Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xv. Capittel.

1. Abtam regeert ouer Iuda, 8. ende na hem Assa, 16. die wert bekrijcht van Baesa, 18. ontset van Benhadad, 23. ende sterft. 25. Baesa slaet den Nadab, 29. daertoe het gantsche huys Ierobeams, 33. ende wert Koninck ouer Israel.

A.1

INden ^a achthienden Iare des Konincx Ierobeam des soons Nebat, ⁺ wert Abiam Koninck in Iuda.

a 2.Paral. 13.a.1.

+ Abiam Koninck in Iuda, regeert 3. Iaer.

2

Ende regeerde dry Iaer te Ierusalem: zijn moeder hiet Maecha, een dochter Abisalom.

3

Ende hy wandelde in alle sonden zijns vaders, die hy voor hem ghedaen hadde, ende zijn herte en was niet oprecht aenden Heere synen God, als het herte zijns vaders Dauid.

4

^b Want om Dauids wille gaf hem de Heere sijnen God een licht te Ierusalem, dat hy synen sone na hem verweckede ende onderhiel te Ierusalem:

b 1.Reg. 11.d.36.

5

Daerom, dat Dauid ghedaen hadde, wat den Heere wel beuiel, ende niet gheweken en was van allen dat hy hem gheboot, zijn leefdaghe: behaluen alleen in ^c den handel met Vria den Hethiter.

c 1.Sam. 11.a.4. b.17. ende 12.a.9.

6

Daer was dan eenen krijch tusschen Rehabeam ende Ierobeam zijn leefdaghe.

7

Wat nu meer van Abiam te segghen is, ende alles wat hy ghedaen heeft, siet, dat is gheschreuen ^d inder Chronica der Koningen Iuda: daer was oock krijch tusschen Abiam ende Ierobeam.

d 2.Paral. 13.a.1.

8

Ende Abiam ontsliep met synen vaderen, ⁺ ende sy begroeuen hem in der stadt Dauids: ^e ende Assa zijn sone wert Koninck in zijn stede.

+ Assa Koninck in Iuda, regeert 41. Iaer.

e 2.Paral. 14.a.1.

[fol. 119v]

9

Int twintichste Iaer des Konincx Ierobeams ouer Israel, wert Assa Koninck in Iuda,

B.10

Ende regeerde een ende veertich Iaer te Ierusalem: zijn ^f moeder hiet Maecha een dochter Abisalom.

f Is hier, grootmoeder, ghelijck als Dauid vader voor grootuader dickmaels genoemt wort.

11

Ende Assa dede dat den Heere wel beuiel, als zijn vader Dauid.

12

^g Ende verdreef de hoereniagers wt den lande, ende nam wech alle Afgoden die zijn vaders ghemaeckt hadden.

g 1.Reg. 22.e.47.

13

Daertoe settede hy oock zijn moeder Maecha af vanden ampte, dat sy den ^h Miplezeth ghemaeckt hadde inden ⁱ haghen: ende Assa roeyde haren Miplezeth wt, ende verbrandde hem inder beke Kidron.

h Wie die Mtplezeth zy, is onseker: sommige seggen het zy den Afgod Priapus geweest

i Of, lustwouden

14

Euenwel de hoochten en namen sy niet wech: doch was het herte Assa oprecht aenden Heere, zijn leefdaghe.

15

Ende het siluer ende gout, ende vaten, dat zijn vader geheylicht hadde, ende wat geheylicht was ten huyse des Heeren, bracht hy daer weder in.

16

Ende daer was krijch tusschen Assa ende Baesa den Koninck Israels, haer leefdaghe.

17

Baesa de Koninck Israels tooch op teghen Iuda, ⁺ ende bouwede Rama, dat niemant en soude wt ende in trecken, op Assa zijde des Konincx Iuda.

+ Baesa Koninc in Israel. 2.Paralip. 16.a.1.

