Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat x. Capittel.

1. Den volcke Israels berout het, dat het vreemde wijuen ghenomen heeft, ende verlaet deselue, 12. God bestelt den Esra in deser sake, een willich volck, 18. de namen der ghener, die vreemde wijuen ghenomen hadden, werden ghenoemt.

A.1

ENde doe ^a Esra also badt ende bekende, ⁺ weende, ende voor den huyse Gods lach, vergaderde hen tot hem wt Israel, een gantsch groote Ghemeynte, van mans ende vrouwen ende kinderen: want het volck weende seer.

a 3.Esdr. 8.k.92.

+ Israel bewilliget syne vreemde wijuen te verlaten.

2

Ende Sechania, de sone Iehiel, van den kinderen Elam, antwoordde ende sprack tot Esra: Welaen, wy hebben ons aen onsen God vergrepen, dat wy vreemde wijuen van den volcken des lants genomen hebben: nu daer is noch een hopen in Israel ouer dien.

3

So latet ons nu een verbont maken met onsen God, dat wy alle wijuen, ende die van hen gheboren zijn, wt doen, na den rade des Heeren, ende ^b† dier, die de gheboden onses Gods vreesen, datmen doe na de Wet.

b† And. staen in der vreese der geboden onses Gods, dat etc.

4

So maeckt dy nu op, want dy behoort het, wy willen met dy zijn: hebt eenen goeden moet, ende doet het.

5

^c Doe stondt Esra op, ende naem eenen Eedt van den Ouersten Priesteren ende Leuiten, ende den gantschen Israel, dat sy na desen woorde doen souden: ende sy swoeren.

c 3.Esdr. 9.a.1.

6

Ende Esra stondt op voor den huyse Gods, ende ginck in de kamer Iohanam des soons Eliasab: ende doe hy aldaer henen quam, en att hy gheen broot, ende en dranck gheen water: want hy droech leedt om der vergrijpinghe wille, der ghenen, die gheuanghen gheweest waren.

7

Ende sy lieten wtroepen door Iuda ende Ierusalem, tot allen kinderen die gheuanghen geweest waren, dat sy hen te Ierusalem vergaderden.

8

Ende wie niet en quame in dry daghen, na den raedt der Ouersten ende Oudtsten, dies haue soude al te mael verbannen zijn, ende hy afghesondert van der Ghemeynte der gheuanghenen.

9

Doe vergaderden hen alle mannen Iuda ende BenIamin te Ierusalem in dry daghen, dat is in den twintichsten daghe der negender maent: ende alle het volck satt op der strate, voor den huyse Gods, ende ^d beefden om der saken wille, ende van den reghen.

d Of, schudden

[fol. 160v]

B.10

Ende Esra de Priester stondt op, ende sprack tot hen: ^e Ghy hebt v vergrepen, dat ghy vreemde wijuen ghenomen hebt, dat ghy der schuldt Israels noch meer makedet.

e Deuter. 7.a.3. Iudicum 3.a.5. Nehem. 13.b.18.

11

So bekennet nu den Heere uwer vaderen God, ende doet zijn welbehagen, ende scheydet v van den volcken des lants, ende van den vreemden wijuen.

12

Doe antwoordde de gantsche Ghemeynte, ende sprack met luyder stemmen: Het geschiede als du gheseyt hebst.

13

Doch des volcx is vele, ende een reghenachtich weder, ende en kan hier buyten niet staen: so en is het ooc niet eens oft tweer dagen werck: want wy hebben sulcker ouertredinge veel gemaect.

14

Latet ons onse Ouersten bestellen in der gantscher Ghemeynten, dat alle die in onsen steden, vreemde wijuen ghenomen hebben, op bestemden tijt komen, ende de Oudtsten eener yeghelicker stadt, ende hare Richters mede, tot dat van ons gewendet werde den toorne onses Gods, om deser saken wille.

15

Doe werden bestelt Ionathan de sone Asahel, ende IehasIa de sone Thikwa, ouer dese sake: ende Mesullam ende Sabthai de Leuiten, holpen hen.

16

Ende de kinderen der gheuanckenisse deden also: ende de Priester Esra, ende de Voorneemste vaderen in harer vaderen huysen, ende alle voorghenoemde scheydeden hen: ende setteden hen aen den eersten daghe der thiender maent, dese sake te verhooren.

17

Ende sy richtedent wt aen allen mannen, die vreemde wijuen hadden in den eersten dage der eerster maent.

18

Ende daer werden gheuonden ^f onder den kinderen der Priesters, ⁺ die vreemde wijuen ghenomen hadden, namelicken onder den kinderen Iesua des soons Iozadak, ende synen broederen: MaeseIa, Elieser, Iarib ende Gedalia.

f 3.Esdr. 9.b.18.

+ De namen der gener die vreemde wijuen ghenomen hadden.

19

Ende sy gauen haer handt daer op, dat sy de wijuen wouden wtstooten, ende tot schultoffer, eenen ram voor hare schult gheuen.

C.20

Onder den kinderen Immer: Hanani ende SabadIa.

21

Onder den kinderen Harim: MaeseIa, Elia, SemaIa, Iehiel ende Vsia.

22

Onder den kinderen Pashur: Elioenai, Maeseia, Ismael, Nethaneel, Iosabad ende Eleasa.

23

Onder den Leuiten: Iosabad, Simei ende Kelaia (hy is de Klita,) PethahIa, Iuda ende Elieser.

24

Onder den Sangers: Eliasib: onder den Deurwachters: Sallum, Telem ende Vri.

25

Van Israel: onder den kinderen Pareos: Ramia, Iesia, Malchia, Meiamin, Eleasar, Malchia ende Benaia.

26

Onder den kinderen Elam: Mathania, Sacharia, Iehiel, Abdi, Ieremoth ende Elia.

27

Onder den kinderen Sathu: Elioenai, Eliasib, Mathania, Ieremoth, Sabad ende Asisa.

28

Onder den kinderen Bebai: Iohanan, Hanania, Sebai ende Athlai.

29

Onder den kinderen Bani: Mesullam, Malluch, AdaIa, Iasub, Seal ende Ieremoth.

D.30

Onder den kinderen PahathMoab: Adna, Chelal, BenaIa, MaeseIa, MathanIa, Bezaleel, Benui ende Manasse.

31

Onder den kinderen Harim: Elieser, Hesia, MalchIa, SemaIa, Simeon,

32

BenIamin, Malluch ende Samaria.

33

Onder den kinderen Hasum: Mathnai, Mathatha, Sabad, Eliphelet, Ieremai, Manasse ende Simei.

34

Onder den kinderen Bani: Madai, Amram, Huel,

35

BenaIa, Bedia, Chelui,

36

Naia, Meremoth, Eliasib,

37

Mathania, Mathnai, Iaesau,

38

Bani, Benui, Simei,

39

Selemia, Nathan, Adaia,

E.40

Machnabai, Sasai, Sarai,

41

Asareel, SelemIa, Samaria.

42

Sallum, Amaria ende Ioseph.

43

Onder den kinderen Nebo: Ieiel, Mathithia, Sabad, Sebina, Iaddai, Ioel ende Benaia.

44

Dese hadden al te mael vreemde wijuen ghenomen: ende daer waren sommighe onder denseluen wijuen, die daer kinderen ghedraghen hadden.