Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xiiij. Capittel.

1. Ierobeam schickt wt oorsake zijns krancken soons, zijn wijf aen den Propheet Ahia, 7. die propheteert teghen Ierobeams huys, 12. ende het benoemde teecken 17. koemt, 22. Iuda doet alderley Afgodische grouwelen, 25. Sisak Koninck in Egypten, berooft den Tempel, 29. Rehabeam sterft.

A.1

TE dier tijt was Abia de sone Ierobeam kranck. ⁺

+ Abia Ierobeams sone.

2

Ende Ierobeam sprack tot synen wyue: ^a Maeckt dy op, ende verkleedt dy, dat het niemant en mercke, dat du Ierobeams wijf zijst, ende gaet henen na Silo: ⁺ siet, aldaer is de Propheet Ahia, ^b die my ghesproken heeft, dat ick soude Koninck zijn ouer dit volck.

a 2.Regum. 8.a.8.

+ Ahia.

b 1.Reg. 11.d.31.

3

Ende neemt met dy thien brooden ende koecken, ende een kruycke met honich, ende gaet tot hem, dat hy dy segghe, hoe het den Ionghen gaen sal.

[fol. 119r]

4

Ende Ierobeams wijf dede also, ende maecte haer op, ende ghinck na Silo, ende quam int huys Ahia: Ahia nu en konde niet sien, want zijn ooghen starreden van ouderdom.

5

Doch de Heere sprack tot Ahia: Siet, Ierobeams wijf koemt, dat sy een sake van dy vrage om haren sone, want hy is kranck: so spreect du met haer, so ende so: doe sy nu in quam, stelde sy haer vreemt.

6

Als dan Ahia hoorde, het ruysschen haerder voeten ter deuren in gaen, sprack hy: Koemt hier in du wijf Ierobeams: waerom stelstu dy so vreemt? ick ben tot dy ghesonden een hardt bode.

7

Gaet henen, ⁺ ende segt Ierobeam: So spreect de Heere de God Israels: ^c Ick hebbe dy verheuen wt den volcke, ende ten Vorste ouer mijn volck Israels gheset.

+ Ahia propheteert tegen het huys Ierobeams

c 1.Reg. 12.b.15. ende 16.a.2.

8

Ende hebbe het Koninckrijck van Dauids huyse ghescheurt, ende dy ghegheuen: du dannoch en bist niet gheweest als mijn knecht Dauid, die mijn ghebot hielt, ende wandelde my na van gantscher herten, dat hy dede wat my slechs wel beuiel:

9

Ende hebst quaet ghedaen bouen alle, die voor dy gheweest zijn: bist henen gegaen, ende hebst dy ander Goden ghemaeckt, ende ghegoten beelden, dat du my tot toorne verweckedest, ende hebst my achter dynen rugghe gheworpen.

B.10

^d Daerom siet, ick wil ongheluck ouer het huys Ierobeams voeren, ende wtroeyen aenden Ierobeam, ^e oock dien, die aen de wandt pist, ^f den besloten ende verlaten in Israel: ende wil de nakomelinghen des huys Ierobeams wtuaghen, ghelijck alsmen dreck wt vaecht, tot dat het gantsch met hem wt zy.

d 1.Reg. 15.c.29.

e 1.Sam. 25.c.22. 2.Reg. 9.a.8.

f Dat is, oock de verworpene ende verachtste van zijn gheslachte: want alle mans geslachte, de beste metten slechtsten sullen vernielt worden.

11

^g Wie van Ierobeam sterft inder stadt, die sullen de honden eten: wie daerenteghen op den velde sterft, dien sullen de voghelen des Hemels eten: want de Heere heeft het ghesproken.

g 1.Reg. 10.a.4.

12

So maeckt du dy nu op, ende gaet te huys: ende wanneer dynen voet ter stadt intreedt, so sal het kint steruen.

13

Ende het gantsche Israel sal hem beklaghen, ende sullen hem begrauen: want dese alleen van Ierobeam sal ten graue komen, daerom, dat wat goets aen hem gheuonden is voor den Heere den God Israels inden huyse Ierobeams.

