Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xx. Capittel.

1. Zophar vertelt de straffe der hooueerdighen, Godloosen, ende huchelaers.

A.1

DOe antwoordde Zophar van Naema, ⁺ ende sprack:

+ Zophar spreeckt.

2

Daerop moet ick antwoorden, ende en kan niet beyden.

3

Ende wil gheerne hooren, wie my dat sal straffen ende omstooten: want den gheest mijns verstants sal voor my antwoorden.

4

Weetstu niet, dat het alle tijt so toeghegaen heeft, sindt dat daer menschen op Aerden gheweest zijn:

5

Dat den roem der Godloosen niet langhe en

[fol. 173r]

staet, ende de blijschap des huychelaers, eenen ooghenblick duert?

6

^a Wanneer zijn hoochte alreede in den Hemel reycket, ende zijn hooft aen de wolcken roeret:

a Psalm. 37.d.37. 1.Machab. 2.g.63

7

So sal hy doch ten laetsten omkomen als eenen dreck: dat die ghene van dien hy is aenghesien, sullen segghen: Waer is hy?

8

Ghelijck als eenen droom vergaet, so en sal hy oock niet gheuonden worden, ende ghelijck als een ghesichte in der nacht verdwijndt.

9

Welcke ooghe hem ghesien heeft, die en sal hem niet meer sien, ende zijn stede en sal hem niet meer beschouwen.

B.10

Syne kinderen sullen ^b† bedelen gaen, ende zijn hant sal hem moeyte te loon gheuen.

b† And. de armen versoenen [of bidden] ende zijn hant sal zijn vermogen moeten weder gheuen.

11

Syne beenen sullen syne heymelicke sonden wel betalen, ende sullen hen met hem in de Aerde legghen.

12

^c Wanneer hem de boosheyt alreede in synen monde wel smaeckt, so sal hy hem doch in syner tonghen faelgeren.

c Dat is: Wanneer hy boosheydt beghint, so heeft hy lust ende ruste: doch het en sal niet lange dueren, het sal haest bitter smaken.

13

Sy sal hem verhouden worden, ende niet toeghelaten, ende sal hem gheweeret worden in synen hals.

14

Sijn spijse binnen in den lijue sal hem veranderen in aderen galle.

15

De goeden, die hy verslonden heeft, moet hy weder wtspouwen, ende God salse wt synen buyck stooten.

16

^d Hy sal de aderen galle suyghen, endede tonghe der slanghen sal hem dooden.

d Dat is: Hy sal dootlic hertenleet ende iammer lijden, ende alles goedes berooft worden.

17

Hy en sal niet sien den stroom noch de waterbeken, die met honich ende boter vlieten.

18

Hy sal arbeyden, ende dies niet ghenieten: ende syne goeden worden anderen lieden, dat hy dier niet blijde en wort.

19

Want hy heeft onderdruct ende verlaten den armen: hy heeft huysen tot hem ghetrocken, die hy niet ghebouwet en heeft.

C.20

^e Want synen buyck en konde niet vol werden, ende en sal door zijn kostelick goet niet ontkomen.

e Eccle. 5.b.12.

21

Van syner spijse en sal niets ouerblijuen: daer om en sal zijn goedt leuen gheen ghestadicheydt hebben.

22

Wanneer hy alreede de volheyt ende ghenoech heeft, so sal hem doch bange worden: aller handen moeyte sal ouer hem komen.

23

Den buyck sal hem eenmael vol worden: ende hy sal de grimmicheydt zijns toorns ouer hem senden: hy sal ouer ^f† hem reghenen laten synen strijdt.

f† And. hem ende zijn spijse reghenen laten.

24

Hy sal vlieden voor het ijseren harnasch, ende den metalen boghe sal hem veriaghen.

25

Een bloot sweerdt sal door hem henen gaen, ende des sweerts blicken, dat hem bitter zijn sal, sal met verschrickinghe ouer hem komen.

26

Daer en is gheen duysternisse, die hem bedecken mochte: een vyer sal hem verteeren, dat niet ^g opgheblasen en is, ende wie ouerbleuen is in syner hutten, dien sal het qualick gaen.

g Dat is: van God aengesteken, niet door menschen opgheblasen.

27

Den Hemel sal syne misdaet openbaren, ende de Aerde sal haer teghen hem setten.

28

Het koorn in synen huyse sal wech gheuoert worden, verstroeyt aen den daghe zijns toorns.

29

^h Dat is het loon eens Godloosen menschen by Gode, ende het erue syner reden by God.

h Hiob. 27.b.13.