Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vi. Capittel.

1. De Arcke Gods wort ghehaelt van Gibea, 6. die brengt Usa, diese aenroert, den doot, 10. ende ObedEdom diese herbercht, des Heeren seghen, 12. Dauid gestercket, laetse daerna in zijn stadt halen, 16. springt ende dansset voor den Heere, 20. ende wert van zijn wijf Michal veracht.

A.1

ENde Dauid ^a vergaderde wederom alle ionghe manschap in Israel, ⁺ dertich duysent.

a 1.Paral. 13.a.5.

+ Dauid haelt de Arcke Gods van Gibea.

2

Ende maeckte hem op, ende ghinck henen met allen volcke dat by hem was, vanden burgeren Iuda, dat hy de ^b† Arcke Gods van daer op halen soude, welcx Naem heet: Den Naem des Heeren Zebaoth woont daer op ^c† bouen den Cherubim.

b† And. kiste, lade

c† And. tusschen

3

^d Ende sy lieten de Arcke Gods voeren op eenen nieuwen waghen, ende haeldense ^e wt den huyse AbiNadab, die te Gibea woonde: Vsa ende Ahio de sonen AbiNadab, dreuen den nieuwe wagen.

d 1.Sam. 6.a.7.

e 1.Sam. 7.a.1.

4

Ende doe sy hem met de Arcke Gods wt den huyse AbiNadab voerden, die tot Gibea woonde,

[fol. 104v]

ende Ahio voor der Arcke henen ghinck,

5

Speelde Dauid ende het gantsche huys Israels voor den Heere henen, met allerley snaren spel van dennen houte, met harpen ende Psalteren, ende tamborinen, ende schellen, ende cymbalen.

6

^f Ende doe sy quamen ter schueren Nachon, ^g greep ⁺ Vsa toe, ende hielt de Arcke Gods, want de runderen traden ter zijden wt.

f 1.Paral. 13.a.9.

g Nu. 4.b.15.19. ende 7.a.9.

+ God doot Vsa.

7

Doe vergrimde den toorn des Heeren ouer Vsa, ende God sloech hem aldaer, om zijns ^h† vermetenheyt wille, dat hy aldaer sterf by der Arcken Gods.

h† And. syne verwaentheyt. And. feyls

8

Doe wert Dauid bedroeft, dat de Heere sulck een scheure aen Vsa dede: ende hiet deselue stede PerezVsa, tot op desen dach.

9

Ende Dauid vreesde hem voor den Heere dies daechs, ende sprack: Hoe sal de Arcke des Heeren tot my komen?

B.10

Ende en woudese niet laten tot hem brengen in de stadt Dauids, maer lietse brengen int huys ObedEdom des Gathiters.

11

Ende doe de Arcke des Heeren dry maenden bleef in ObedEdom des Gathiters huys, ⁺ seghende hem de Heere, ende zijn gantsche huys.

+ God seghent ObedEdom.

12

ⁱ Ende het wert den Koninck Dauid aengheseyt, dat de Heere het huys ObedEdom segende, ende alles wat hy hadde om der Arcken Gods wille: ^k doe ghinck hy henen, ende haelde de Arcke Gods wt den huyse ObedEdom opwaert, in de stadt Dauids met vreuchden.

i 1.Paral. 13.b.14.

k 1.Paral.15.c.25.

13

Ende doe sy henen ghinghen met de Arcke des Heeren ses ^l† ghanghen, offerde men eenen osse ende een vet schaep.

l† And. schreden

14

Ende Dauid danste met aller macht voor den Heere henen, ende was begordet met eenen lijnen ^m† lijfrock.

m† And. Ephod

15

Ende Dauid met tsamen den gantschen Israel, voerden de Arcke des Heeren op, met iuychen ende basuynen.

16

ⁿ Ende doe de Arcke des Heeren in de stadt Dauids quam, keeck Michal de dochter Sauls door de venster, ende sach den Koninck Dauid springhen ende danssen voor den Heere, ende verachtede hem in haer herte.

n 1.Paral. 15.c.29.

17

^o Doe sy nu de Arcke des Heeren in brachten, stelden sy die in haer stede midden inder hutten, die Dauid voor haer hadde opgheslagen: ende Dauid offerde brandoffer ende danckoffer voor den Heere.

o 1.Paral. 16.a.1. ende 17.a.1.

18

Ende doe Dauid hadde wtgheoffert den brandoffer ende danckoffer, seghende hy dat volck in den Naem des Heeren Zebaoth.

19

Ende deylde wt allen volcke, ende der veelheyt Israels, beyde mannen ende vrouwen, eenen yeghelicken eenen brootkoeck, ende een stuck vleeschs, ende een neussel wijns: doe ghinck alle dat volck henen, en yeghelick in zijn huys.

C.20

Doe nu Dauid weder quam, ⁺ zijn huys te seghenen, ghinck Michal de dochter Sauls wt, hem teghen, ende sprack: Hoe heerlick is heden de Koninck van Israel gheweest, die hem voor de maechden syner knechten ontbloot heeft, ghelijck als hen de ^p† loose lieden ontblooten.

+ Michal veracht Dauid.

p† And. onnutte,

21

Dauid dan sprack tot Michal: Ick wil voor den Heere spelen, die my verkoren heeft voor dynen vader, ende voor alle synen huyse, dat hy my beuolen heeft een Vorst te zijn ouer het volck des Heeren ouer Israel.

22

Ende wil noch ^q gheringher worden dan also, ende wil nederich zijn in mynen ooghen, ende metten maechden daer du van gheseyt hebst, tot eeren worden.

q Of, snooder, verachtelicker.

23

Doch Michal Sauls dochter en hadde gheen kint, tot aen den dach haers doots.