18

Doe nam Assa alle het siluer ende gout, dat ouerghebleuen was inden schat des huys des Heeren, ende inden schat des huys des Konincx, ende gaf het in syner knechten handen, ende sandtse ^k tot Benhadad den sone Tabrimon, des soons Hesion, den Koninck in Syrien, die te Damasco woonde, ende liet hem segghen:

k 1.Reg. 10.a.1.

19

Daer is een verbont tusschen my ende dy, ende tusschen mynen vader ende dynen vader: daerom schicke ick dy een gheschenck, siluer ende gout, dat du varen latest het verbont, dat du met Baesa den Koninck Israel hebst, dat hy van my af trecke.

C.20

Benhadad hoorde den Koninck Assa, ende sandt zijn Hooftlieden tegen de steden Israels, ende sloech Iion, ende Dan, ende AbelBethMaacha, het gantsche Cinerot ^l† aenden gantschen lande Naphthali.

l† An. Met tsamen

21

Doe dat Baesa hoorde, liet hy af Rama te bouwen, ende tooch weder na Thirza.

22

De Koninck Assa dan, liet wtroepen inden gantschen Iuda: Hier en sal niemant ongestraft blijuen: ende sy namen de steenen ende het hout van Rama wech, daer Baesa mede ghebouwet hadde: ende de Koninck Assa bouwede daer mede, GebaBenIamin, ende Mizpa.

23

Wat nu meer van Assa te segghen is, ende alle zijn macht, ende alles wat hy gedaen heeft, ende de steden die hy gebouwet heeft, siet, dat is gheschreuen in der Chronica der Koninghen Iuda: behaluen dat hy in synen ouderdom aen syne voeten kranck was.

24

Ende Assa ontsliep met synen vaderen, ⁺ ende wert begrauen met synen vaderen inder stadt Dauids zijns vaders: ende Iosaphat zijn sone wert Koninck in zijn stede.

+ Iosaphat Koninck in Iuda. 2.Paralip. 17.a.1.

25

Ende Nadab de sone Ierobeam wert Koninck ouer Israel, ⁺ inden anderen Iare Assa des Konincx Iuda, ende regeerde ouer Israel twee Iaer.

+ Nadab Koninc in Israel, twee Iaer.

26

Ende dede dat den Heere qualick beuiel, ende wandelde inden weghe zijns vaders, ende in syner sonden, daer hy Israel hadde mede sondigen ghemaeckt.

27

Ende Baesa de sone Ahia wt den huyse Isaschar, ⁺ maeckte een verbondt teghen hem, ende sloech hem te Gibethon, die daer was der Philisteen: want Nadab ende het gantsch Israel, belegherden Gibethon.

+ Baesa Koninc in Israel. 2.Reg. 15.b.17.

28

Also doodde hem Baesa inden derden Iare Assa des Konincx Iuda, ende wert Koninck in zijn stede.

29

Als hy nu Koninck was, ⁺ sloech hy het gantsche huys Ierobeams, ende en liet niet ouer dat den adem hadde van Ierobeam, tot dat hy hem verdelchde, ^m na den woorde des Heeren, dat hy ghesproken hadde door synen knecht Ahia van Silo.

+ Ierobeams huys wort wtgheroeyt door Baesa.

m 1.Reg. 14.b.10.14.

D.30

Om der sonden wille Ierobeams, die hy dede, ende Israel daermede sondighen maeckte: met ⁿ verwecken, daer hy den Heere den God Israels, mede vertoornde.

n Of, terghen

31

Wat nu meer van Nadab te segghen is, ende alles wat hy ghemaeckt heeft, siet, dat is gheschreuen inder Chronica der Koningen Israels.

32

Ende daer was krijch tusschen Assa ende Baesa den Koninck Israels, haer leefdaghe.

33

Inden derden Iare Assa des Konincx Iuda, ⁺ wert Baesa de sone Ahia, Koninck ouer het gantsche Israel te Thirza, vier ende twintich Iaer.

+ Baesa is xxiiij. Iaer Koninck ouer Israel.

34

Ende dede dat den Heere qualick beuiel, ende wandelde inden wech Ierobeams, ende in syner sonde, daer hy Israel mede hadde doen sondigen.