de onschuldighe sal ^o† verlosset werden: hy wert doch verlosset, om ^p† syner handen reynicheyt wille.

o† And. het Eylant behoeden, hy sal het ymmers behoeden om etc.

p† And. dyner