Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xv. Capittel.

1. Assa door propheteringe Asarie versterct, 8. neemt alle grouwelen wt Iuda, Ben Iamin ende allen gewonnen steden wech, 10. laet een verbont voor den Heere maken, dies hem gantsch Iuda verblijdt, 16. ende set zijn grootmoeder van het ampt.

A.1

ENde op Asaria den sone Obed, ⁺ quam den Gheest Gods,

+ Asaria de Propheet propheteert.

2

Die ghinck wt Assa tegen, ende sprack tot hem: Hoort my toe Assa ende gantsch Iuda ende BenIamin: ^a de Heere is met v, dewijle dat ghy met hem zijt: ^b ende wanneer ghy hem soect, so sal hy hem van v vinden laten: ^c sult ghy hem daerenteghen verlaten, so sal hy v oock verlaten.

a Sap. 1.a.1. 2.

b 2.Paral. 33.b.12 Matth. 7.a.7.

c 2.Paral. 24.c.20

3

^d Daer sullen nu veel daghen zijn in Israel, dat daer gheen recht God, gheen Priester die daer leert, ende gheen Wet zijn en sal.

d Hose. 3.a.4.

4

^e Ende wanneer sy hen bekeeren in harer noot, tot den Heere den God Israels, ende hem soecken sullen, so sal hy hem vinden laten.

e Deut. 4.c.29. ende 30.a.1. 2.Paral. 33.b.12. Psalm. 106.e.44.

5

Te dier tijt en sal het niet wel gaen, dien die wt ende in gaet: want daer sullen grooten rumoeren zijn, ouer alle die op Aerden woonen.

6

Want een volck sal het ander verslaen, ende een stadt de andere: want God salse verschricken met alderley angst.

7

Ghy daerenteghen hebt eenen goeden moet, ende en trect uwe handen niet af: want v werck heeft synen loon.

8

Doe nu Assa dese woorden, ende dese prophetie Obed des Propheten hoorde, kreech hy eenen goeden moet, ende nam wech de grouwelen wt den gantschen lande Iuda ende BenIamin, ende wt den steden ^f die hy gewonnen hadde op het gheberchte Ephraim, ende vernieude den Altaer des Heeren, die voor ^g† den voorhuyse des Heeren stont.

f 2.Paral. 13.b.19. ende 14.b.14.

g† And. halle

9

Ende vergaderde het gantsche Iuda ende BenIamin, ende de vreemdelinghen by hen wt Ephraim, Manasse ende Simeon: want van Israel vielender veel tot hem, als sy sagen, dat de Heere zijn God met hem was.

B.10

Ende sy vergaderden hen te Ierusalem, der derder maent inden vijfthienden Iare des Koninkrijcx Assa,

11

Ende offerden desseluen daechs den Heere vanden roof dien sy ghebracht hadden, seuen hondert ossen, ende seuen duysent schapen.

12

^h Ende sy traden in het Verbondt, dat sy den Heere harer vaderen God sochten, van gantscher herten, ende van gantscher zielen.

h Iosue 24.c.25. Nehe. 10.c.29. 4.Reg. 23.a.3.

13

Ende wie den Heere den God Israels, niet sal soecken, die soude steruen, beyde kleyn ende groot, beyde man ende vrouwe.

14

Ende sy swoeren den Heere met luyder stemmen, met duenen, met trompetten ende basuynen.

15

Ende het gantsch Iuda was vrolick ouer den eedt: want sy hadden ghesworen van gantscher herten, ende sy sochten hem van gantschen wille: ende hy liet hem van hen vinden, ende de Heere gaf hen ruste rontom.

16

ⁱ Oock stelde Assa de Koninck, Maecha zijn moeder af vanden ampte, dat sy ghestichtet hadde inden haghen Miplezeth: ⁺ ende Assa roeyde haren Miplezeth wt, ende ^k verstiet hem, ende verbrandde hem inder beke Kidron.

i Reg. 15.b.13.

+ Miplezeth.

k Of, verbrijselde

17

Euenwel de hoochten en werden niet wech ghenomen wt Israel: doch was het herte Assa rechtsinnigh zijn leefdaghe.

18

Ende hy brachte in, wat zijn vader gheheylicht, ende wat hy gheheylicht hadde, int huys Gods, siluer, gout ende vaten.

19

^l Ende daer en was gheenen krijch, tot in het vijf ende dertichste Iaer des Konincrijcx Assa.

l Iudic. 3.b.11.