Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ix. Capittel.

1. God verschijnt ten anderen mael Salomo, 10. die gheeft den Hiram twintich steden, 16. Pharao gheeft syner dochter, Gaser, 20. Salomo maeckt de Cananiters ende andere Heydenen chijnsbaer, 22. pleecht des volcks, ende des Heeren, 26. ende laet gout wt Ophir halen.

A.1

ENde ^a doe Salomo hadde vol gebouwet des Heeren huys, ⁺ ende des Konincks huys, ende alles wat hy begheerde, ende lust hadde te maken,

a 1.Para. 7.b.11.

+ God verschijnt Salomo ten anderen mael.

2

Verscheen hem de Heere ten anderen mael, ^b ghelijck als hy hem verschenen was te Gibeon.

b 1.Reg. 3.a.5.

3

Ende de Heere sprack tot hem: Ick hebbe dijn ghebet ende smeecken ghehoort, dat du voor my ghesmeeckt hebst, ende hebbe dit huys gheheylicht, dat du ghebouwet hebst, dat ick mynen Name aldaer henen sette eewichlick, ende myne ooghen ende mijn herte, sullen daer zijn altoos.

4

Ende so du voor my wandelst, ghelijck als dijn vader Dauid ghewandelt heeft, met een oprecht herte, ende oprechtelick, dat du doest alles wat ick dy gheboden hebbe, ende myne gheboden ende myne rechten houdest:

5

So wil ick ^c beuestighen den Stoel dijns Koninckrijcks ouer Israels, ^d als ick dynen vader Dauid ghesproken hebbe, ende gheseyt: Het en sal niet ontbreken aen eenen man, op den Stoel Israels.

c Ofte, stadtgrijpich maken

d 2.Sa. 7.b.12.16. 1.Para. 22.b.10.

6

^e Werdt ghy v daerenteghen achter van my afwenden, ghy ende uwe kinderen, ende niet houden myne gheboden ende rechten, die ick v voor ghegheuen hebbe, ende gaet henen, ende dient andere Goden, ende bidtse aen:

e Psalm. 89.c.21.

7

So sal ick Israel wtroeyen, van den lande, dat ick hen gegeuen hebbe: ^f ende dat huys dat ick geheylicht hebbe mynen Name, wil ick verlaten van mynen aenghesichte: ^g ende Israel sal een spreeckwoort ende fabel zijn onder allen volcken.

f 2.Reg. 25.a.9. Ierem. 7.b.10. ende 19.a.8.

g Psal. 44.b.14. ende 79.a.4.

8

Ende dat huys sal ^† neder getrocken worden, dat alle die daer voor by gaen, hen sullen ontsetten, ende blasen, ende segghen: ^h Waerom heeft de Heere desen lande, ende desen huyse also ghedaen?

† and. opgheheuen zijn:

h Deute. 29.c.24. Ierem. 22.a.8.

9

So salmen antwoorden: Daerom dat sy den Heere haren God verlaten hebben, die hare vaders wt Egypten lant leydde, ende hebben andere Goden aenghenomen, ende hen aenghebeden: Daerom heeft de Heere alle dit quaedt ouer hen ghebracht.

B.10

ⁱ Doe nu twintich Iaren om waren, in welcken Salomo de twee huysen bouwede, des Heeren huys, ende des Konincx huys,

i 2.Para 8.a.1.

11

^k Daer Hiram de Koninc te Tyro, Salomo Cederboomen, ende Dennenboomen, ende gout na alle zijn begheerte toebrachte: Doe gaf de Koninck Salomo, Hiram, twintich steden in den lande Galilea.

k 1.Reg. 5.a.7.

12

Ende Hiram tooch wt van Tyro, de steden te besien, die hem Salomo ghegheuen hadde, ende sy en behaechden hem niet,

13

Ende sprack: Wat zijn dat voor steden, mijn broeder, die du my ghegheuen hebst? ende hietse het lant ^† Cabul tot op desen dach.

† Cabul heet leemacker of kleylant.

14

Ende Hiram hadde den Koninck ghesonden hondert ende twintich Centener gouts.

15

Ende datselue is de summe der chijnse, die Koninc Salomo opnam, te bouwen des Heeren huys, ende zijn huys, ende ^l Millo, ende de mueren Ierusalems, ende Hazor, ende Megiddo, ende Gaser.

l Was een open raedtshof, binnen Ierusalem, daermen vanden ghemeynen lantssaken in handelde.

16

Want Pharao de Koninck in Egypten, was op ghekomen, ende hadde Gaser ghewonnen, ende met vyere verbrandt, ende de Cananiters verworcht die in der Stadt woonden, ende haddese syner dochter Salomons wijf, ten geschenck ghegheuen.

17

Also bouwede Salomo Gaser, ⁺ ende het ^m† leghe BethHoron.

+ Gaser.

m† and. zijde.

18

Ende Baelath, ende Thamar in der woestijne inden lande.

19

Ende alle steden der ^n† koornhuysen, die Salomo hadde, ende alle steden der wagenen, ende de steden der ruyters: ende waer hy lust toe hadde te bouwen tot Ierusalem, in Libanon, ende inden gantschen lande syner heerschappie.

n† and. schathuysen,

C.20

^o Ende alle het ouerbleuen volck, van den Amoriters, Hethiters, Pheresiters, Heuiters, ende Iebusiters, die niet van den kinderen Israels en waren,

o Iudic. 2. 3.

21

Derseluer kinderen, die sy na hen ouerblijuen lieten inden lande, die de kinderen Israels niet en konden verbannen, die maecte Salomo chijnsbaer, tot op desen dach.

22

^p Daerenteghen van den kinderen Israels, en maecte hy gheene knechten, maer lietse krijchslieden, ende syne knechten, ende Vorsten, ende Ridders, ende ouer syne waghenen ende ruyters zijn.

p Leuiti. 25.e.46. 2.Para. 8.a.9.

23

Ende der Amptlieden die ouer Salomons wercken waren, dier was vijf hondert ende vijftich, die ouer het volck heerscheden, ende de wercken wtrichteden.

24

Ende de dochter Pharao tooch op van der stadt Dauids, ^q in haer huys, dat hy voor haer ghebouwet hadde: ^r doe bouwede hy oock Millo.

q 1.Para. 7.a.8. 2.Para. 8.b.11.

r 2.Sam. 5.a.9.

25

Ende Salomo offerde des Iaers drymael brantoffer ende danckoffer, op den Altaer, ^s dien hy den Heere ghebouwet hadde, ende roockte bouen hem voor den Heere, ende also wert het huys veerdich.

s 2.Para. 4.a.1.

26

^t Ende Salomo maecte ooc Schepen tot EzeonGeber, die by Elon leyt, aen den Oeuer der ^u† Schelfzee, inden lande der Edomiters.

t 1.Reg. 22.e.49. 2.Para. 8.b.17.

u† and. Rietzee

27

Ende Hiram sandt syne knechten henen inde Schepen, die goede Schiplieden, ende op de Zee veruaren waren, met den knechten Salomo.

28

Ende quamen tot ^x Ophir, ende haelden aldaer vier hondert ende twintich Centener gouts, ende brachtent den Koninck Salomo.

x Ierem. 10.a.9.