Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xix. Capittel.

1. Iosaphat vanden Prophete Iehu ghestraft, 4. brengt het volck weder tot den Heere, 5. settet Richters in allen vasten steden Iuda, 8. ende Leuiten ende Priesters te Ierusalem, met ernstigen beuele ende vermane, dat sy een recht gherichte houden.

A.1

ENde Iosaphat de Koninck Iuda, ⁺ quam weder te huys met vreden te Ierusalem.

+ Iehu de Propheet een sone Hanani. 1.Reg. 16.a.7.

2

Ende Iehu de sone Hanani de Siender, ghinck wt hem teghen, ende sprack totten Koninck Iosaphat: Saltu so den godloosen helpen, ende lief hebben, die den Heere haten? ende om dies wille is ouer dy den toorn des Heeren.

3

Ghelijckewel doch is wat goets aen dy gheuonden, dat du de haghen hebst wtgeuaecht wt den lande, ende hebst dijn herte gherichtet, God te soecken.

4

Also bleef Iosaphat te Ierusalem: ende hy tooch ^a wederom wt onder het volck, van Berseba aen tot op het geberchte Ephraim, ende brachtese weder tot den Heere harer vaderen God.

a 2.Paral. 17.a.7.

5

Ende hy stelde Richters inden lande, in allen vasten steden Iuda, in eener yeghelicker stadt sommighe.

6

Ende sprack tot den Richters: ⁺ Siet toe wat ghy doet: want ghy houdt het gerichte, niet den menschen, maer den Heere, ende hy is met v int gherichte.

+ Een vermaninge Iosaphats aen de Richters.

7

Daerom laet de vreese des Heeren by v zijn, ende hoedt v, ende doet het: want by den Heere onsen God en is gheen onrecht, ^b noch aensien der persoonen, noch aenneminghe des gheschencks.

b Deute. 10.b.17. Iob 34.b.19. Roma. 2.b.11. Act. 10.d.34. Galat. 2.a.6. 1.Petr. 1.b.17. Sapient. 6.a.8. Syrach 35.c.22.

8

Oock stelde Iosaphat te Ierusalem, vanden Leuiten ende Priesteren, ende vanden Ouersten vaderen in Israel, ouer het gherichte des Heeren, ende ouer de saken, ende lietse te Ierusalem woonen.

9

Ende geboot hen, ende sprack: ⁺ Doet also ^c in der vreese des Heeren, trouwelick ende met rechter herten.

+ Een recht gherichte beueelt Iosaphat.

c Deute. 1.b.16.

B.10

In allen saken die tot v komen van uwen broederen, die in haren steden woonen, tusschen bloet ende bloet, tusschen wetten ende gheboden, tusschen seden ende rechten, sult ghyse onderrichten, dat sy hen niet en beschuldighen aenden Heere, ende eenen thoorne ouer uwe broederen en kome: doet hem also, so en sult ghy v niet beschuldighen.

11

Siet, AmarIa de Priester, is de Ouerste ouer v, in allen saken des Heeren: so is SabadIa de sone Ismael, Vorst inden huyse Iuda, in allen saken des Konincx: so hebt ghy oock amptlieden de Leuiten voor v: hebt eenen goeden moet, ende doet het, ende de Heere sal met den goeden zijn.