Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxvi. Capittel.

1. Usia richtet, met hulpe des Heeren, 5. dien hy voor eenen tijt lanck soeckt, vele dinghen te huys ende inden krijch gheluckelick wt, 11. heeft een wel gherustet ende sterck krijchsvolck, 16. ende so hy hem aenden Heere met te roocken vergijpt, 19. wort met malaetsheyt, tot aen synen doot, gheslaghen.

A.1

DOe ^a nam het gantsche volc Iuda Vsia, ⁺ die was sesthien Iaer oudt, ende maeckte hem ten Koninck in zijns vaders Amazia stede.

a 2.Reg. 14.c.21.

+ Vsia oft Asaria 52. Iaer Koninc in Iuda.

2

Dieselue bouwede Eloth, ende brachtse weder aen Iuda, na dien de Koninck ontslapen was met synen vaderen.

3

^b Sesthien Iaer was Vsia oudt, doe hy Koninck wert, ende regeerde twee ende vijftich Iaer te Ierusalem: zijn moeder hiet Iechalia van Ierusalem.

b 2.Reg. 15.a.2.

4

^c Ende dede dat den Heere wel beuiel, ghelijck als zijn vader Amazia ghedaen hadde.

c 2.Reg. 12.a.2.

5

Ende hy socht God so langhe als Sacharia leefde, de Leeraer inden ^d gesichten Gods: ende so langhe als hy den Heere sochte, liet hem God alle dinck wel ^e ghelucken.

d Ghesichten zijn prophecien. Ende hy wil so veel seggen: Sacharia zy gheleert geweest in Mose ende inden Propheten, als Samuel, Dauid, Gad, ende dier gelijcken.

e Of, slaen.

6

Want hy tooch wt, ende krijchde teghen de Philisteen, ende verscheurde de mueren te Gath, ende de mueren te Iabne, ende de mueren te Asdod, ende bouwede rondtom Asdod, ende onder den Philisteen.

7

Want God halp hem teghen de Philisteen, teghen de Arabiers, tegen die te Gurbaal, ende teghen de Meuniters.

8

Ende de Ammoniters gauen Vsia geschencken, ende hy wert beroepen tot datmen koemt in Egypten: want hy wert altijt stercker ende stercker.

9

Ende Vsia bouwede torrens te Ierusalem aen de hoeckpoorte ende aen de Dalpoorte, ende aen andere eynden, ende beuestichdese.

B.10

Hy bouwede oock torrens inder woestijne, ende groef vele bornputten: want hy had veel vees, beyde in de landouwen ende op de effen velden: oock ackerlieden, ende wijgaerdeniers aenden berghen ende aen Charmel: want hy hadde lust tot ackerwerck.

11

Ende Vsia hadde een macht ten strijde, ⁺ die int heyr toghen van krijchsknechten, in den ghetale gerekent, onder der hant Ieiel des schrijuers, ende Maeseia des Amptmans, onder der hant Hanania, vanden Ouersten des Konincx.

+ Het ghetal des krijchsvolcks Vsia.

12

Ende het ghetal der voorneemsten vaders onder den stercken krijgheren, was twee duysendt ende ses hondert.

13

Ende onder harer hant des heyrs macht, dry hondert duysent, ende seuen duysent, ende vijf hondert, ten strijde gheschickt, in heyrskracht, den Koninck te helpen teghen de vyanden.

14

Ende Vsia schicte hem voor het gantsche heyr, schilden, spiessen, helmen, pantziers, bogen ende slinghersteenen.

15

Ende maeckte te Ierusalem borstgheweeren konstelick, die op den torren ende hoecken zijn souden, te schieten met pijlen ende groote steenen: ende zijn gheruchte quam wijdt wt, daerom dat hem sonderlick geholpen wert, tot dat hy machtich wert.

16

Ende doe hy machtich geworden was, ^f verhief hem zijn herte tot synen verderue: want hy vergreep hem aen den Heere synen God, ende ghinck inden Tempel des Heeren, te roocken op den reuckaltaer.

f Iudith 1.a.6.

17

^g Doch Asaria de Priester ghinck hem na, ende tachtentich Priesters des Heeren met hem, redelicke lieden.

g 1.Paral. 6.b.10.

18

Ende wederstonden Vsia den Koninck, ende spraken tot hem: ^h Het en behoort dy niet Vsia, den Heere te roocken: maer den Priesteren Aarons kinderen, die te roocken gheheylicht zijn: gaet wt, wt het Heylichdom, want du vergrijpest dy, ende het en sal dy gheen eere zijn, voor God den Heere.

h Nume. 18.a.1.

19

Doch Vsia wert toornich, ⁺ ende hadde een wieroockvat in der hant; ⁱ ende doe hy met den Priesteren murmureerde, voer de malaesheyt wt aen zijn voorhooft, voor den Priesteren in het huys des Heeren, voor den Reuckaltaer.

+ Vsia de Koninc wort malaetsch Sacha. 14.a.5.

i Nume. 12.b.10.

C.20

Ende Asaria de Ouerste Priester, keerde hem tot hem, ende alle Priesters, ende siet, doe was hy malaetsch aen zijn voorhooft: ende sy stieten hem wt: hy haeste oock selfs wt te gaen: want zijn plaghe was vanden Heere.

21

^k Also was Vsia de Koninck malaetsch, tot aen synen doot: ende ^l woonde in een bysonder huys malaetsch, want hy wert verstooten vanden huyse des Heeren: Iotham nu zijn sone, stont des Konincx huys voor, ende richtede het volck inden lande.

k 2.Reg. 15.a.5.

l Leuit. 13.e.46. Nume. 5.a.2. ende 12.b.14.

22

Wat nu meer van Vsia te segghen is, beyde het eerste ende het laetste, dat heeft beschreuen de Prophete Iesaia de sone Amoz.

23

Ende Vsia ontsliep met synen vaderen, ende sy begroeuen hem by syne vaderen, inden acker by der begrauenisse der Koningen: want sy spraken: Hy is malaetsch: ende Iotham zijn sone wert Koninck in zijn stede.