Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xiiij. Capittel.

1. Hiram schickt Dauid hout ende wercklieden, een huys te bouwen. 3. Dauid krijcht by veel wijuen vele kinderen, 8. de Philisteen worden van hem met rade, 14. ende hulpe Gods tweemael gheslaghen.

A.1

ENde ^a Hiram de Koninck te Tyro, ⁺ sandt boden tot Dauid, ende Cederen hout, metsers ende timmerlieden, dat sy hem een huys bouweden.

a 2.Sam. 5.b.11.

+ Hiram.

2

Ende Dauid merckte dat hem de Heere ten Koninck ouer Israel ^b beuesticht hadde: want zijn Koninckrijck klam op, om zijns volcx Israels wille.

b Of, stadtgrijpich ghemaeckt.

3

Ende Dauid nam noch meer wijuen te Ierusalem, ende genereerde noch meer sonen ende dochteren.

4

Ende die hem te Ierusalem geboren werden, ⁺ die hieten also: Sammua, Sobab, Nathan, Salomo,

+ Kinderen Dauids te Ierusalem gheboren.

5

Iebehar, Elisua, Elipalet,

6

Noga, Nephegh, Iaphia,

7

Elisamma, BaalIada, Eliphalet.

8

^c Ende doe de Philisteen hoorden, dat Dauid ten Koninck ghesalft was ouer het gantsche Israel, toghen sy alle op, Dauid te soecken: doe dat Dauid hoorde, tooch hy wt teghen hen.

c 2.Sam. 5.b.17.

9

Ende de Philisteen quamen ende leyden hen neder inder leechten Rephaim.

B.10

Dauid dan vraechde God, ende sprack: Sal ick op trecken tegen de Philisteen, ende wiltuse in mijn hant gheuen? De Heere sprack tot hem: Treckt op, ick hebse in dijn hant ghegheuen.

11

Ende doe sy op toghen na ^d BaalPrazim, sloechse Dauid aldaer: ende Dauid sprack: God heeft mijn vyanden door mijn hant, van malcanderen ghescheurt, gelijkck als hem het water van malcanderen scheurt, daerom hieten sy die stede BaalPrazim.

d Baal heet een huys, weert oft man: Perez heet een scheure of vackeel. Daeromme moet dese stede BaalPrazim heeten, dewijle dat de Philisteen daer verstroyt ende van malcanderen ghescheurt zijn.

12

Ende sy lieten hare Goden aldaer: ^e doe hietse Dauid met vuere verbranden.

e Deuter. 7.a.

13

^f Nu de Philisteen maeckten hen daer weder aen, ende leyden hen neder inder leechten.

f 2.Sam. 5.c.22.

14

Ende Dauid vraechde God noch eens: ende God sprack tot hem: Du en salt niet op trecken, achter hen henen, maer gheeft dy van hen, dat du aen hen komest tegen de ^g† Moerbezienboomen ouer.

g† And. Peerboomen

15

Wanneer du dan hooren salt, het ruysschen bouen op de Moerbezienboomen henen gaen, so koemt wt ten strijde, want God is dan voor dy wtghetoghen, te slaen der Philisteen heyr.

16

Ende Dauid dede als hem God gheboden hadde, ende sy sloeghen het heyr der Philisteen, van Gibeon aen tot Gaser toe.

17

Ende Dauids naem breydde hem wt in allen landen: ende de Heere liet zijn vreese ouer alle Heydenen komen.