Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxi. Capittel.

1. Dry Iarigen dieren tijt wert voor seuen mannen, 3. Wt Sauls huyse den Heere opghehanghen, ghestilt, 7. Dauid houdt den Eedt Ionathan ghesworen, 10. werdt bewoghen Sauls ende Ionathans ghebeente te begrauen, 15. ende voert vier groote krijghen tegen de Philisteen.

A.1

DAer werdt oock eenen dieren tijdt tot Dauids tijden, ⁺ dry Iaer na malcanderen: ende Dauid sochte het aenghesicht des Heeren: Ende de Heere sprack: ^a Om Sauls wille, ende om des bloedthuys wille, dat hy de Gibeoniters ghedoodt heeft.

+ Eenen dieren tijt dry Iaer lanck.

a 1.Sam. 22.b.18

2

Doe liet de Koninck de Gibeoniters eysschen, ende sprack tot hen: (^b De Gibeoniters nu en waren niet van den kinderen Israels, maer ouerbleuen van den Amoriten: ^c ende de kinderen Israels hadden hen gesworen, ende Saul sochtese te slaen in synen ijuer, voor de kinderen Israels ende Iuda.)

b Iosue 9.a.3.

c Iosue. 9.b.15.

3

So sprack nu Dauid totten Gibeoniten: Wat sal ick v doen? ende waermede sal ick versoenen, dat ghy het erfdeel des Heeren seghenet?

4

De Gibeoniters spraken tot hem: Het en is ons niet om gout ende siluer te doen, aen Saul ende synen huyse, ende het en is ons niet te doen om yemandt te dooden in Israel. Hy sprack: Wat segghet ghy dan, dat ick v doen sal?

5

Sy spraken totten Koninc: Den man die ons verdoruen, ende te niet ghemaeckt heeft, sullen wy verdelgen, dat hem niets blijue in allen lantpalen Israels.

6

Gheeft ons seuen mannen wt synen huyse, dat wyse ophangen den Heere to Gibea Sauls, des verkoren des Heeren: De Koninck sprack: Ick wilse gheuen.

7

Doch de Koninck verschoonde MephiBoseth des soons Ionathan, ⁺ des soons Saul, ^d om des Eedts wille des Heeren, die tusschen hen was, namelick, tusschen Dauid ende Ionathan, den sone Sauls.

+ Dauid houdt den Eedt Ionathan ghesworen.

d 1.Samu. 18.a.3. ende 20.a.8. ende 23.b.18.

8

Doch de twee sonen Rizpa der dochter Aia, die sy Saul ghebaert hadde, Armoni ende MephiBoseth: ^e daertoe de vijf sonen Michal der dochteren Sauls, diese Adriel ghebaert hadde, den sone Barsillai des Mahalothiters, nam de Koninck,

e 1.Sam. 18.b.19.

9

Ende gafse in de handen der Gibeoniters, die hingense op den berch voor den Heere: also vielen dese seuen op eenmael, ende storuen ter tijdt des eersten oogsts, wanneer den garstenoogst aengaet.

B.10

Doe nam Rizpa de dochter Aia, eenen sack, ende spreydde hem op den rotzsteen int beghin des oogsts, tot dat daer water van den Hemel op hen ^f druppede: ende en liet des daechs de voghelen des Hemels niet op hen rusten, noch des nachts de dieren des velts.

f Dat was haer een teecken der versoeninghe Gods ouer de straffe haerder kinderen, dewijle de plaghe der dierte wt groote droochte quam.

11

Ende het wert Dauid gheseydt, wat Rizpa de dochter Aia, Sauls bywijf ghedaen hadde.

12

^g Ende Dauid ghinck henen, ende nam het ghebeente Sauls, ende het ghebeente Ionathan zijns soons, ⁺ van den burgeren tot Iabes in Gilead, (die sy van der strate Bethsan ghestolen hadden, daerse de Philisteen henen ghehangen hadden, te dier tijt, doe de Philisteen Saul sloeghen op den berch Gilboa.)

g 1.Sam. 31.b.13. 2.Samu. 2.a.5.

+ Dauid begraeft Sauls ende Ionathans ghebeente.

13

Ende brachtese van daer op, ende vergaderdense te hoop met den ghebeente der ghehanghenen.

14

Ende begroeuen het ghebeente Sauls, ende zijns soons Ionathan, inden lande BenIamin tot Zela, in het graf zijns vaders Kis: ende deden alle dinck, als de Koninck gheboden hadde: Also wert God na desen den lande weder versoent.

15

Daer verhief hem nu weder eenen krijch vanden Philisteen teghen Israel, ⁺ ende Dauid tooch af, ende syne knechten met hem, ende streden teghen de Philisteen: Ende Dauid wert moede.

+ Vier groote krijgen Dauids teghen de Philisteen.

16

^h Ende Iesbi tot Nob (die daer was der kinderen Rapha een, ende het gewichte zijnder spiessen was, dry hondert ghewicht ⁱ metaels, ende hadde een nieuwe harnasch aen) die dachte Dauid te slaen.

h 1.Samu. 17.a.4

i Of, eerins,

17

^k Doch Abisai de sone ZeruIa halp hem, ende sloech den Philisteus doot: doe swoeren hem de mannen Dauids, ende spraken: ^l Du en salt niet meer met ons wttrecken in den strijt, dat het licht in Israel niet wtblussche.

k 2.Samu. 23.d

l 2.Samu. 18.a.3.

18

^m Daer na verhief hem noch eenen krijch tot ^n† Nob met den Philisteen: Doe sloech Siberhai de Husathiter den Saph, die oock der kinderen Rapha een was.

m 1.Para. 20.a.4.

n† and. Gob

19

Ende daer verhief hem noch eenen krijch tot Gob met den Philisteen: Doe sloech Elhanam de sone Iaere Orgim, een Bethlehemiter, Goliath den Gethiter, die daer hadde een spiesse, welcke staf was als eenen weuers boom.

C.20

Ende daer verhief hem noch eenen krijch tot Gath, daer was een lanck man, die hadde ses vingheren aen zijn handen, ende ses theene aen zijn voeten, dat is, vier ende twintich aen den ghetale, ende hy was oock geboren van Rapha.

21

Ende doe hy Israel beschimpte, ⁺ sloech hem Ionathan de sone Simea, des broeders Dauid.

+ De kinderen Rapha ghenoemt Raphaim, zijn ouerbleuen van den grooten Reusen.

22

Dese vier waren den Rapha gheboren tot Gath, ende vielen door de handt Dauids, ende syner knechten.