Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xiii. Capittel.

1.Dauid laet de ouerghebleuen gheslachten roepen, 5. ende de Arcke Gods van Kiriath Iearim halen.

A.1

ENde Dauid hielt eenen raet ^a met den Hooftlieden ouer duysent ende ouer hondert, ende met allen Vorsten. ⁺

a 2.Sam. 6.a.1.

+ Dauid haelt de Arcke Gods.

2

Ende sprack tot der gantscher Ghemeynten Israels: Behaecht het v, ende ist vanden Heere onsen God, so laet ons oueral wt schicken tot den anderen onsen broederen, in allen landen Israels, ende met hen de Priesters ende Leuiten in den steden daer sy voorsteden hebben, dat sy tot ons vergadert werden,

3

Ende laet ons de Arcke onses Gods, weder tot ons halen: ^b want by den tijden Sauls, en vraechden wy niets na haer.

b 1.Sam. 7.a.2.

4

Doe sprack de gantsche Ghemeynte: Men soude also doen, want sulcx behaechde allen volcke wel.

5

^c Also vergaderde Dauid het gantsche Israel, van Sihor Egypti aen tot datmen koemt te Hemath, de Arcke Gods te halen van Kiriath Iearim.

c 2.Sam. 6.a.1.

6

Ende Dauid tooch op met den gantschen Israel tot Kiriath Iearim, die daer leyt in Iuda, dat hy van daer op brochte, de Arcke Gods des Heeren, die op den Cherubim sit, daer den Name aengheroepen wert.

7

Ende sy lieten de Arcke Gods, op eenen nieuwen waghen voeren, wt den huyse AbiNadab: Vsa nu ende zijn broeder dreuen den waghen.

8

Dauid nu ende het gantsche Israel, speelden voor God, wt gantscher macht, met lieden, met harpen, met Psalteren, met tamborijnen, met cymbalen, ende met basuynen.

9

^d Doe sy nu quamen op de pleyne Chidon, reckte Vsa zijn hant wt, ⁺ de Arcke te houden, want de runderen traden ter zijden wt.

d 2.Sam. 6.a.6.

+ 1.Paralip. 16.a.1.

B.10

Doe vertoornde de grimmicheyt des Heeren ouer Vsa, ende sloech hem, dat hy zijn hant hadde wtgherect aen de Arcke, ^e dat hy aldaer sterf voor Gode.

e Num. 4.b.15.19

11

Doe wert Dauid bedroeft, dat de Heere een sulcke scheure dede aen Vsa, ⁺ ende hiet de stede PerezVsa tot op desen dach.

+ Perez Vsa.

12

Ende Dauid vreesde hem voor God dies daechs, ende sprack: Hoe sal ick de Arcke Gods tot my brengen?

13

Daerom en liet hy de Arcke Gods niet tot hem brenghen in de stadt Dauids, ⁺ maer keerdese henen int huys Obed Edom des Githiters.

+ ObedEdom.

14

Also bleef de Arcke Gods by Obed Edom in synen huyse, dry maenden lanck: ende de Heere seghende het huys Obed Edom, ende alles wat hy hadde.