Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat x. Capittel.

1. Hanon de Koninck der kinderen Ammon, schendt Dauids boden, 6 de Syriers, so sy hen onderstaen den kinderen Ammon te helpen, werden, 13. 18. tweemael van Dauid ende synen volcke gheslaghen.

A.1

ENde het geuiel daer na, ^a dat de Koninck der kinderen Ammon sterf, ⁺ ende zijn sone Hanon wert KOninck in zijn stede.

a 1.Paral. 19.a.1.

+ Hanon.

2

Doe sprack Dauid: Ick wil barmherticheyt doen, aen Hanon, den sone Nahas, ^b gelijck als zijn vader aen my barmherticheyt gedaen heeft: ende sandt henen, ende liet hem troosten door zijn knechten ouer synen vader. Doe nu de knechten Dauids int lant der kinderen Ammon quamen,

b 1.Sam. 22.a.3.

3

Spraken de Gheweldighe der kinderen Ammon tot haren heere Hanon: Meynstu dat ^c Dauid dynen vader eere voor dynen ooghen, dat hy troosters tot dy ghesonden heeft? meynstu niet, dat hy daerom zijn knechten heeft tot dy gesonden, dat hy de stadt verspeure ende verspiede, ende omkeere?

c Of, het is om dynen vader te eeren in dyne tegenwoordicheyt dat Dauid troosters, etc, tot dy, etc

4

Doe nam Hanon de knechten Dauids, ⁺ ende schoer hen den baert half, ende sneedt hen de kleederen half af, tot aenden gordel, ende lietse gaen.

+ Hanon de Koninck der kinderen Ammon, schendt Dauids boden.

5

Doe dat Dauid wert gheseyt, sandt hy hen teghen: want de mannen waren seer gheschendt: ende de Koninck liet hen seggen: Blijft tot Ieriho, tot dat uwen baert weder wasset, so koemt dan weder.

6

Doe dan de kinderen Ammon saghen dat sy voor Dauid stinckende gheworden waren, sonden sy henen, ende namen aen de Syriers des huys Rehob, ende de Syriers te Zoba, twintich duysent mannen voetvolcx, ende vanden Koninck Maacha, duysent mannen, ende van Istob twaelf duysent mannen.

7

Doe dat Dauid hoorde, sandt hy Ioab henen met den gantschen heyre der krijchslieden.

8

Ende de kinderen Ammon toghen wt, ende rusteden hen ten strijde voor den inganck der poorten: ende de Syriers van Zoba, van Rechob, van Istob, ende van Maacha waren alleen int velt.

9

Doe nu Ioab sach, dat den strijdt op hem ghestelt was voor ende achter, verkoos hy sommighe wt alle ionghe manschap in Israel, ende rustede hem teghen de Syriers.

B.10

Ende dat ouerghebleuen volck dede hy onder de hant zijns broeders Abisai, dat hy hem rustede teghen de kinderen Ammon.

11

Ende sprack: ^d Ist dat my de Syriers te machtich zijn, so koemt my te hulpe: worden dy oock de kinderen Ammon te machtich, so wil ick dy te hulpe komen.

d 1.Paral. 19.b.12.

12

Hebt eenen goeden moet, ende laet ons sterck zijn voor ons volck, ende voor de steden onses Gods: de Heere dannoch doe wat hem behaecht,

13

Ende Ioab maecte hem daertoe, ⁺ met den volcke dat by hem was, te strijden tegen de Syriers: ende sy vloden voor hem.

+ De Syriers ende Ammoniten vlieden voor Dauid.

14

Ende doe de kinderen Ammon sagen, dat de Syriers vloden, doe vloden sy oock voor Abisai, ende togen in de stadt: also keerde Ioab om van den kinderen Ammon, ende quam te Ierusalem.

15

Ende doe de Syriers saghen, dat sy voor Israel gheslaghen waren, quamen sy te hoope.

16

Ende HadadEser sandt henen, ⁺ ende bracht de Syriers op ghene zijde des waters wt, ende voerde haer macht daer in, ⁺ ende Sobach de Velthoofman HadadEsers tooch voor hen henen.

+ HadadEser.

+ Sobach.

17

Doe dat Dauid wert aengheseyt, vergaderde hy te hoope het gantsche Israel, ende tooch ouer de Iordane, ende quam te Helam: ende de Syriers rusteden hen teghen Dauid, met hem te strijden.

18

Nu de Syriers vloden voor Israel: ende Dauid verworchde vanden Syriers seuen hondert waghenen: ende veertich duysent ruyters: daer toe Sobach den Velthooftman sloech hy, dat hy aldaer sterf.

19

Doe nu de Koninghen die onder HadadEser waren, saghen, dat sy gheslaghen waren voor Israel, maeckten sy vrede met Israel, ende werden hem onderdanich: ende de Syriers vreesden hen, den kinderen Ammon meer te helpen.