Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxi. Capittel.

1. Manasse sett weder in allerley Afgoderie, 10. des Heeren Propheten propheteren teghen Ierusalem ende Iuda, 16. Manasse vergiet veel onschuldich bloedts, 18. zijn sone Amon, die na hem op synen weghe wandelt, 23. werdt van synen eyghen knechten omghebracht.

A.1

MAnasse was ^a twaelf Iaer oudt, ⁺ doe hy Koninck werdt, ende regeerde vijf ende vijftich Iaer te Ierusalem: zijn moeder hiet Hephziba.

a 2.Para. 33.a.1.

+ Manasse 55. Iaer Koninc in Iuda.

2

Ende hy dede dat den Heere qualick beuiel, na den grouwel der Heydenen, die de Heere voor den kinderen Israels verdreuen hadde.

3

^b Ende verkeerde hem, ende bouwede de hoochten, die zijn vader Hiskia hadde omghebracht, ende richtede Baals Altaer op, ende maeckte ^c haghen, ghelijck als Ahab de Koninck Israels gedaen hadde, ende badt aen allerley heyr aen den Hemel, ende diende hen.

b 1.Reg. 11.a.7. 2.Reg. 18.a.4.

c Of, lustwouden

4

Ende bouwede Altaren in den huyse des Heeren, daer de Heere van gheseyt hadde: ^d Ick wil mynen Name te Ierusalem setten.

d 1.Reg. 8.c.29. 2.Para. 6.a.6. Ierem. 32.d.34.

5

^e Ende hy bouwede allen heyr aen den Hemel Altaren, in beyden houen aen den huyse des Heeren.

e 2.Reg. 23.b.12.

6

^f Ende liet synen sone door het vyer gaen, ende achtede op vogelgeschrey ende teeckenen, ende hieldt waersegghers ende teeckenbedieders, ende dede des veel, dat den Heere qualick beuiel, daer hy hem mede vertoornde.

f Leuit. 20.c.27. Deute. 18.b.10. 2.Reg. 16.a.3.

7

Hy settede oock eenen Haghenafgod, dien hy ghemaeckt hadde, in het huys, ^g van welcken de Heere tot Dauid ende tot Salomo synen sone gheseydt hadde: In desen huyse ende te Ierusalem, die ick verkoren hebbe, wt allen stammen Israels, wil ick mynen Name setten eewichlick.

g 2.Sam. 7.b.10 1.Reg. 8.b.16. ende 9.a.3.

8

Ende en wil den voet Israels niet meer beweghen laten, van den lande, dat ick haren vaderen ghegheuen hebbe: so doch, so sy houden ende doen na allen, dat ick gheboden hebbe, ende na alle de Wet, die hen mijn knecht Mose geboden heeft.

9

Doch sy en hoorden niet, maer Manasse verleyddese, dat sy ergher deden dan de Heydenen, die de Heere voor den kinderen Israels verdelghet hadde.

B.10

Doe sprack de Heere door syne knechten de Propheten, ende seyde:

11

Daerom dat Manasse de Koninck Iuda, ⁺ heeft dese grouwelen ghedaen, die ergher zijn, dan alle grouwelen, die de Amoriten ghedaen hebben, die voor hem gheweest zijn, ende heeft oock Iuda sondighen ghemaeckt met synen Afgoden,

+ Propheteringe teghen Ierusalem ende Iuda. Ierem. 15.a.4. 2.Para. 33.a.9.

12

Daerom spreeckt de Heere de God Israels also: ^h Siet, ick wil ongheluck ouer Ierusalem ende Iuda brengen, dat wie het hooren sal, dien sullen syne beyde ooren klincken.

h Ierem. 19.a.3.

13

Ende wil ouer Ierusalem het meetsnoer Samaria trecken, ende het ghewichte des huys Ahabs, ende wil Ierusalem ^i† wtghieten, ghelijck alsmen vaten wtgiet, ende wilse omstorten.

i† And. wtuagen, ghelijck alsmen een schotel wtuaecht, ende weluetse daer na om.

14

Ende ick wil sommighe mijns erfdeels ouerblijuen laten, ende hen gheuen in de handen harer vyanden, dat sy eenen roof ende plucken worden, alle harer vyanden.

15

Daerom dat sy ghedaen hebben, dat my qualick beualt, ende hebben my vertoornt, van dien daghe aen, doe hare vaders wt Egypten ghetoghen zijn, tot op desen dach.

16

Ooc vergoot Manasse gantsch veel onschuldich bloedts, ⁺ tot dat Ierusalem hier ende daer vol wert: behaluen de sonde, daer hy Iuda mede sondighen maeckte, dat sy deden, dat den Heere qualick beuiel.

+ Onschuldich bloet vergoten door Manasse

17

Wat nu meer van Manasse te segghen is, ende alles wat hy ghedaen heeft, ende syne sonde die hy dede, siet, dat is gheschreuen in der Chronica der Koninghen Iuda.

[fol. 132v]

18

Ende Manasse ontsliep met synen vaderen, ende wert begrauen in den hof aen synen huyse, namelick, in den hof Vsa: ende zijn sone Amon wert Koninck in zijn stede.

19

Twee ende twintich Iaer was Amon oudt, doe hy Koninck wert, ⁺ ende regeerde twee Iaer te Ierusalem: zijn moeder hiet Mesulemeth, een dochter Hazur van Iatba.

+ Amon Koninc Iuda twee Iaer lanck. 2.Para. 33.c.20.

C.20

Ende dede dat den Heere qualick beuiel, ghelijck als zijn vader Manasse ghedaen hadde.

21

Ende wandelde in allen weghe, die zijn vader ghewandelt hadde, ende diende de Afgoden, die zijn vader ghedient hadde, ende badtse aen.

22

Ende verliet den Heere syner vaderen God, ende en wandelde niet in den weghe des Heeren.

23

Ende syne knechten maeckten een verbondt teghen Amon, ende doodden den Koninck in synen huyse.

24

Doch het volc in den lande sloech alle de ghene, die dat verbondt ghemaeckt hadden, teghen den Koninck Amon: ende het volck in den lande maeckte Iosia synen sone, ten Koninck in zijn stede.

25

Wat nu Amon meer ghedaen heeft, siet, dat is gheschreuen in der Chronica der Koninghen Iuda.

26

Ende men begroef hem in zijn graf, in den hof Vsia, ende zijn sone Iosia werdt Koninck in zijn stede.