Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vij. Capittel.

1. Dauid neemt hem voor, den Heere een huys te bouwen, 5. Dat wort hem vanden Heere door Nathan verboden, 12. ende op synen sone ghespaert, 18. Dauid seyt den Heere danck, 25. ende biddet hem, hy wil zijn toesegghinghe volbrenghen.

A.1

DOe nu de ^a Koninck in zijn huys sat, ⁺ ende de Heere hem ruste ghegheuen hadde van alle syne vyanden rontom.

a 1.Parali. 17.a.1.

+ Nathan de Propheet.

2

Sprack hy tot den Propheet Nathan: Siet, ick woone in een cederen huys, ende de ^b† Arcke Gods woont onder de tapijten.

b† And. kiste, lade 1.Regum. 8.b.16.

3

Nathan sprack tot den Koninck: Gaet henen, ^c alles wat du in dijn herte hebst, dat doet, want de Heere is met dy.

c 1.Sam. 10.a.7.

4

Des nachts nu quam het woort des Heeren tot Nathan ende sprack:

5

Gaet henen, ende segt mynen knecht Dauid, So spreeckt de Heere: Soudestu my een huys bouwen, dat ick daerin woonde?

6

^d Ick en hebbe doch in gheenen huyse gewoont, sindt dien daghe, doe ick de kinderen Israels wt Egypten leydde, tot op desen dach, maer ick hebbe ghewandelt inder hutten ende wooninghe.

d 1.Reg. 8.b.16. 1.Paralip. 17.a.5. 2.Paralip. 6.a.5. Esa. 66.a.1.

7

Waer ick met allen kinderen Israels henen wandelde, hebbe ick oyt erghens met eenen der stammen Israels ghesproken, dien ick beuolen hebbe, mijn volck Israel te weyden, ende gheseyt: Waerom en bouwet ghy my niet een cederen huys?

8

So saltu nu also mynen knecht Dauid seggen: So spreeckt de Heere Zebaoth: ^e Ick hebbe dy ghenomen vanden schaephutten, dat du zijn soudest een Vorst ouer mijn volck Israel.

e 1.Sam 16.b.11. Psalm. 78.h.70.

9

Ende ben met dy gheweest, waer du henen ghegaen bist, ende hebbe alle dyne vyanden voor dy wtgheroeyt, ^f ende hebbe dy eenen grooten Naem ghemaeckt, als de namen der grooten op Aerden.

f Matth. 16.b.18.

B.10

Ende ick wil mynen volcke Israel een plaetse setten, ende wil het planten, dat het aldaer woone, ende dat het niet meer dwalende en ga, ende het de kinderen der boosheyt niet meer dringen als te voren,

11

Ende sindt der tijt dat ick Richters ouer mijn volck Israel gheordineert hebbe: ende wil dy ruste gheuen van alle dynen vyanden: ende de Heere verkondiget dy, dat de Heere dy ^g een huys maken wil.

g Dat is na Hebreeusscher wijse, een kint oft oor gheuen.

12

^h Wanneer nu dynen tijt wech is, dat du met dynen vaderen slapen ligst, ⁺ so wil ick dijn Zaet na dy verwecken, dat van dynen lijue komen sal, die wil ick zijn Rijck ⁱ beuestighen.

h Psalm. 89.d.30. ende 132.b.11. 1.Regum. 5.a.5. 1.Paral. 22.b.10. ende 28.a.5. Ierem. 33.b.10.

+ Christus wort Dauid toegheseyt.

i Of, stadtgrijpich maken.

13

Die sal mynen Naem een huys bouwen, ende ick wil den stoel zijns Koninckrijcx beuestighen eewichlick.

14

^k Ick wil zijn vader zijn, ende hy sal mijn sone zijn: ^l wanneer hy een misdaet doet, so wil ick hem met menschen roeden ende met der menschen kinderen slaghen straffen.

k Hebr. 1.a.5.

l 1.Regum. 9.a.6. ende 11.a.9. Psalm. 89.d.31.

15

Doch mijn barmherticheyt en sal niet van hem ghewendet worden, ghelijck als ickse gewendet hebben van Saul, ^m dien ick voor dy hebbe wech ghenomen.

m 1.Sam. 15.c.26.

16

Doch dijn huys ende dijn Koninckrijck sal bestendich zijn eewichlick voor dy, ende dynen stoel sal eewichlick bestaen.

17

Doe Natan alle dese woorden ende alle dat ghesichte Dauid gheseyt hadde,

18

Quam Dauid de Koninck, ⁺ en stelde hem voor den Heere, ende sprack: Wie ben ick Heere Heere? ende wat is mijn huys, dat du my tot hier toe ghebracht hebst?

+ Dauids gebet tot God.

19

Daertoe hebstu dat noch te ⁿ gheringhe gheacht Heere Heere, maer hebst den huyse dijns

n Of, slecht, weynich, etc.

[fol. 105r]

knechts noch van ouer langhe toekomenden ghesproken: ^o dat is een ^p wijse eens menschen die God de Heere is.

o Dat is, Du sprekest met my van sulck een eewich Rijcke, daer niemant kan Koninc in zijn, hi en moet dan God ende mensche zijn: dewijle hy mijn sone, ende doch voort ende voort een Koninc zijn sal, welck alles alleen God toe behoort.

p An. recht eens etc. Heere Heere.

C.20

Ende wat sal Dauid meer met dy spreken? du kennest dynen knecht Heere Heere?

21

Om dijns woorts wille, ende na dyner herten, hebstu sulcke groote dinghen alle ghedaen, dat duse dynen knecht kondt dedest.

22

Daerom bistu oock groot geacht Heere God: ^q want daer en is niemant ghelijck als du, ende daer en is gheen God dan alleene du, na allen dat wy met onsen ooren ghehoort hebben.

q Deute. 32.d.39.

23

^r Want waer is een volck op Aerden, als dijn volck Israel? om welckers wille God is henen ghegaen, hem een volck te verlossen, ende hem eenen Naem te maken, ende sulcke groote ende verschrickelicke dinghen te doen, op dynen lande voor dynen volcke, ^s dat du verlost hebst van Egypten, vanden Heydenen ende haren Goden.

r Deut. 4.a.7.

s Exod. 14.c.29.

24

Ende du hebst dy dijn volck Israel bereydet, dy ten volcke in eewicheyt, ende du Heere bist haer God gheworden.

25

So bekrachtighe nu Heere God dat woort in eewicheyt, dat du ouer dynen knecht ende ouer zijn huys ghesproken hebst, ende doet als du ghesproken hebst.

26

So sal dynen Naem groot worden in eewicheyt, datmen sal seggen: De Heere Zebaoth is de God ouer Israel, ende dat huys dijns knechts Dauids, sal bestandich zijn voor dy.

27

Want du Heere Zebaoth du God Israels, hebst de ooren dijns knechts gheopent, ende gheseyt: Ick wil dy een huys bouwen: daerom heeft dijn knecht zijn herte geuonden, dat hy dit ghebet tot dy bade.

28

^t Nu Heere Heere, du bist God, ende dyne woorden sullen waerheyt zijn: du hebst sulck goet ouer dynen knecht ghesproken.

t Deut. 32.d.39.

29

So beghint nu, ende seghent het huys dijns knechts dat het eewelick voor dy zy: want du Heere Heere hebst het ghesproken: ende met dynen seghen sal dijns knechts huys gheseghent worden eewichlick.