Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xi. Capittel.

1. Ioab ende het gantsche Israel trecken wt inden strijdt teghen Ammon, Dauid valt thuys in Ouerspel, 6. ende so hy dat soeckt te bedecken, 9. ende hem niet en wil gelucken, 14. sendt hy den trouwen Uriam met eenen moordadigen brief in synen doot, 18. Ioab schickt den Koninck bootschap weder, 25. die laet hem deselue welbehaghen, 27. ende neemt BathSeba ten wijue.

A.1

ENde doe dat Iaer om quam, ^a ter tijt, wanneer de Koninghen pleghen wt te trecken, ⁺ sandt Dauid Ioab ende syne knechten met hem, ende het gantsche Israel henen, dat sy de kinderen Ammon verderuen souden, ende belegghen Rabba: Dauid daerenteghen bleef te Ierusalem.

a 1.Parali. 20.a.1.

+ Rabba beleyt.

2

Ende het gheschiedde dat Dauid om den auont opstont van synen legher, ende ghinck op het dack des Konincx huys, ende sach van het dack een wijf ^b haer wasschen: ende dat wijf was van seer schoonen ghestalte.

b Exod. 2.a.5. Susan. b.15.

3

Ende Dauid sandt henen, ende liet na dat wijf vraghen, ende seggen: Is dat niet BathSeba de dochter Eliam, dat wijf Vria des Hethiters?

4

Ende Dauid sandt boden henen, ⁺ ende lietse halen: ende doe sy tot hem in quam, ^c sliep hy by haer: Ende sy ^d† reynichde haer van hare onreynicheyt, ende keerde wederom na haren huyse.

+ Dauid valt in Ouerspel.

c Leuitic. 18.c.20.

d† And. heylichde. Leuitic. 15.d.30.

5

Ende de vrouwe wert ^e swangher, ende sandt henen, ende liet Dauid verkondighen, ende segghen: Ick ben swangher gheworden.

e Of, met kinde

6

Ende Dauid sandt henen tot Ioab: ⁺ Sendt tot my Vria den Hethiter: ende Ioab sandt Vria tot Dauid.

+ Dauid.

7

Ende doe Vria tot hem quam, vraechde Dauid, oft het met Ioab, ende met den volcke, ende met de krijch wel stont?

8

Ende Dauid sprack tot Vria: Gaet af in dijn huys, ende wascht dijn voeten: ende doe Vria tot des Konincx huys wt ghinck, volchde hem des Konincx gheschencken na.

9

Ende Vria leyde hem slapen, voor de deure des huys des Konincx, daer alle knechten zijns heeren lagen, ende en ghinck niet af in zijn huys.

B.10

Doemen nu Dauid seyde: Vria en is niet af in zijn huys ghegaen: sprack Dauid tot hem: Bistu niet ouer velt hier ghekomen? waerom en bistu niet ghegaen in dijn huys?

11

Vria daerenteghen sprack tot Dauid: De Arcke ende Israel, ende Iuda blijuen in de tenten,

[fol. 106r]

ende Ioab mijn heere, ende mijns heeren knechten liggen te velde, ende ick soude in mijn huys gaen, dat ick ate ende droncke, ende by mynen wijue laghe? ^f so warachtich als du leuest, ende dijn ziele leeft, ick en doe sulcx niet.

f 2.Sam. 14.b.19.

12

Dauid sprack tot Vria: ^g So blijft heden oock hier, morghen so wil ick dy laten gaen: so bleef Vria te Ierusalem dies daechs, ende des anderen daechs daer toe.

g Iudic. 19.a.9.

13

Ende Dauid noodde hem, dat hy voor hem att ende dranck, ende maeckte hem droncken: ende des auondts ghinck hy wt, dat hy hem slapen leyde op synen legher, met zijns heeren knechten, ende en ghinck niet af in zijn huys.

14

Des morghens schreef Dauid eenen brief tot Ioab, ⁺ ende sandten hem by Vria:

+ Vrias brief.

15

^h Ende hy schreef also inden brief: Stellet Vria aen de plaetse des strijdts, daer hy ten alder hardtsten is, ende wendt v achter van hem af, dat hy verslaghen worde, ende sterue.

h 1.Reg.21.a.8.

16

Als nu Ioab rondtom de stadt lach, stelde hy Vria aen de plaetse daer hy wiste dat daer strijdtbare mannen waren.

17

Ende doe de mannen der stadt wt vielen, ende streden teghen Ioab, vielen sommighe wt den volcke vanden knechten Dauids, ende Vria de Hethiter sterf oock.

18

Doe sandt Ioab henen, ende liet Dauid segghen allen handel des strijdts,

19

Ende gheboot den Bode, ende sprack: Wanneer du allen handel des strijdts hebst wtghesproken met den Koninck,

C.20

Ende siest, dat de Koninck toornich is, ende tot dy spreeckt: Waerom hebt ghy v so na ter stadt ghemaect met den strijdt? en weet ghy niet datmen pleech van de mueren te schieten?

21

ⁱ Wie sloech AbiMelech den sone IeruBeseth? wierp niet een vrouwe een stuck van eenen meulen op hem vanden mueren, dat hy sterf te Thebez? waerom hebt ghy v so na ter mueren ghemaeckt? so saltu segghen: Dijn knecht Vria de Hethiter is oock doot.

i Iudic. 9.f.53.

22

De Bode ghinck henen, ende quam, ende seyde Dauid alles, daer hem Ioab om wtghesonden hadde.

23

Ende de Bode sprack tot Dauid: De mannen namen de ouerhant teghen ons, ende vielen tot ons wt op het velt: wy daerenteghen waren aen hen, tot voor de deure der poorten.

24

Ende de schutters schoten vander mueren op dyne knechten, ende doodden sommige van des Konincx knechten: daertoe is Vria dijn knecht de Hethiter oock doot.

25

Dauid sprack totten Bode: So saltu tot Ioab segghen: En laet dy dat niet qualick behaghen: want het sweert verslint nu desen, nu dien: laet slechs niet af vanden krijch teghen de stadt, dat duse brekest, ende hebt eenen goeden moet.

26

Ende doe Vrias wijf hoorde dat haer man Vria doot was, ⁺ droech sy leedt om haren huysweert.

+ Dauid neemt BathSeba ten wijue.

27

Doe sy nu wtghetreurt hadde, sandt Dauid henen, ende lietse in zijn huys halen: ende sy wert zijn wijf, ende baerde hem eenen sone: doch de daet beuiel den Heere qualick die Dauid dede.