14

^h De Heere dannoch sal hem eenen Koninck ouer Israel verwecken, die sal het huys Ierobeams wtroeyen dies daechs; ⁱ ende wat is nu wtgherichtet?

h 1.Reg. 15.c.29.

i Mimesis. Wanneer dit koemt, so salmen segghen: Wat heeft Ierobeam nu wtghericht?

15

^k Ende de Heere sal Israel slaen, ghelijck als het riet in het water beweecht wort, ende sal Israel wtplucken van desen goeden lande, dat hy haren vaderen ghegheuen heeft, ende salse verstroyen ouer het water: daerom dat sy haer ^l haghen ghemaect hebben, den Heere te vertoornen.

k 2.Reg. 17.b.18.

l Oft, lustwouden

16

Ende sal Israel ouergheuen om Ierobeams sonden wille, die daer ghesondicht heeft, ende heeft Israel sondighen ghemaeckt.

17

Ende Ierobeams wijf maeckte haer op, ghinck henen, ende quam te ^m Thirza: ende doe sy op den dorpel des huys quam, sterf den Ionghen.

m Cantic. 6.a.4.

18

Ende sy begroeuen hem, ende het gantsche Israel beklaechde hem, ⁿ na den woorde des Heeren, dat hy ghesproken hadde door synen knecht Ahia den Propheet.

n 1.Reg. 14.b.13.

19

Wat meer van Ierobeam te segghen is, hoe hy ghekrijcht ende gheregeert heeft, siet, dat is geschreuen in der Chronica der Koningen Israels. ⁺

+ Ierobeam is 22. Iaer Koninck ouer Israel.

C.20

Den tijt nu dat Ierobeam regeerde, zijn twee ende twintich Iaer: ende ontsliep met synen vaderen: ⁺ ende zijn sone Nadab wert Koninck in zijn stede,

+ Nadab Koninc in Israel,

21

So was Rehabeam de sone Salomo, ⁺ Koninc in Iuda: een ende veertich Iaer was Rehabeam oudt, doe hi Koninck wert, ende regeerde seuentien Iaer te Ierusalem, inder stadt die de Heere verkoren hadde wt allen stammen Israels, dat hy synen Name aldaer henen settede: zijn moeder hiet Naema, een Ammonitische.

+ Rehabeam 17. Iaer Koninck in Iuda. 2.Paral. 12.b.13.

22

Ende Iuda dede dat den Heere qualick beuiel, ende verweckten hem tot ijuer, meer dan alles dat hare vaders ghedaen hadden, met haren sonden die sy deden.

23

Want sy bouweden hen hoochten, ^o calumnen ende haghen, op alle hooghe berghen, ende onder alle groene boomen.

o Of, pilaerbeelden ende lustwouden

24

Daer waren oock ^p† hoereiaghers inden lande, ende sy deden alle de grouwelen der Heydenen, die de Heere voor den kinderen Israels verdreuen hadde.

p† And. buggerionghen: scorta mascula

25

Nu inden vijfften Iare des Konincx Rehabeam, ⁺ tooch Sisak de Koninck in Egypten op, teghen Ierusalem,

+ Sisak Koninck in Egypten berooft den Tempel. 2.Paralip. 12.a.2.

26

Ende nam den schat wt den huyse des Heeren, ende wt den huyse des Konincx, ende alles wat daer te nemen was: ende nam alle gulden schilden, ^r die Salomo hadde laten maken.

r 1.Reg. 10.b.16. 2.Paralip. 9.b.15

27

In welcker stede liet de Koninck Rehabeam metalen schilden maken, ende beualse onder de hant der Ouersten Trawanten, die de deure bewaerden aenden huyse des Konincx.

28

Ende so dickwils als de Koninck in het huys des Heeren ghinck, droeghense de Trawanten, ende brachtense weder inder Trawanten kamer.

29

Wat meer van Rehabeam te segghen is, ende alles wat hy ghedaen heeft, siet, dat is gheschreuen inder Chronica der Koninghen Iuda.

D.30

Ende daer was krijch tusschen Rehabeam ende Ierobeam haer leefdaghe.

31

^s Ende Rehabeam ontsliep met synen vaderen, ⁺ ende wert begrauen met synen vaderen inder stadt Dauids, ende zijn moeder hiet Naema, een Ammonitische: ende zijn sone Abiam wert Koninck in zijn stede.

s 2.Paral. 12.b.16.

+ Rehabeam sterft