Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xvij. Capittel.

1. Ahitophels raet tegen Dauid, 6. Husai raet voor Dauid, 15. bootschap wort aen Dauid geschict door de Priesters, 23. Ahitophel verhangt hemseluen, 24. Absalom iaecht synen vader na met Amasa synen hooftman, 27. Dauid krijcht onthoudt inder woestijne.

A.1

ENde Ahitophel sprack tot Absalom: ^{+ a} Ick wil twaelf duysent mannen wtlesen, ende my opmaken, ende Dauid naiaghen by nacht,

+ Ahitophels raet teghen Dauid.

a 2.Sam. 15.d.34

2

Ende wil hem oueruallen, dewijle dat hy mat ende moede is: wanneer ick hem dan verschricke, dat alle het volc dat by hem is, vlucht, so wil ick den Koninck alleene slaen,

3

Ende alle het volck weder tot dy brenghen: wanneer dan een yegelick tot dy ghebracht is, als du begheerest, so blijft alle het volc met vreden.

4

Dat dochte Absalom goet zijn, ende alle Oudtsten in Israel.

5

Doch Absalom sprack: Lieue, latet Husai den Arachiten oock eysschen, ende hooren wat hy daer toe seyt.

6

Ende doe Husai tot Absalom inquam, sprack Absalom tot hem: Sulcx heeft Ahitophel ghesproken: segt du: Sullen wy het doen, ofte niet?

7

Doe sprack Husai tot Absalom: ⁺ Het en is gheenen goeden raet dien Ahitophel op dit mael ghegheuen heeft.

+ Husai raet voor Dauid.

8

Ende Husai sprack voorder: Du kenst dynen vader wel, ende syne lieden, dat sy sterck zijn, ende eens toornighen gemoets, ^b als eenen Beyr, dien de ionghen op den velde ghenomen zijn: daertoe is dijn vader een krijchsman, ende en sal niet versuymen met den volcke.

b Prouer. 17.b.12

9

Siet, hy heeft hem nu misschien versteken erghens in eenen kuyl, oft elders aen een plaetse: wanneert dan gheschiedde, dat het ten eersten mael qualick verghinck, ende daer quame een gheschrey, ende sprake: Daer is eenen slach gheschiet inden volcke, dat Absalom nauolchde,

B.10

So soude yeghelick vertzaecht worden, die sus oock een krijchsman is, ende een herte heeft als eenen leeuw: want gantsch Israel weet, dat dijn vader sterck is, ende krijchslieden, die by hem zijn.

11

Daerenteghen, dat rade ick: dat du tot dy vergaderest het gantsche Israel, van Dan aen, tot Berseba toe, so vele als des zandts aen de Zee, ende dyne persoon tercke met hen.

12

So willen wy hem oueruallen, aen welcke plaetse wy hem vinden, ende willen ouer hem komen, gelijck als den dauw op de Aerde valt, dat wy van hem ende alle syne mannen, niet eenen ouer laten.

13

Ist dat hy hem dannoch in een stadt vergadert, so sal het gantsche Israel stricken aen deselue stadt worpen, ende in het water trecken, datmen daer niet een steenken van en vinde.

14

Doe sprack Absalom, ende een yeghelick in Israel: Den raet Husai des Arachiten is beter, dan Ahitophels raet: ^c doch de Heere schicktede het also, dat den goeden raet Ahitophels verhindert wert: op dat de Heere ongheluck ouer Absalom brochte.

c Esaie. 8.b.10. ende 19.b.11.

15

^d Ende Husai sprack tot Zadok ende AbIathar den Priesteren: ⁺ So ende so heeft Ahitophel Absalom ende den Oudtsten in Israel, gheraden: daerenteghen ick hebbe so ende so gheraden.

d 2.Sam. 15.d.36

+ Door de Priesters wort aen Dauid bootschap geschict.

16

So sendet nu ^e† haestelick henen, ende laet het Dauid aenseggen, ende segt: En blijft niet ouer nacht op den vlacken velde der woestijnen, maer maect dy daer ouer, dat de Koninck niet verslonden en worde, ende alle het volck dat by hem is.

e† And. flucx, van stonden aen

17

Ionathan nu ende Ahimaaz stonden by de fonteyne Rogel: ende een maecht ghinck henen, ende seyde het hen aen: ende sy ghingen henen, ende seydent Dauid aen: want sy en dorsten hen niet sien laten, dat sy in de stadt quamen.

18

Eenen Ionghen dannoch sachse, ende seyde het Absalom aen: doch die beyde ghinghen haestelick henen, ende quamen in eens mans huys te Bahurim, die hadde eenen bornput in synen hof, daer daelden sy in.

19

Ende de vrouwe nam ende spreydde een decksel ouer den put, ende spreydde daer gort ouer, datmen het niet en merckte.

C.20

Doe nu de knechten Absaloms tot de vrouwe int huys quamen, spraken sy: Waer is Ahimaaz ende Ionathan? De voruwe sprack tot hen: Sy ghinghen ouer dat waterken: ende doe syse sochten ende niet en vonden, ginghen sy weder na Ierusalem.

21

Ende doe sy wech waren, klommen sy wt den put, ende ginghen henen, ende seydent Dauid den Koninck aen, ende spraken tot Dauid: Maect v op, ende gaet haestelick ouer dat water, want so ende so heeft Ahitophel teghen v raet ghegeuen.

22

Doe maecte hem Dauid op, ende alle het volck dat by hem was, ende ghinghen ouer de Iordane, tot dat het licht morghen wert: ende het en faelgeerde niet aen eenen, die niet ouer de Iordane ghegaen en ware.

23

Als nu Ahitophel sach, ⁺ dat synen raet niet voortghegaen en was, sadelde hy synen Ezel, maeckte hem op, ende tooch na huys in zijn stadt, ende beschickte zijn huys, ^f ende verhinck hem, ende sterf: ende wert begrauen in zijns vaders graf.

+ Ahitophel verhangt hemseluen.

f Matth. 27.a.5.

24

Ende Dauid quam tot Mahanaim: ende Absalom tooch ouer de Iordane, ende alle mannen Israels met hem.

25

^g Ende Absalom hadde Amasa in Ioabs stede ghestelt ouer het heyr: ^{+ h} Amasa nu was eens mans sone, die hiet Iethra, een ^i† Iesraeliter, die welcke lach by Abigail der dochter Nahas, der suster ZeruIa Ioabs moeder.

g 2.Sam. 19.b.13.

+ Amasa is Absaloms hooftman.

h 1.Paral. 2.b.17.

i† An. Israeliter

26

Israel nu ende Absalom legerden hen in Gilead.

27

Doe Dauid te Mahanaim gekomen was, ⁺ doe brachten Sobi de sone ^k Nahas, van Rabbath der kinderen Ammon, ende ^l Machir de sone Ammiel van Lodabar, ende ^m Barsillai een Gileaditer van Roglim,

+ Mahanaim.

k 1.Sam. 11.a.1.

l 2.Sam. 9.a.4.

m 2.Sam. 19.b.31. 1.Regum. 2.a.7.

28

^n† Beddewerck, beckens, Aerden vaten, tarwe, gherste, meel, sanghen, boonen, erweten, gortte,

n† And. beddeghewaet,

29

Honich, boter, schapen, ende runderkese tot Dauid, ende tot den volcke dat by hem was: want sy dachten, dat volck sal hongherich, moede, ende dorstich zijn, inder woestijne.