Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

HET BOECK Nehemia.

Dat Eerste Capittel.

1. Nehemia truert ende beklaecht de gheuanckenisse des volcks.

A.1

DIT zijn de gheschiedenissen Nehemia, ⁺ des soons Hachalia: Het geschiedde in der maent Chisleff, des twintichsten Iaers, dat ick was te Susan op de borcht,

+ Nehemia schencker des Konincx Arthahsastha.

2

Doe quam Hanani een myner broederen, met sommighe mannen wt Iuda: ende ick vraechdese: Hoe het den Ioden ginghe, die behouden ende ouerbleuen waren van der geuanckenisse, ende hoe het te Ierusalem stonde.

3

Ende sy spraken tot my: De ouerbleuene van der gheuanckenisse, zijn aldaer in den lande in grooten ongheluck ende versmaedtheydt: ^a de mueren Ierusalems zijn ghebroken, ende hare poorten met vyere verbrandt.

a 2.Reg. 25.a.4. 2.Para. 36.b.19.

4

Doe ick nu sulcke woorden hoorde, satt ick ende weende, ende droech leedt ^b† twee daghen lanck, ende vastede, ende bad voor den God van den Hemel,

b† an. sommighe

5

Ende sprack: ^{+ c} O Heere God van den Hemel, du groote ende verschrickelicke God, ^d die daer houdt het Verbondt ende barmherticheydt dien, die hem lief hebben, ende syne gheboden houden.

+ Nehemia ghebet.

c Nehem. 9.d.31. Danielis 9.a.4.

d Exodi 20.a.5. ende 34.a.6. Deuter. 7.a.9. Ierem. 32.b.18.

6

Laet doch dyne ooren opmercken, ende dyne oogen open zijn, dat du hoorest het ghebet dijns knechts, dat ick nu voordy bidde, dach ende nacht, voor de kinderen Israels dyne knechten, ende bekenne de sonden der kinderen Israels, die wy aen dy ghedaen hebben: ende ick ende mijns vaders huys hebben oock ghesondicht.

7

Wy zijn verdoruen gheworden, dat wy niet ghehouden en hebben de gheboden, beuelen ende rechten, die du gheboden hebst dynen knechte Mose.

8

Ghedenckt doch des woordts, dat du dynen knechte Mose ghebodest, ende sprakest: ^e Wanneer ghy v vergrijpt, so wil ick v onder de volcken verstroyen.

e Deute. 30.a.1.

9

^f So ghy v daerenteghen bekeeret tot my, ende houdet myne gheboden, ende doetse: ende wanneer ghy oock verstooten waret, tot aen des Hemels eynde, so wil ick v doch van daer vergaderen, ende wil v brengen aen de plaetse, die ick verkoren hebbe, dat mynen Naem aldaer woone.

f 2.Para. 6.d.37.

[fol. 161r]

B.10

Sy zijn doch dyne knechten ende dijn volck, die du ^g verlosset hebst, door dyne groote kracht ende machtighe hant.

g Exodi. 14.d.30.

11

Och Heere, laet dyne ooren opmercken op het ghebet dijns knechts, ende op het gebet dyner knechten, die daer begeeren dynen Name te vreesen: ende laet het dynen knechte heden wel ghelucken, ende gheeft hem barmherticheydt voor dese mannen: want ick was des Konincks Schencker.