Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ij. Capittel.

1. Onder den dochteren, diemen den Koninck soeckt, 5. wert Esther een arme weese, des Mardachai ghekoren dochter, oock in des Koninck huys ghebracht, 15. wert van hem bemint bouen alle andere, ende in Uasthi stede ter Koninghinne ghemaeckt, 21. Mardachai behoedt den Koninck zijn leuen.

A.1

NA dese gheschiedenissen, ⁺ doe hem de grimmicheyt des Konincx Ahasueros gheleyt hadde, dacht hy aen Vasthi, wat sy gedaen hadde, ende wat ouer haer besloten ware,

+ Een ander Koninginne wert ghesocht.

2

Doe spraken de Ionghen des Konincx, die hem dienden: Men soecke den Koninck, ionghe schoone ^a maechden.

a Of, ionckfrauwen.

3

Ende de Koninck bestelle toesienders in allen landen zijns Konincrijcx, dat sy allerley ionghe schoone maechden te samen brenghen, ^b† op de borcht Susan, int vrouwen getimmer, onder de hant Hege des Konincx Kamerlinck, die op de vrouwen wachtet, ende gheue hen haer ^c cieragie.

b† And. in de Hooftstadt.

c Of, ghesmucke, verciersel, opmutzinge, opmoysel.

4

Ende welcke maecht den Koninck behaecht, die worde Koninghinne in Vasthi stede: dat behaechde den Koninck wel, ende dede also.

5

Daer was nu een Iodisch man, ⁺ op der borcht Susan, die hiet ^d Mardachai, een sone Iair, des soons Sunei, des soons Kis, des soons Iemini,

+ Mardachai een Iode.

d 2.Esd 4.a.1.

6

Die mede wech geuoert was van Ierusalem, ^e doe Iechania de Koninck Iuda wech geuoert wert, dien NebucadNezar de Koninc te Babel, wech voerde.

e 2.Reg. 24.b.15.

7

Ende hy was een ^f† voormonder Hadassa, die is Esther, een dochter zijns Ooms: want sy en hadde noch vader noch moeder: ende sy was een fijn schoon deerne: ende doe haer vader ende moeder sterf, namse Mardachai aen voor een dochter.

f† And. opuoeder Hadassa die anders Esther heet.

8

Doe nu het ghebot ende wet des Konincx luydbaer wert, ⁺ ende vele maechden te hoop ghebracht werden, op de borcht Susan, onder de hant Hegai, wert Esther oock genomen in des Konincx huys, onder de handt Hegai des hoeders der vrouwen.

+ Esther een arm weesken des Mardachai gekoren dochter, wort in des Konincx huys gebracht.

9

Ende de maecht behaechde hem wel, ende sy vant barmherticheyt voor hem: ende hy haestede hem met haer verciersel, dat hy haer haer deel gaue, ende seuen fijne deernen van des Konincx huys daer toe: ende hy brachtse met haren maechden, aen de beste plaetse in het vrouwen ghetimmer.

B.10

Ende Esther en seyde hem haer volck ende haer maechschap niet aen: want Mardachai hadde haer gheboden, sy en soude het niet segghen.

11

Ende Mardachai wandelde alle daghe voor den hof, aen het vrouwen getimmer, dat hy vername, of het Esther wel ghinge, ende wat haer gheschieden soude.

12

Wanneer nu den bestemden tijt, eener yegelicker maghets quam, dat sy ten Koninck Ahasueros komen soude, na dien sy twaelf maenden lanck in vrouwen ^g† verciersel gheweest was, (want haer vercieringe moeste so veel tijts heb-

g† And. opmoyen

[fol. 166v]

ben, namelicken, ses maenden met balsem ende myrrhe, ende ses maenden met goeder specerije, so waren dan de vrouwen verciert.

13

Als dan ginck een maghet ten Koninck, ende ^h† welcke sy hebben woude, die moestemen haer doen, dat sy met haer van het vrouwen ghetimmer, tot des Konincx huys ghinck.

h† An. wat sy etc. dat moeste etc. dat het met haer, etc.

14

Ende wanneer eene des auonts daer in quam, die ghinck des morghens van hem in het ander vrouwen getimmer, onder de hant Saasgas des Konincx Kamerlinck, der byvrouwen hoeder: ende sy en moeste niet weder totten Koninck komen, het en lustede dan den Koninck, ende lietse by namen roepen.

15

Doe nu den tijt Esther hiertoe quam, ⁺ der dochter Abihail, des Ooms Mardachai (die hy voor een dochter hadde aenghenomen) dat sy totten Koninck komen soude, en begheerde sy niets, dan wat Hegai des Konincx Kamerlinck, der vrouwen hoeder, sprack: ende Esther vant ghenade voor alle diese aensaghen.

+ Esther een geborend Iodische wort Koninghinne.

16

Esther nu werdt ghenomen totten Koninck Ahasueros, int Konincklicke huys, inder ⁱ tiender maent, die daer heet Thebeth, inden seuenden Iare zijns Koninckrijcx.

i Dat is, Wintermaent oft December.

17

Ende de Koninck kreech Esther lief bouen alle vrouwen, ende sy vant ghenade ende barmherticheyt voor hem, voor alle maechden: ende hy stelde de Konincklicke kroone op haer hooft, ende maecktese ter Koninghinne in Vasthi stede.

18

Ende de Koninck maeckte een groote maeltijt, alle synen Vorsten ende knechten, dat was een maeltijt om Esthers wille: ende liet de landen rusten, ende gaf Konincklicke gheschencken wt.

19

Ende doemen ten anderen mael maechden vergaderde, ⁺ sat Mardachai in de poorte des Konincx.

+ Mardachai.

C.20

Ende Esther en hadde haer maechschap noch niet geseyt, noch haer volck, als haer dan Mardachai geboden hadde: want Esther dede na den woorde Mardachai, ghelijck als doe hy haer voormonder was.

21

^k Ter seluer tijt, ⁺ doe Mardachai in de poorte des Konincx sat, werden twee Kamerlinghen des Konincx, Bigthan ende Theres, die de deure wachteden, toornich, ende poochden hare han den aenden Koninck Ahasueros te legghen.

k 1.Esther 6.a.1.

+ Bigthan ende Theres werden ghehanghen.

22

Dat wert Mardachai kondt, ende hy seyde het der Koninghinnen Esther: ende Esther seyde het den Koninck in Mardachai name.

23

Ende doemen daerna ^l† sochte, wert het so beuonden: ende sy werden alle beyde aen boomen ghehanghen, ende het wert gheschreuen in de Chronica voor den Koninck.

l† And. vernam