Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xii. Capittel.

1. Dauids krijchsvolck dat te Ziklag tot hem koemt, 23. het ghetal des krijchsvolcx, dat tot Dauid te Hebron ghecomen is.

A.1

OOck quamen dese tot Dauid te Ziklag, ^{+ a} doe hy noch ^b besloten was voor Saul den sone Kis: ende sy waren oock onder de Helden die ten strijde holpen,

+ Veel krijchsvolck koemt tot Dauid te Ziklah.

a 1.Sam. 27.a.6.

b Dat is, verborgen

2

Ende met boghen gheschickt waren tot beyden handen, op steenen, op pijlen, ende boghen: vanden broederen Sauls, die tot BenIamin waren,

3

De voorneemste Ahieser ende Ioas, de kinderen Samaia des Gibeathiters, Iesiel ende Pelet de kinderen Asmaueth, Barachu ende Iehu de Anthothiter:

4

Iesmaia de Gibeoniter, geweldich onder dertighen, ende ouer dertich: Ieremia, Iahesiel, Iohanon, Iosabad de Gederathiter.

5

Eleusai, Ierimoth, Bealia, Samaria, SaphatIa de Harophiter.

6

Elkana, Iesija, Asareel, Ioeser, Iasabeam, de Korhiter,

7

Ioela ende Sabadia, de kinderen Ieroham van ^c† Gedor.

c† And. Gedud Krijchslieden die tot Dauid ghekomen zijn wt Israel.

8

Vanden Gadditeren scheydden hen wt tot Dauid in den borcht inder woestijne, stercke Helden ende krijchslieden, die schildt ende spiessen voerden, ende haer aengesichte als der leeuwen, ende snel als de rheen op de berghen.

9

De eerste Eser, de ander ObadIa, de derde Eliab,

B.10

De vierde Masmanna, de vijfste Ieremia,

11

De seste Athai, de seuende Eliel,

12

De achtste Iohanan, de neghende Elsabad,

13

De thiende Ieremia, de elfste Machbanai,

14

Dese waren vanden kinderen Gad, Hoofden inden heyre, de kleynste ouer hondert, ende de grootste ouer duysent.

15

Dese zijn het, die ouer de Iordane ghingen in der eerster maent, doe sy vol was aen beyde Oeueren, ^d† dat alle leechten effen waren, beyde teghent Oosten ende teghent Westen.

d† And. ende veriaechden alle, so in leechten woonden, beyde, etc.

16

Ende daer quamen oock sommighe vanden kinderen BenIamin ende Iuda, tot der borcht Dauids.

17

Ende Dauid ginck tot hen wt, ende antwoordde, ende sprack tot hen: So ghy in vreden tot my koemt, ende my te helpen, so sal mijn herte met v zijn: so ghy daerenteghen koemt op list, ende my teghen te zijn, so doch gheen ^e† onbillicheyt aen my en is, so sie de God onser vaderen haer in, ende straffe het.

e† And. moetwil

18

Nu den Gheest tooch aen Amasai, den Hooftman onder dertighen, [ende sprack:] Dyne zijn wy Dauid, ende met dy houden wy het, du sone Isai: vrede, vrede zy met dy, vrede zy met dynen helpers, want dijn God helpt dy: doe namse Dauid aen, ende steldese tot Hoofden ouer de krijchslieden.

19

Ende van Manasse vielen sommige tot Dauid, doe hy quam met den Philisteen teghen Saul ten strijde, ende en halp hen niet, ^f want de Vorsten der Philisteen, lieten hem met rade van hen, ende spraken: Wanneer hy tot synen heere Saul viel, so mochtet ons onsen hals kosten.

f 1.Sam. 29.a.4.

C.20

^g Doe hy nu na Ziklag tooch, vielen tot hem van Manasse, Adna, Iosabad, Iediael, Michael, Iosabad, Elihu, Zilthai, Hoofden ouer duysent in Manasse.

g 1.Sam. 30.a.1.

21

Ende sy holpen Dauid teghen de krijchslieden, want sy waren altemael redelicke Helden, ende werden Hooftlieden ouer het heyr.

22

Oock quamen alle daghe sommighe tot Dauid hem te helpen, tot dat het een groot heyr wert, ghelijck als een heyr Gods.

23

Ende dit is het ghetal der Hoofden gherust ten heyre, ^{+ h} die tot Dauid te Hebron quamen, het Koninckrijck Sauls tot hem te wenden, na den woorde des Heeren.

+ Het ghetal des volcx, dat tot Dauid te Hebron gekomen is

h 2.Sam. 5.a.1.

24

Der kinderen Iuda, die schilden ende spiessen droeghen, waren ses duysent, ende achthondert gherustet ten heyre.

25

Der kinderen Simeon redelicke Helden ten heyre, seuen duysent ende hondert.

26

Der kinderen Leui, vier duysent ende ses hondert.

27

Ende Ioiada de Vorst onder dien van Aaron, met dry duysent ende seuen hondert.

28

Zadok de Ionghelinck, een redelick Heldt, met zijns vaders huys, twee ende twintich Ouersten.

29

Der kinderen BenIamin Sauls broederen, dry duysent: want op die tijt hieldent harer noch vele met den huyse Sauls.

D.30

De kinderen Ephraim, twintich duysent, ende acht hondert, redelicke Helden, ende beroemde mannen, inden huyse harer vaderen.

31

Des haluen stamme Manasse, achtien duysent, die by namen ghenoemt werden, dat sy quamen ende maecten Dauid ten Koninck.

32

Der kinderen Isaschar, die ⁱ verstandich waren, ende rieden wat Israel op elcke tijt doen soude, twee hondert Hooftlieden, ende alle hare broeders volchden hare woorden.

i Dat is, krijchverstandich.

33

Van Sebulon, die int heyr toghen ten strijde, gherustet met allerley wapenen ten strijde, vijftich duysent, hen in de ordeninghe te schicken eendrachtelicken.

34

Van Naphtali, duysent Hooftlieden, ende met hen die schilden ende spiessen voerden, seuen ende dertich duysent.

35

Van Dan ten strijde gerustet, acht ende twintich duysent, ses hondert.

[fol. 139r]

36

Van Asser, die int heyr toghen gherustet ten strijde, veertich duysent.

37

Van ghene zijde der Iordanen, vanden Rubeniteren, Gadditeren, ende den haluen stamme Manasse, met alderley wapen ten strijde, hondert ende twintich duysent.

38

Alle dese krijchslieden, het heyr te ordineren, ^k quamen van gantscher herten tot Hebron, Dauid ten Koninck te maken ouer gantsch Israel: oock was alle het ander Israel eens herten, datmen Dauid ten Koninck maeckte.

k 2.Sam. 5.a.1.

39

Ende waren aldaer by Dauid dry daghen, aten ende droncken: want haer broeders hadden voor hen wat bereyt.

40

Oock die de naeste rontom waren, tot aen Isaschar, Sebulon ende Naphtali, die brachten broot op ezelen, kemelen, muylen ende runderen, te eten, meel, vijghen, rosijnen, wijn, olie, runderen ende schapen planteyt: want daer was een blijschap in Israel.