Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ix. Capittel.

1. Dauid laet MephiBoseth den sone Ionathan halen, 7. gheeft hem alle goeden Sauls, ende den Ziba met synen kinderen ende knechten dat sy syne lantbouwers zijn.

A.1

ENde Dauid sprack: Is daer oock noch yemandt ouerghebleuen vanden huyse Sauls, dat ick barmherticheyt aen hem doe, om Ionathans wille?

2

Daer was dannoch een knecht vanden huyse Sauls, ⁺ die hiet ^a Ziba, dien riepen sy tot Dauid: ende de Koninck sprack tot hem: Bistu Ziba? hy sprack: Ia, dijn knecht.

+ Ziba Sauls knecht.

a 2.Sam. 16.a.1.

3

De Koninck sprack: Is daer noch yemant van den huyse Sauls, dat ick Gods barmherticheyt aen hem doe? Ziba sprack totten Koninck: ^b Daer is noch een sone Ionathan, lam aen de voeten.

b 2.Sam. 4.a.4.

4

De Koninck sprack tot hem: Waer is hy? Ziba sprack totten Koninck: Siet, hy is te Lodabar, inden huyse ^c Machir des soons Ammiel.

c 2.Sam. 17.c.27.

5

Doe sandt de Koninck Dauid henen ende liet hem halen van Lodabar, wt den huyse Machir des soons Ammiel.

6

Doe nu MephiBoseth de sone Ionathan, ⁺ des soons Saul, tot Dauid quam, viel hy op zijn aenghesicht, ende badt aen. Dauid dan sprack: MephiBoseth: hy sprack: Hier ben ick dijn knecht.

+ MephiBoseth Ionathans sone.

7

Dauid sprack tot hem: Vreest dy niet, want ick wil barmherticheyt aen dy doen, om Ionathan dijns vaders willen, ^d ende wil dy alle ackeren dijns vaders Sauls weder geuen: ende du salt daghelicx by mijnder tafelen het broot eten.

d 2.Sam. 19.c.28.

8

Hy daerenteghen badt aen, ende sprack: Wie ben ick dijn knecht, dat du dy wendest tot eenen dooden hont, als ick ben?

[fol. 105v]

9

Doe riep de Koninck Ziba Sauls Ionghen, ende sprack tot hem: ^e Alles wat Sauls geweest is, ende zijns gantschen huys, dat hebbe ick den sone dijns heeren ghegheuen.

e 2.Sam. 16.a.4.

B.10

So bearbeyt hem nu synen acker, du ende dyne kinderen ende knechten, ende brengt het hem in, dat het dijns heeren soons broot zy, dat hy hem gheneere: doch MephiBoseth dijns heeren sone sal daghelicx het broot eten by mijnder tafelen. Ziba hadde vijfthien sonen ende twintich knechten.

11

Ende Ziba sprack totten Koninc: Alles als mijn heere de Koninck synen knecht geboden heeft, so sal zijn knecht doen: ende ^† MephiBoseth ete by myner tafelen als des Konincx kinderen een.

† [de koninck sprack etc.]

12

Ende MephiBoseth hadde eenen kleynen sone, ⁺ die hiet Micha: ende alle wat inden huyse Ziba woonde, dat diende MephiBoseth.

+ Micha MephiBoseths sone.

13

Ende MephiBoseth woonde te Ierusalem: want hy att daghelicx by des Konincx tafel, ^f ende hinckte met synen beyden voeten.

f 2.Sam. 4.a.4.