Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxxi. Capittel.

1. Alle Afgodische kramen worden in Iuda, BenIamin, Ephraim, ende Manasse, na Paschenhouden, verstoort, 2. Priesters ende Leuiten werden in haer ampt ghestelt, 3. met lijfs neeringhe oueruloedich versorcht, 11. ende met getrouwe opsienders ende wtdeylers haers inkomens voorsien, 20. Hiskia soeckt den Heere van gantscher herten, so heeft hy groot gheluck.

A.1

ENde doe dit altemael wtgherichtet was, toghen wt alle Israeliten, die inden steden Iuda gheuonden werden, ^a braken de ^b calumnen, ende hieuwen de haghen af, ende braken de hoochten ende Altaren af, wt den gantschen Iuda, BenIamin, Ephraim ende Manasse: tot dat syse te niete maeckten: ende de kinderen Israels toghen altemael weder tot haren goede in hare steden.

a 2.Paral. 14.a.3. ende 17.a.3. ende 33.b.15.

b Of, stantteeckenen,

2

Hiskia oock stelde Priesters ende Leuiten in hare ordeninghe, eenen yeghelicken na synen ampte, beyde de Priesters ende Leuiten, tot brantofferen ende danckofferen, dat sy dienden, danckten ende loefden in de poorten des leghers des Heeren.

3

Ende de Koninck gaf zijn deel van syner haue, tot brantofferen des morgens ende des auonts, ende tot brantofferen des Sabbaths ende der nieuwer maenden ende Feesten, ^c als het gheschreuen staet in de Wet des Heeren.

c Nume. 28.a.3.9.

4

Ende hy sprack totten volcke, dat te Ierusalem woonde, dat sy deel gauen den Priesteren ende Leuiten: op dat sy des te ^d vlijtigher waren, tot de Wet des Heeren.

d Op dat sy niet gebrecx haluen des voetsels ende der boecken, beyde het studeren te verlaten, ende haer voetsel te soecken, gedrongen werden: want de Kerckendienaers sullen versorcht zijn, ende studeren: als Nehemias ende Syrach oock leeren.

5

Ende doe dat woort wt quam, gauen de kinderen Israels veel eerstelinghen van koren, most, olye, honich, ende allerley inkominghe van velden, ende allerley thienden, brachten sy vele in.

6

Ende de kinderen Israels ende Iuda, die inden steden Iuda woonden, brachten oock thienden van runderen ende schapen, ende thienden van den gheheylichden, dat sy den Heere haren God gheheylicht hadden, ende maeckten hier eenen hoop, ende daer eenen hoop.

7

Inder derder maent begonsten sy hoopen te legghen, ende in der seuender maent, richteden sy het wt.

8

Ende doe Hiskia met den Ouersten daer in ghinck, ende saghen de hoopen, loefden sy den Heere ende zijn volck Israel.

9

Ende Hiskia vraechde de Priesters ende de Leuiten, om de hoopen.

B.10

Ende Asaria de Priester, de voorneemste inden huyse Zadok, sprack tot hem: Sindt der tijt datmen begonst heeft, de Heffinghe te brengen int huys des Heeren, hebben wy ghegheten, ende zijn satt geworden, ende daer is noch vele ouerghebleuen: want de Heere heeft zijn volck gheseghent, daerom is desen hoop ouerghebleuen.

11

Doe beual de Koninck, ⁺ datmen de kisten maken soude, aen den huyse des Heeren: ende sy maecktense.

+ Kiste voor de Priesters ende Leuiten.

12

Ende leyden daer in de Heffinghe, de thienden, ende het gheheylichde, trouwelicken: ende ouer dat selue was ^e† voorste ChananIa de Leuijt, ende Simei zijn broeder, de ander.

e† And. voorghesette

13

Ende Iehiel, Asasia, Nagath, Asahel, Ierimoth, Iosabad, Eliel, Iesmachia, Mahath ende BenaIa, gheordineert vander hant ChananIa ende Simei zijns broeders, na den beuele des Konincx Hiskia: nu Asaria was voorste inden huyse Gods.

14

Ende Kore de sone Iemna de Leuijt, de deurwachter teghent Oosten, was ouer de vrijwillighe gauen Gods, hem toebetrout, die den Heere ter Heffinghe ghegheuen werden, ende ouer de allerheylichsten.

15

Ende onder syner hant waren: Eden, Miniamin, Iesua, Semaia, Amaria ende Sachania, in de steden der Priesters, op ghelooue, dat sy gheuen souden haren broederen, na harer ordeninghe, den kleynsten als den grootsten.

16

^f† Daertoe de ghene, die daer gherekent werden voor mans persoonen, van dry Iaren oudt, ende daerbouen, onder allen die in het huys des Heeren ghinghen, ^g† een yeghelick aen synen daghe tot haren ampte in harer wacht, na harer ordeninghe.

f† And. wtghenomen

g† And. eenen yeghelicken zijn dachbehoorte [of dachrecht]

17

Oock die voor Priesters gerekent werden in den huyse harer vaderen, ende de Leuiten, van twintich Iaren ende daer bouen, in harer wacht na harer ordeninghe.

18

Daer toe die gerekent werden onder hare kinderen, wijuen, sonen ende dochteren, in der gantscher Ghemeynte: want sy heylichden ghetrouwelicken het gheheylichde.

19

Oock waren ^h† daer mannen met namen benoemt, onder de kinderen Aaron den Priesteren, op den velden der voorsteden in allen steden, dat sy deel gauen allen mans persoonen onder den Priesteren, ende allen, die onder de Leuiten gherekent werden.

h† And. de mannen met namen benoemt [verordent] dat sy deel gauen den kinderen Aarons, etc. steden, allen, etc.

C.20

Also dede Hiskia inden gantschen Iuda, ende dede wat goet, recht ende warachtich was, voor den Heere synen God.

21

Ende in allen doen, dat hy begonde, aen den dienste des huys Gods, na de Wet ende gheboden, te soecken synen God, dat dede hy van gantscher herten: daerom hadde hy oock gheluck.