Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iiij. Capittel.

1. Isboseth Sauls sone wert van synen Hooftlieden Baena ende Rechob, verraderlicken doorsteken, 8 ende wort zijn doot, aen denseluen van Dauid ghewroken.

A.1

DOe nu Sauls sone hoorde, dat Abner tot Hebron doot ware, werden syne handen mat, ende gantsch Israel verschrickte.

2

Daer waren dannoch twee mannen, ⁺ Hooftlieden ouer de krijgers, onder den sone Sauls, die eene hiet Baena, de ander Rechob, sonen Rimmon des Berothiters, wten kinderen BenIamin: wat Beroth wert oock onder BenIamin gherekent.

+ Baena ende Rehob Hooftlieden Isboseths.

3

Ende de Berohiters waren gheuloden na Gethaim, ende woonden aldaer gastswijse, tot heden inden dach.

4

^a Oock hadde Ionathan de sone Sauls eenen sone, ⁺ die was lam aen de voeten, ende was vijf

a 2.Sam. 9.a.3.

+ MephiBoseth, Ionathans sone.

[fol. 104r]

Iaer oudt, doe het gheschrey van Saul ende Ionathan wt Iesreel quam, ende zijn voester hem opnam, ende vluchtede: ende in dien, als sy haer haestede ende vluchtede, viel hy, ende wert hinckende, ende hy hiet MephiBoseth.

5

So ghingen nu de sonen Rimon des Berothiters, ⁺ Rechob, ende Baena henen, ende quamen ten huyse ^b Isboseths, doe den dach aent alderheetste was, ende hy lach op synen legher inden middaghe.

+ Isboseth wort vermoort van Baena ende Rechob.

b 2.Sam. 2.a.8.

6

Ende sy quamen int huys om tarwe te halen, ende staken hem ^c† inden buyck, ende liepen wech.

c† And. onder de vijfste ribbe.

7

Want doe sy int huys quamen, lach hy op zijn bedde in zijn slaepkamer, ende staken hem doot ende hieuwen hem den kop af: ende namen synen kop, ende ghinghen henen des weechs op den vlacken velde, den gantschen nacht.

8

Ende brachten het hooft Isboseths tot Dauid te Hebron, ende spraken totten Koninck: Siet, daer is het hooft Isboseths Sauls soon, dijns vyants, die na dyner zielen stont: de Heere heeft heden mynen heere den Koninck ghewroken, aen Saul, ende aen synen zade.

9

Doe antwoordde hen Dauid: ⁺ So warachtich als de Heere leeft, die mijn ziele wt aller droeffenisse verlost heeft.

+ Dauid straft de mordenaers Isboseths.

B.10

Ick greep dien, ^d die my verkondichde, ende sprack: Saul is doodt, ende meynde, hy ware een goet bode, ende verworchde hem te Ziklag, dien ick soude bodenloon gheuen.

d 2.Sam. 1.b.15.

11

Ende dese Godloose lieden, hebben eenen rechtueerdighen man, in synen huyse op synen legher verworcht: Ia, en soude ick dies bloet niet eysschen van uwen handen? ende v vander Aerden afdoen?

12

Ende Dauid gheboot synen Ionghelinghen: die verworchdense, ende hieuwen hen handen ende voeten af, ende hinghense op aenden poel te Hebron: nu het hooft Isboseths namen sy, ende begroeuent in ^e Abners graf te Hebron.

e 2.Sam. 3.d.32.