Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iiij. Capittel.

1. Des Tempels ghereetschap ende vaten.

A.1

HY maecte oock eenen metalen Altaer, ⁺ twintich ellen lanck ende breet, ende thien ellen hooch.

+ Metalen Altaer

2

^a Ende hy maeckte een ghegoten zee, ⁺ thien ellen wijdt, van eenen randt tot aen den anderen rontom, ende vijf ellen hooch: ende een mate van dertich ellen, die mochtse rontom begrijpen,

a 1.Reg. 7.c.23.

+ Gegoten zee.

3

Ende ossenbeelden waren onder ^* hem rontom: ^b† ende daer waren twee rijen knoopen rontom de zee, (die thien ellen wijdt was), die daer mede aenghegoten waren.

* te weten de zee, na sommiger wtleggen eenen ketel

b† And. thien aen elcker ellen, die gingen met twee rijen rontom de zee, ende waren daer mede aengegoten.

4

Ende sy stont also op den twaelf ossen: dat de dry gekeert waren teghent Noorden, dry tegent Westen, dry teghent Zuyden, dry teghent Oosten: ende de zee bouen op hen, ende alle haer achter deel, was inwaerts ghekeert.

5

Haer dickte was een handtbreedt, ende haren randt was als eens bekers randt, ende een opghegaen roose: ende daer ghinck in dry duysent Bath.

6

Ende hy maeckte thien ketels: ⁺ dier stelde hy vijue ter rechter, ende vijue ter slincker zijden: daer in te wasschen, wat ten brandtoffer behoort, dat sy het daer in stieten: de zee nu, dat hen de Priesters daer in wiesschen.

+ Thien ketels. 1.Regum 7.d.38.

7

Hy maeckte oock thien gulden kandelaers, ⁺ als sy zijn souden, ende steldese in den Tempel, vijue ter rechter, ende vijue ter slincker zijden.

+ Thien gulden kandelaers.

8

Ende maeckte thien disschen, ⁺ ende steldese in den Tempel, vijue ter rechter, ende vijue ter slincker zijden: ende maeckte hondert gulden beckens.

+ Thien disschen of tafelen.

9

Hy maecte oock eenen hof voor de Priesters, ⁺ ende een groot schrenckwerck, ende deuren in dat schrenckwerck, ende ouertooch de deuren met metael.

+ Hof.

B.10

Ende stelde de zee op den rechten hoeck teghent Oosten na den Zuydenwaert.

11

Ende Huram maeckte ^c de metalen potten, schoeffelen ende beckens: also volbracht Huram den arbeyt, dien hy den Koninck Salomo dede aen den huyse Gods:

c of, eerin potten

12

Namelicken, de twee calumnen met den buycken ende knoopen, bouen op beyden calumnen, ende beyde gewonden reepen te bedecken beyde buycken ende knoopen, bouen op de calumnen.

13

Ende de vier hondert granaetappelen, aen den beyden ghewonden reepen, twee rijen granaetappelen aen eenen yeghelicken reepe, te bedecken beyde buycken ende knoopen, die bouen op de calumnen waren.

[fol. 145v]

14

Oock maeckte hy de ghestoelten, ⁺ ende de ketelen op den ghestoelten,

+ Ghestoelten.

15

Ende een zee, ende twaelf ossen daer onder.

16

Daertoe metalen potten, schoeffelen, krauwelen, ende alle hare vaten, maeckte Huram Abif den Koninck Salomo, ten huyse des Heeren wt den louteren metael.

17

In der ^d† streke der Iordanen lietse de Koninck gieten, in ^e† dicker Aerde tusschen Suchoth ende Zaredatha.

d† And. euene

e† and. kleyigher

18

Ende Salomo maeckte alle deser vaten gantsch vele, also datmen des metaels ghewicht niet weten en konde.

19

^f Ende Salomo maeckte alle de ghereetschap ten huyse Gods, namelicken, den gulden Altaer, de disschen ende Thoonbrooden daer op.

f 1.Reg. 7.e.48.

C.20

De kandelaers met haren lampen van louteren goude, dat sy brandden voor den ^g Choore, als het behoort.

g Of, Bescheytplaetse,

21

Ende de bloemen aen den lampen, ende de snutters waren gulden, dat was al te mael dicht gout.

22

Daertoe de messen, beckens, lepelen ende nappen waren louter gout: ende den inganck, ende syne deuren binnen tot den Allerheylichsten, ende de deuren aen den huyse des Tempels, waren ^h† gulden: also wert alle arbeyt volbracht, dat Salomo dede aen den huyse des Heeren.

h† And. gulden, Cap. v. also wert alle etce. des Heeren ende Salomo etc.