Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xvij. Capittel.

1. Hy vertelt synen iammer ende ellende, als oock te voren.

A.1

MYnen adem is swack, ende myne daghen zijn afghekort, het graf is voorhanden.

2

^a Niemant en is van my ^b bedroghen, noch moet mijn ooghe daerom blijuen in bedroeffenisse.

a Daer en zijn niet dan bespouwers [and. bespotters] by my, daerom moet mijn ooghe blijuen, etc.

b Of, tuysschers wijse bedroghen,

3

Wanneer du alreede een borge voor my hebben woudest, wie wil voor my ghelouen?

4

Du hebst haren herten het verstandt verborghen, daerom saltuse niet verhooghen.

5

^c† Hy roemt wel synen vrienden de wtbuete, doch syner kinderen oogen sullen versmachten.

c† And. Wie met flatteren met synen vrienden omgaet, diens kinderen, etc.

6

Hy heeft my ten ^d spreucke onder den lieden gheset, ^e† ende moet een wonder onder hen zijn.

d Tob. 2.b.10.

e† And. die ick te voren een vreuchde onder hen was.

7

Mijn ghestalte is doncker gheworden van trueren, ende alle myne lidtmaten zijn als een schaduwe.

8

Daer sullen de rechtueerdighe qualick ouer sien, ende de ontschuldighe sullen hen setten teghen de huychelaers.

9

De rechtueerdighe sal synen wech behouden, ende die van reynen handen, sal sterck blijuen.

B.10

Wel aen, so keert v alle herwaerts ende koemt, ick en sal doch gheenen wijsen onder v vinden.

11

Myne daghen zijn verganghen, myne aenslaghen zijn verstroyt, die mijn herte beseten hebben.

12

Ende hebben vander nacht, dach ghemaect, ende vanden dach nacht.

13

Wanneer ick alreede lange wachte, so is doch de Helle mijn huys, ende inder duysternisse is mijn bedde ghemaeckt.

14

De verrottinghe heet ick mynen vader, ende den worme, mijn moeder ende mijn suster.

[fol. 172v]

15

Wat sal ick wachten? ende wie achtet myner hope?

16

Onderwaerts in de Helle sal het varen, ende sal met my in den stof ligghen.