Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

[fol. 153r]

Dat xxvij. Capittel.

1. Iotham regeert loffelick, 5. ende so hy zijn weghen voor synen God richtet, wort der Ammoniters machtich.

A.1

ENde Iotham ^a was vijf ende twintich Iaer oudt, ⁺ doe hy Koninck wert, ende regeerde sesthien Iaer te Ierusalem: zijn moeder hiet Ierusa, een dochter Zadok.

a 2.Reg. 15.d.32.

+ Iotham 16. iaer Koninck in Iuda.

2

Ende dede dat den Heere wel beuiel, ghelijck als zijn vader Vsia ghedaen hadde: behaluen dat hy inden Tempel des Heeren ^b† niet en ghinck, ende het volck hem noch verderf.

b† And. niet [wreuentlick]

3

Hy bouwede de hooghe poorte aen den huyse des Heeren, ende aender mueren Op Iel bouwede hy vele.

4

Ende bouwede de steden op het gheberchte Iuda, ende in den wouden bouwede hy borchten ende torrens.

5

Ende hy krijchde met den Koninck der kinderen Ammon, ende hy wert haerder machtich, dat hem de kinderen Ammon desseluen Iaers gauen hondert centener siluers, thien duysendt Cor tarwen, ende thien duysent gersten: so vele gauen hem de kinderen Ammon, oock inden anderen ende derden Iare.

6

Also wert Iotham machtich: want hy richtede zijn weghen voor den Heere synen God.

7

Wat nu meer van Iotham te seggen is, ende alle syne krijghen, ende alle zijn weghen, siet, dat is gheschreuen in het boeck der Koninghen Israels ende Iuda.

8

Vijf ende twintich Iaer was hy oudt, doe hy Koninck wert, ende regeerde sesthien Iaer te Ierusalem.

9

Ende Iotham ontsliep met synen vaderen, ende sy begroeuen hem inder stadt Dauids: ende zijn sone Ahas wert Koninck in zijn stede.