Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xvi. Capittel.

1. Assa soeckt hulpe aen den Koninck te Syrien, teghen Baesa den Koninck Israel, 7. ende so hem daer de Siender Hanani ouer straft, 10. laet hy hem met toorne vanghen, 12. ende soeckt in syner kranckheyt de medecijnen bouen den Heere.

A.1

INden sesende dertichsten Iare des Konincrijcks Assa, ^{+ a} tooch op Baesa, de Koninck Israels teghen Iuda, ende bouwede Rama, dat hy Assa den Koninck Iuda belettede in ende wt te trecken.

+ Baesa.

a 1.Reg. 15.b.17.

2

Ende Assa nam wt den schat inden huyse des Heeren, ende inden huyse des Konincx siluer ende gout, ende sandt tot Benhadad den Koninck te Syrien, die te Damascon woonde, ende liet hem segghen:

3

^b Daer is een verbondt tusschen my ende dy, tusschen mynen vader ende dynen vader: daerom hebbe ick dy siluer ende gout ghesonden, dat du het verbondt met Baesa den Koninck Israels varen latest, dat hy van my af trecke.

b 2.Sam. 8.a.6.

4

Benhadad hoorde den Koninck Assa, ende sandt syne Heyruorsten tegen de steden Israels: die sloeghen Eion, Dan, ende AbelMaim, ende alle korensteden Naphthali.

5

Doe Baesa dat hoorde, liet hy af Rama te bouwen, ende hielt op van synen wercke.

6

Ende de Koninc Assa nam tot hem het gantsche Iuda, ende sy droeghen de steenen ende het hout van Rama wech, daer Baesa mede bouwede, ende hy bouwede daer Geba ende Mizpa mede.

7

Te dier tijt quam Hanani de Siender tot Assa den Koninck Iuda, ⁺ ende sprack tot hem: Dat du dy op den Koninck te Syrien verlaten hebst, ende en hebst dy niet op den Heere dynen God verlaten: daerom is de macht des Konincx te Syrien, dyner hant ontkomen.

+ Hanani de Propheet wort geuangen van Assa

8

^c Waren niet der Moorlieden ende der Libiers, eenen grooten hoop, met gantsch veel waghenen ende ruyteren? noch gafse de Heere in dijn hant, doe du dy op hem verlietest,

c 2.Paral. 14.a.9.

9

^d Want des Heeren ooghen sien alle landen, dat hy stercke de ghene, ^e die van gantscher herten aen hem zijn: du hebst sottelicken ghedaen, daerom saltu oock van nu aen krijch hebben.

d 2.Macha. 9.a.5 ende 12.c.22. Psalm. 33.b.13. Iob. 28.c.25.

e Ioan. 7.d.38.

B.10

Doch Assa wert toornich op den Siender, ⁺ ende leyde hem in de gheuanckenisse: want hy murmureerde met hem ouer dese sake: ende Assa onderdruckte sommighe des volcx te dier tijt.

+ Merckt: De propheet wort gheuangen ende het volck verdruckt.

11

De gheschiedenissen Assa, beyde de eerste ende de laetste, siet, die zijn geschreuen int boeck van den Koninghen Iuda ende Israel.

12

Ende Assa wert kranck aen syne voeten, inden neghen ende dertichsten Iare zijns Konincrijcx, ende zijn kranckheyt nam seer toe: ^f oock en sochte hy in syner kranckheyt den Heere niet, maer de medecijnmeester.

f Syrach. 38.a.9.

13

Also ontsliep Assa met synen vaderen, ende sterf inden een ende veertichsten Iare zijns Koninckrijcx.

14

Ende men begroef hem in synen graue, dat hy hem hadde laten grauen inder stadt Dauids: ^g ende sy leyden hem op synen legher, datmen gheuult hadde met goeden reuckwercke, ende allerley specerije, na der Apotekers konst ghemaeckt, ende maeckten een gantsch groot bernen ouer hem.

g Ierem. 34.a.5.