Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

[fol. 149v]

Dat xvij. Capittel.

1. Iosaphat, so hy den Heere soeckt, 5. verkrijcht grooten rijckdom ende eere, 7. laet des Heeren Wet leeren in allen steden Iuda, 12. wort gheureest van allen Koninghen rontom, 13. ende heeft met veel voorraets, een stercke wachte aen Hooftlieden.

A.1

ENde zijn sone ^a Iosaphat wert Koninck in zijn stede, ⁺ ende wert machtich teghen Israel.

a 1.Reg. 15.c.24.

+ Iosaphat Koninck Iuda.

2

Ende hy leyde krijchsvolck in alle vaste steden Iuda, ende stelde Amptlieden inden lande Iuda, ende inden steden Ephraim, die zijn vader Assa ghewonnen hadde.

3

Ende de Heere was met Iosaphat: want hy wandelde in de voorgaende wegen zijn vaders Dauids, ende en socht Baalim niet,

4

Maer den God zijns vaders: ende wandelde in syne geboden, ende niet na de wercken Israels.

5

Daerom beuestichde hem de Heere het Konincrijck: ende gantsch Iuda gaf Iosaphat gheschenken, ende hy hadde rijckdom ende eere de volheyt.

6

Ende doe zijn herte moedich wert in de weghen des Heeren, nam hy voortaen wech de hoochten ende haghen wt Iuda.

7

Inden derden Iare zijns Koninckrijcx, ⁺ sandt hy zijn Vorsten, Benhail, ObadIa, SacharIa, Nethaneel ende Michaia henen, dat sy leeren souden inden steden Iuda:

+ Een Koninclicke daet, ter salicheyt des lants.

8

Ende met hen de Leuiten, SemaIa, NethanIa, Sebadia, Asahel, Semiramoth, Ionathan, Adonai, Tobia, ende TobAdonai: ende met hen de Priesters Elisama ende Ioram.

9

Ende sy leerden in Iuda, ende hadden het Wetboeck des Heeren met hen, ende toghen rontom in allen steden Iuda, ende leerden het volck.

B.10

Ende de vreese des Heeren quam ouer alle Koninckrijcken inden lande, die rondtom Iuda laghen, dat sy niet en krijchden teghen Iosaphat.

11

Ende de Philisteen brachten Iosaphat gheschencken, een last siluers: ende de Arabers brachten hem seuen duysent ende seuen hondert rammen, ende seuen duysent ende seuen hondert bocken.

12

Also nam Iosaphat toe, ende wert altoos grooter: ende hy bouwede in Iuda borchten ende korensteden.

13

Ende hadde veel ^b voorraets inden steden Iuda, ende strijdtbare mannen ende gheweldighe lieden, te Ierusalem.

b Niet alleen des korens, maer ooc des krijstuychs, als wapenen ende alle rustinghe.

14

Ende dit was de ordeninghe in harer vaderen huys, ⁺ die in Iuda ouer duysendt Ouersten waren: Adna een Ouerste, ende met hem waren dry hondert duysent gheweldighe lieden.

+ Hooftlieden Iosaphats.

15

Naest hem was Iohanan de Ouerste, ende met hem waren twee hondert ende tachtentich duysent.

16

Naest hem was Amasia de sone Sichri, de vrijwillighe des Heeren, ende met hem waren twee hondert duysent gheweldighe lieden.

17

Vanden kinderen BenIamin was Eliada, een geweldich man, ende met hem waren twee hondert duysent, die met de boghen ende schilden gherustet waren.

18

Naest hem was Iosabad, ende met hem waren hondert ende tachtentich duysent gherust ten heyre.

19

Dese wachteden alle op den Koninck, behaluen die, die de Koninck noch gheleyt hadde in de vaste steden in het gantsche Iuda.