Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxviij. Capittel.

1. Ahas, so hy groote grouwelen teghen God aenrichtet, 5.17. ladet op hem ende zijn volck menigherley ongheluck ende iammer. 9. Israel syner onghenade van Obed ghestraft, 12. sendet de gheuangenen van Iuda weder, 16. Ahas verlaet hem op ongewisse hulpe vreemder Koninghen, 22. maeckt (oock in nooden) syner Godloosheyt noch mate noch eynde, 26. ende sterft.

A.1

AHas was ^a twintich Iaer oudt, ⁺ doe hy Koninck wert, ende regeerde sesthien Iaer te Ierusalem, ende en dede niet, dat den Heere welbeuiel, ghelijck als zijn vader Dauid.

a 2.Reg. 16.a.2.

+ Ahas 16. Iaer Koninck in Iuda, seer godloos.

2

Maer hy wandelde in de weghen der Koninghen Israels: daer toe maecte hy ghegoten beelden Baalim,

3

Ende roockte inden dale der kinderen Hinnon, ^b ende hy verbrandde syne sonen met vyer, na den grouwel der Heydenen, die de Heere voor den kinderen Israels verdreuen hadde.

b Deute. 18.b.10. 2.Regum. 21.a.6. Ierem 7.d.30. ende 19.a.5.

4

Ende offerde ende roockte op de Hoochte ende op de bergen, ende onder alle groene boomen.

5

^c Daerom gaf hem de Heere zijn God, in de hant des Konincx te Syrien, dat sy hem sloegen, ende eenen grooten hoop vanden synen geuanckelick wech voerden, ende te Damascon brachten: oock wert hy ghegheuen onder de hant des Konincx Israels, dat hy eenen grooten slach aen hem dede.

c Iesaie 7.a.1.

6

Want Pekah de sone Remalia, ⁺ sloech in Iuda hondert ende twintich duysent op eenen dach, die altemael redelicke lieden waren: daerom dat sy den Heere harer vaderen God verlieten.

+ Pekah Koninc. Israel slaet Iuda.

7

Ende Sichri een gheweldich man in Ephraim, ⁺ verworchde Maeseia den sone des Konincx, ende Asraikam den Huysvorst, ende Elkana den naesten na den Koninck.

+ Sichri.

8

Ende de kinderen Israels werden gheuanckelick wech, van haren broederen, twee hondert duysent, vrouwen, sonen, ende dochteren, ende namen daer toe grooten roof van hen, ende brachten den roof te Samaria.

9

Aldaer nu was een Propheet des Heeren, ⁺ die hiet Obed, die ghinck wt den heyre teghen dat na Samaria quam, ende sprack tot hen: Siet, de wijle dat de Heere uwer vaderen God ouer Iuda toornich is, heeft hyse in uwe handen ghegheuen: ghy dan hebtse verworcht so grouwelicken, dat het inden Hemel reyckt.

+ Obed de Propheet verschrikt de Israeliten, also dat sy de gheuangenen van Iuda weder gheuen.

B.10

Nu denckt ghy daertoe, de kinderen Iuda ende Ierusalem, v te onderworpen, tot knechten ende maechden: Is dat dan gheen schult by v, teghen den Heere uwen God?

11

So hoort my nu, ende brengt de gheuanghenen weder henen, die ghy hebt wech gheuoert van uwen broederen, want des Heeren toorne is ouer v vergrimmet.

12

Doe maecten hen op, sommighe vanden voorneemsten der kinderen Ephraim, AsarIa de sone Iohanan, Berechia de sone Mesillemoth, Iehiskia de sone Sallum, ende Amasa de sone Hadlai, teghen die, die wt den heyre quamen.

13

Ende spraken tot hen: Ghy en sult de geuanghenen niet hierin brengen: want ghy ghedenct slechts schult voor den Heere ouer ons: op dat ghy onser sonde ende schult dies te meer maket: want der schult is alreede te voren al te vele, ende den toorne ouer Israel vergrimmet.

14

Doe lieten de gheharnaschte, de gheuanghenen ende den roof, voor den Ouersten, ende voor der gantscher Ghemeynten.

15

Doe stonden de mannen op, die als nu by namen ghenoemt zijn, ende namen de gheuanghenen, ende alle die daer bloot onder hen waren, toghen sy aen van den gheroofden, ende kleeddense, ende toghen hen schoenen aen, ende gauen hen te eten ende te drincken, ende salfdense, ende voerdense op Ezelen, alle die swack waren, ende brachtense na Ieriho tot der Palmstadt by hare broederen, ende quamen weder te Samaria.

16

^d Te dier seluer tijt, sandt de Koninck Ahas, tot den Koningen van Assur, dat sy hem holpen.

d 2.Reg. 16.a.7.

17

Ende de Edomiters quamen noch eens, ende sloeghen Iuda, ende voerden sommighe wech.

18

Oock leyden hen de Philisteen neder inden steden, in der landouwe, ende teghent Suyden Iuda, ende wonnen BethSemes, Aialon, Gederoth, ende Socho met haren dochteren, ende Thimna met haren dochteren, ende Gineso met haren dochteren, ende woonden daerin.

19

Want de Heere verootmoedichde Iuda, om Ahas wille, des Konincx ^e† Iuda, daerom dat hy Idua ^f bloot maecte, ende vergreep hem aen den Heere.

e† And. Israel

f Dese blootheyt was, dat het volc onder God, na synen woorde niet en leefde, maer vrij na zijn eygen goetduncken, in Godsdiensten, gelijck als Exo. 32. Aaron het volck ontbloottede.

C.20

Ende Tiglath Pilnesser de Koninck van Assur, quam ^g† teghen hem op, die belegerde hem, doch hy en was hem niet machtich ghenoech.

g† An. tot hem, ende bekommerde hem meer, dan dat hy hem sterckte.

21

Want Ahas deylde het huys des Heeren, ende het huys des Konincx, ende der Ouersten, welcker hy den Koninck te Assur gaf: doch het en halp hem niets.

22

Daertoe in syner noot, maeckte de Koninck Ahas des vergrijpens aenden Heere noch meer.

23

Ende offerde den Goden te Damascon die hem gheslagen hadden, ende sprack: ^h De Goden der Koninghen te Syrien, helpen hen, daerom wil ick hen offeren, dat sy my oock helpen: so doch deselue, hem ende den gantschen Israel, eenen val waren.

h Habacuc. 1.b.11.

24

Ende Ahas bracht te hoope, de vaten des huys Gods, ende ^i† vergaderde de vaten inden huyse Gods, ^k ende sloot de deure toe aenden huyse

i† And. verbrack

k 2.Paral. 29.a.3.

[fol. 153v]

des Heeren, ende maeckte hem Altaren in alle hoecken te Ierusalem.

25

Ende inden steden Iuda, hier ende daer maecte hy hoochten, te roocken anderen Goden, ende verweckte den Heere syner vaderen God tot toorne.

26

Wat nu meer van hem te seggen is, ende alle syne wegen, beyde de eerste ende de laetste, siet, dat is gheschreuen, int boeck der Koninghen Iuda ende Israels.

27

Ende Ahas ontsliep met synen vaderen, ende sy begroeuen hem inder stadt Ierusalem: doch sy en brochten hem niet onder de grauen der Koninghen Israels: ende zijn sone Ichiskia, wert Koninck in zijn stede.