Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xiiij. Capittel.

1. Assa wert Koninck in Abia stede, 3. sterckt, met wtroeyen aller Afgoderije, zijn lant, 9. ende heeft een wonderbaerlicke ouerwinninghe teghen de Mooren.

A.1

ENde Abia ontsliep met synen vaderen, ⁺ ende sy begroeuen hem in der stadt Dauids: ende Assa zijn sone werdt Koninck in zijn stede: ⁺ tot diens tijden was het lant stil thien Iaer.

+ Abia sterft. 1.Regum 15.a.8.

+ Assa Koninck Iuda. 1.Regum 15.a.8.

2

Ende Assa dede dat recht was: ende den Heere synen God wel beuiel.

3

^a Ende brack af de vreemde Altaren ende de hoochten, ende brack de ^b calumnen, ende hieu de haghen af.

a 2.Para. 17.a.3. ende 31.a.1. ende 33.b.15.

b Of, stantsterckenen, pilaren.

4

Ende liet Iuda segghen, dat sy den Heere den God harer vaderen, sochten, ende deden na de Wet ende gheboden.

5

Ende hy nam wech wt allen steden Iuda, de hoochten ende Afgoden: want het Koninckrijck was stil voor hem.

6

^c Ende hy bouwede vaste steden in Iuda, dewijle dat het lant stil, ende gheenen strijt teghen hem en was, in denseluen Iaren: want de Heere gaf hem ruste.

c 2.Para. 8.a.1. ende 11.a.5.

7

Ende hy sprack tot Iuda: Latet ons dese steden bouwen, ende mueren daer om trecken, ende thorren, poorten ende grendelen, dewijle dat het lant noch voor ons is: want wy hebben den Heere onsen God ghesocht, ende hy heeft ons ruste ghegheuen rontom: also bouweden sy, ende het ghinck gheluckelick van der hant.

8

Ende Assa hadde een heyrkracht, die daer spiessen ende schilden droeghen, ende met den bogen schieten konden, twee hondert ende tachtentich duysent: ende dese waren al te mael stercke Helden.

9

Serah nu de Moor, ⁺ tooch wt tegen hen met eener heyrkracht, duysent mael duysendt, daertoe dry hondert waghenen, ende quamen tot Maresa toe.

+ De Mooren krijgen teghen Iuda.

B.10

Ende Assa tooch wt teghen hem: ende sy rusteden hen ten strijde in het dal Zephatha, by Maresa.

11

Ende Assa riep aen den Heere synen God, ⁺ ende sprack: Heere, by dy en isset gheen onderscheydt, te helpen door veel, ofte daer gheen kracht en is: helpt ons Heere onse God: want wy verlaten ons op dy, ende in dynen Name zijn wy ghekomen, teghen desen hoop: Heere onse God, voor dy en vermach gheen mensche wat.

+ Het ghebet Assa. Iudicum 7.a.1. 1.Samu. 14.a.6. 2.Para. 16.a.8. 1.Macha. 3.b.18.

12

Ende de Heere plaechde de Moorlieden voor Assa ende voor Iuda, dat sy vloden. ⁺

+ Een wonderbaerlicke ouerwinninge Iuda.

13

Ende Assa met tsamen den volcke dat by hem was, iaechde hem na, tot Gerar toe: ende de Moorlieden vielen, dat harer niet een leuendich bleef, maer sy werden gheslaghen voor den Heere, ende voor synen heyrlegher: ende sy brachten gantsch veel roofs daer van.

14

Ende hy sloech alle steden rontom Gerar: want de vreese des Heeren quam ouer hen: ende sy beroofden alle steden, want daer was veel roofs in.

[fol. 149r]

15

Oock sloeghen sy de hutten des vees, ende brachten schapen de volheyt, ende kemelen, ende quamen weder te Ierusalem.