Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat v. Capittel.

1. Salomo laet alle het Geheylichde zijns vaders, 2. ende de Arcke Gods in den Tempel brenghen, 11. de Priesters, Leuiten ende Sangers louen den Heere met sanghe ende spel.

A.1

ENde Salomo ^a brachte daer in, alles wat zijn vader Dauid gheheylicht hadde: namelicken, siluer ende gout, ende allerley ghereetschap, ende leyde het in den schat in den huyse Gods.

a 1.Reg. 7.f.51.

2

^b Doe vergaderde Salomo alle Oudtsten in Israel, alle Hooftlieden der stammen, ende Vorsten der vaders onder den kinderen Israels te Ierusalem, dat sy de Arcke des Verbondts des Heeren, op brochten wt der stadt Dauids, dat is Zion.

b 1.Regum 8.a.1.

3

^c Ende alle man in Israel vergaderde hem totten Koninck op het Feest, ⁺ dat is in der seuender maent.

c 1.Reg. 7.f.51. ende 8.a.1.

+ De Arcke wert gebracht inden Tempel.

4

Ende alle Oudtsten Israels quamen: ende de Leuiten namen de Arcke op,

5

Ende brachtense op met tsamen der Hutten des ^d† Bescheyts, ende alle het heylighe gereetschap, dat in der Hutten was: ende de Priesters ende de Leuiten brachtense mede op.

d† and. Tuyghenisses of Stifts,

6

Nu de Koninck Salomo, ende de gantsche Ghemeynte Israels, tot hem vergadert voor der Arcken, offerden schapen ende ossen, so vele, datse niemandt tellen noch rekenen en konde.

7

Also brachten de Priesters, de Arcke des Verbonts des Heeren aen haer stede in den ^e Choor des huys, in het Allerheylichste, onder de vleughelen der Cherubim.

e of, de Bescheytplaetse,

8

Dat de Cherubim hare vleughelen wtbreydeden, ouer de stede der Arcken, ende de Cherubim bedeckeden de Arcke ende hare handtboomen van bouen neder.

9

De hantboomen nu waren so lanck, datmen hare knoopen sach, verre van der Arcken voor den Choor, ghelijckewel daer buyten en sachmense niet: ende sy was aldaer tot op desen dach.

B.10

^f Ende daer en was niet in der Arcken, sonder alleen de twee tafelen, die Mose in Horeb daer in geleyt hadde, doe de Heere een Verbont maeckte met den kinderen Israels, als sy wt Egypten toghen.

f 1.Regum 8.a.9 Hebr. 9.a.4.

11

Ende doe de Priesters wtginghen wt den Heyligen, (want alle Priesters die voorhanden waren, heylichden hen, dat oock de ordeningen niet ghehouden en werden.)

12

Ende de Leuiten met allen die onder Assaph, Heman, Iedithun, ende haren kinderen ende broederen waren, bekleedt met lijnwaet, songen met cymbalen, psalteren ende harpen, ende stonden teghent Oosten des Altaers, ende by hen hondert ende twintich Priesters, die met trompetten bliesen.

13

Ende het was, euen als ware het alleen een, die daer trompettede ende songhe, als hoordemen een stemme, te louen ende te dancken den Heere: ende doe hem de stemme verhief van den trompetten, cymbalen ende anderen snarenspelen, ende van den loue des Heeren: Dat hy goedich is, ende zijn barmherticheydt eewich duert: doe wert het huys des Heeren veruult met eener wolcken,

14

Dat de Priesters niet staen en konden te dienen ^g† om der wolcken: want de heerlicheydt des Heeren, veruulde het huys Gods.

g† and. door een Neuel: