Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

HET TVVEEDE Boeck Samuels.

Dat eerste Capittel.

1. De verkondiger van Sauls ende Ionathans doot, wert van Dauid ghedoot, 17. ende sy beweent ende beklaecht.

A.1

NA den doot Sauls doe Dauid van ^a den slach der Amalekiters weder ghekomen was, ⁺ ende twee dagen te Ziklag ghebleuen was,

a 1.Sam. 30.b.17

+ Dauid. Saul ende Ionathans doot wert Dauid verkondicht.

2

Siet, doe quam aen den derden dage een man wt den heyre van Saul, met verscheurde kleederen, ende Aerde op zijn hooft: ende doe hy tot Dauid quam, viel hy ter Aerden, ende badt aen.

3

Dauid nu, sprack tot hem: Van waer koemstu? Hy sprack tot hem: Wt den heyre Israels ben ick ontuloden.

4

Dauid sprack tot hem: Segt my, hoe gaet het toe? Hy sprack: Het volck is gheuloden vanden strijde, ende veel volcx is gheuallen: daertoe is Saul doot, ende zijn sone Ionathan.

5

Dauid sprack tot den Ionghelinck die hem sulcx seyde: Waeruan weetstu het, dat Saul ende zijn sone Ionathan doot zijn?

6

De Ionghelinck die hem sulcx seyde, sprack: Ick quam onuerhoets op het gheberchte Gilboa, ende siet, Saul leende hem op zijn spiesse, ende de waghenen ende ruyteren iaechen achter hem henen,

7

Ende hy keerde hem om, ende sach my, ende riep my: ende ick sprack: Hier ben ick.

8

Ende hy sprack tot my: Wie bistu? Ick sprack tot hem: Ick ben een Amalekiter.

9

Ende hy sprack tot my: Treedt tot my, ende doodt my, want ick ben ghedrongen rontom, ende mijn leuen is noch gantsch in my.

B.10

Doe tradt ick tot hem, ende doodde hem: want ick wiste wel, dat hy niet leuen en konde na synen valle: ende nam de kroone van synen hoofde, ende het armghesmijde van synen arme, ende hebbe het hier ghebracht tot dy, mynen heere.

11

^a Doe vattede Dauid syne kleederen, ⁺ ende verscheurdese, ende alle mannen die by hem waren,

a 2.Sam. 3.d.31 ende 13.d.31.

+ Dauid beweent Saul ende Ionathan, ende beklaechtse.

12

Ende droeghen ^b leedt, ende weenden, ende vasteden tot aenden auont, ouer Saul ende Ionathan synen sone, ende ouer het volck des Heeren, ende ouer het huys Israels, dat sy door het sweert gheuallen waren.

b Of, rouwe

13

Ende Dauid sprack tot den Ionghelinck die het hem seyde: Van waer bistu? Hy sprack: Ick ben eens vreemdelincx eens Amalekiters sone.

14

Dauid sprack tot hem: ^c Hoe? dat du niet gheureest hebst dyne hant te legghen aen den Ghesalfden des Heeren hem te verderuen?

c Psalm. 105.b.15.

15

Ende Dauid sprack tot syner Ionghelingen een: ^d Hier toe, ende slaet hem: ende hy sloech hem dat hy sterf.

d 2.Sam. 4.b.10.

16

Doe sprack Dauid tot hem: Dijn bloet sy op dynen kop: ^e want dynen mont heeft hem tegen dy seluen ghesproken, ende gheseyt: Ick hebbe den Ghesalfden des Heeren ghedoodt.

e Matth. 12.d.37. Luc. 19.c.22.

17

Ende Dauid klaechde dese klaghe ouer Saul ende synen sone:

18

Ende beual, men soude den kinderen Iuda den ^f den boghe leeren: siet, het staet gheschreuen inden boeck ^g† der redelicken.

f So heet dit liet ghelijck als oock by ons sommighe liedekens namen hebben.

g† and. Des rechtigen oft vromen [Mose] And. den Iasar.

19

De Edelste in Israel zijn op dyner hoochten verslaghen: hoe zijn de Helden gheuallen?

C.20

^h Segget het niet tot Gath, verkondiget het niet op de strate te Asklon: dat hen niet en verblijden de dochteren der Philisteen, dat niet vrolick en zijn de dochteren der onbesneden.

h Mich. 1.b.10.

21

Ghy berghen tot Gilboa: het en moet noch dauwen noch regenen op v, noch ackers zijn daer hefoffers van komen: want aldaer is den Helden haren schilt afgheslaghen: den schilt Sauls, ghelijck als en ware hy niet ghesalft met olye.

22

ⁱ Den boge Ionathan en heeft noyt ghefeylt, ^k ende het sweert Sauls en is noyt ledich weder ghekomen vanden bloede der verslaghenen, ende vanden vette der Helden.

i 1.Sam. 13.a.3. ende 14.b.13.

k 1.Sam. 15.a.7. ende 21.b.11.

23

Saul ende Ionathan vrienthout ende lieflick in haren leuen, en zijn oock inden doot niet ghescheyden: lichter dan den Arendt, ende stercker dan leeuwen.

24

Ghy dochteren Israels weent ouer Saul, die v kleeddet met rozijnuerwe suyuerlick, ende vercierdet v met gulden kleynodien aen uwe kleederen.

25

Hoe zijn de Helden gheuallen inden strijdt? Ionathan is op dyne hoochten verslaghen.

26

Het is my leedt om dynent wille, mijn broeder Ionathan: ick hebbe groote vreucht ende ^l vrolicheyt aen dy ghehadt: dijn liefde is my sonderlicker gheweest dan vrouwen liefde.

l Of, hertenvrolickheyt

27

Hoe zijn de Helden geuallen? ende ^m† de strijdtbare omkomen?

m† And. het harnasch verloren.