Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat v. Capittel.

1. Naeman van Syrien koemt door aengheuen eener Hebreuscher deerne, ende met Konincklicke brieuen, tot den Koninck Israels, 8. werdt door Elisa van syner malaetscheydt ghereynicht, 15. ende versaeckt met warachtigen ghelooue, allen valschen Godsdienst, 20. Gehasi ergherlicke ghiericheyt, werdt met Naemans malaetscheydt ghestraft.

A.1

NAEman de Veldthooftman des Konincks te Syrien, ⁺ was een treflick man voor synen heere, ende groot aengesien: want door hem gaf de Heere Heyl in Syrien, ende hy was een gheweldich man, ende malaetsch.

+ Elisa maeckt Naeman reyn van der malaetscheyt.

2

De ^a† krijchslieden nu in Syrien waren hier wt gheuallen, ende hadden een kleyn deerne wech gheuoert, wt den lande Israels, die was in den dienst des wijfs Naemans.

a† And. rot benden

3

Die sprack tot haerder vrouwen: Och dat mijn heere by den Propheet te Samaria ware, die soude hem van syner malaetscheyt los maken.

4

Doe ghinck hy in tot synen heere, ende seyde het hem, ende sprack: So ende so heeft de deerne wt den lande Israls ghesproken.

5

De Koninck te Syrien sprack: So treckt henen, ick wil den Koninck Israels eenen brief schrijuen. Ende hy tooch henen, ende nam met hem thien Centener siluers, ende ses duysendt gulden, ende thien ^b vierkleederen.

b Heb. Wisselkleederen, dat is, die men alleen ter eeren, ende int openbaer droech, ende in den huys veranderde.

6

Ende brachte den brief den Koninck Israels, die luydde also: Wanneer desen brief tot dy koemt, so weet, ick hebbe mynen knecht Naeman tot dy ghesonden, dat du hem van syner malaetscheyt los makest.

7

Ende doe de Koninck Israels den brief las, scheurde hy syne kleederen, ende sprack: ^c Ben ick dan God, dat ick dooden ende leuendich maken konne, dat hy tot my schicket, dat ick den man van syner malaetscheyt los make? Merckt ende siet, hoe soeckt hy oorsake tot my.

c Deute. 32.d.39. 1.Sam. 2.a.6. Sapient. 16.b.13.

8

Doe dat Elisa de man Gods hoorde, dat de Koninck Israels syne kleederen verscheurt hadde, sandt hy tot hem, ende liet hem seggen: Waerom hebstu dyne kleederen verscheurt? Laet hem tot my komen, dat hy verneme, dat daer een Propheet in Israel is.

9

Also quam Naeman met peerden ende waghenen, ende hielt voor der deure aen den huyse Elisa.

B.10

Doe sandt Elisa eenen bode tot hem, ende liet hem segghen: Gaet henen, ende wascht dy seuenmael in der Iordane, so sal dy dijn vleesch weder ghegheuen, ende reyn worden.

11

Doe wert Naeman toornich, ende tooch wech, ende sprack: Ick meynde, hy soude tot my wt komen, ende herwaerts gaen, ende den Name des Heeren zijns Gods aenroepen, ende met syner handt ouer de stede strijcken, ende de malaetscheyt also verdrijuen.

12

Sijn niet de wateren Amana ende Pharphar te Damascon, beter dan alle wateren in Israel, dat ick my daer in wiessche, ende reyn worde? ende keerde hem, ende tooch wech met toorne.

13

Doe maeckten hen syne knechten tot hem, ende spraken met hem, ende seyden: Lieue vader, wanneer dy de Propheet wat groots hadde gheheeten, soudestu het niet doen? hoe veel meer, so hy tot dy seydt: Wascht dy, so werstu reyn?

14

^d Doe klam hy af, ende wiesch hem seuenmael in de Iordane, als de man Gods gheseydt hadde: ende zijn vleesch wert hem weder ghegeuen, ghelijck als een vleesch eens ionghen ionghelincks, ende wert reyn.

d Luce 4.c.27.

15

Ende hy keerde wederom tot den man Gods, met synen gantschen heyre: ende doe hy in quam, tradt hy voor hem, ende sprack: Siet, ick weet het, dat daer gheen God en is in allen landen, sonder alleen in Israel: so neemt nu den seghen van dynen knecht.

16

Hy sprack daerenteghen: ^{+ e} So warachtich als de Heere leeft, voor dien ick sta, ick en neemts niet, ende hy noodichde hem, dat hy het name, doch hy en woude niet.

+ Elisa verachtet alle gauen ende gheschencken Naemans.

e 1.Reg. 13.a.8. Danie. 5.b.17.

17

Doe sprack Naeman: Mochte dan dynen knecht niet ghegheuen worden, eenen last deser Aerden, so veel als twee Muylen draghen? want dijn knecht en wil niet meer andere Goden offeren, ende brandtoffer doen, sonder den Heere:

18

Dat de Heere dynen knecht daer in woude ghenadich zijn, so ick aenbede inden huyse Rimmon, wanneer mijn heere in het huys Rimmon gaet, aldaer aen te bidden, ende hy hem aen mijn ^f hant lenet.

f Dat is op Hebreusch gesproken, ghelijck als wy Duytschen seggen: Hy is my ter hant, hy is by my, doet ende richtet wt, wat ick hem beuele, ende ick verlate my op hem.

19

Hy sprack tot hem: Treckt henen met vreden: ende als hy een velt weechs van hem wech ghetoghen was op den lande,

C.20

Ghedachte Gehasi den ionghen Elisa des mans Gods: Siet, mijn heere heeft deses Syriers Naeman verschoont, dat hy niets van hem ghenomen en heeft, dat hy ghebracht heeft: So warachtich als de Heere leeft, ick wil hem naloopen, ⁺ ende wat van hem nemen.

+ Merckt de giericheyt Gehasi.

21

Also iaechde Gehasi den Naeman na: Ende doe Naeman sach, dat hy hem naliep, klam hy van den wagen, hem teghen, ende sprack: Gaet het recht toe?

22

Hy sprack: Ia, Doch mijn heere heeft my hier ghesonden, ende laet dy segghen: Siet, als nu zijn twee ionghers van den kinderen der Propheten tot my ghekomen, van den gheberchte Ephraim: Gheeft hen eenen Centener siluers, ende twee vier kleederen.

23

Naeman sprac: Lieue, neemt twee Centeners, ende hy noodichde hem, ende bandt twee Centener siluers in twee buydels, ende twee vierkleederen, ende dede het synen twee ionghers, die droeghent voor hem henen.

24

Ende doe hy quam ^g† tot Ophel, nam hy het van haren handen, ende leyde het bezijden int huys, ende liet de mannen gaen.

g† an. int doncker

25

Ende doe sy wech waren, tradt hy voor synen heere: Ende Elisa sprack tot hem: Van waer Gehasi? Hy sprack: Dijn knecht is noch hier noch daer ghegaen.

26

Hy sprack daerentegen tot hem: ^h Wandelde niet mijn herte, doe de man omkeerde van synen wagen, dy tegen? Was dat den tijdt, siluer ende kleederen te nemen, olyegarden, wijnberghen, schapen, runderen, knechten ende maechden?

h Dat is, hebstu nerghens henen gewandelt, hoe gaet het dan toe, dat mijn herte wandelde, ende was by den waghen etcet.

[fol. 125v]

27

Nu de malaetscheyt Naemans sal dy aenhanghen, ende dynen zade eewichlick: ⁱ Doe ghinck hy van hem wt malaetsch, als sneeu.

i Para. 26.b.19.