Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxxi. Capittel.

1. Israel wert vanden Philisteen gheslagen, 4. Saul doorsteeckt hemseluen, 8. zijn lichaem wert bespot, 11. van dien tot Iabes by nachte ghehaelt, ende tsamen syne sonen eerlicken begrauen.

A.1

DE ^a Philisteen nu, ⁺ streden teghen Israel: ende de mannen Israels vloden voor de Philisteen, ende vielen verslaghen op het gheberchte Gilboa.

a 1.Paral. 10.a.1.

+ Hier wort beschreuen Sauls doot met zijn dry sonen.

2

Ende de Philisteen ^† leyden hen aen Saul ende syne sonen, ende sloeghen Ionathan, ende Abinadab, ende Malchisua, de sonen Sauls.

† And. achteruolchden

3

^b Ende den strijdt wert hardt teghen Saul, ende de schutters schoten op hem met de bogen, ende wert seer ghewont vanden schutters.

b 1.Sam. 24.b.14.

4

Doe sprack Saul tot synen wapendragher: ^c Treckt dijn sweert wt, ende doorsteect my daer mede, ⁺ dat dese onbesnedene niet en komen, ende my doorsteken, ende drijuen eenen spot met my:

c Iudicum 9.f.54.

+ Saul doorsteect hemseluen

[fol. 102v]

doch zijn wapendrager en woude niet, want hy vreesde hem seer: doe nam Saul het sweert, ende viel daer in.

5

Doe nu zijn wapendrager sach, dat Saul doot was, viel hy oock in zijn sweert, ende sterf met hem.

6

Also sterf Saul, ende syne dry sonen, ende zijn wapendragher, ende alle zijn syne mannen te ghelijck op desen dach.

7

Doe nu de mannen Israels, die op ^d† ghene zijde der leechten, ende op ghene zijde der Iordanen waren, sagen, dat de mannen Israels gheuloden waren, ende dat Saul ende zijn sonen doot waren, verlieten sy de stede, ende vloden oock: also quamen de Philisteen, ende woonden daerinne.

d† And. dese zijde

8

^e Des anderen daechs quamen de Philisteen, ⁺ de verslaghenen wt te trecken, ende vonden Saul ende zijn dry sonen, ligghen op het gheberchte Gilboa.

e 1.Paral. 10.a.8.

+ Sauls lichaem wort bespot.

9

Ende hieuwen hem zijn hooft af, ende togen hem zijn wapen wt, ende sondense inder Philisteen lant rontom, te verkondighen inden huyse haerder Afgoden, ende onder den volcke.

B.10

Ende leyden zijn harnasch in het huys Astharoth, daerenteghen zijn lichaem hinghen sy op der mueren te Bethsan.

11

Doe die te ^f Iabes in Gilead hoorden, wat de Philisteen Saul ghedaen hadden,

f 1.Sam. 11.a.1. 2.Sam. 2.a.4.

12

Maecten sy hen op, wat strijdtbare mannen waren, ende ghinghen den gantschen nacht, ende namen de lichamen Sauls ende syner sonen, vander mueren te Bethsan, ende brachtense te Iabes, ende ^g† bereucktense aldaer.

g† And. verbranddense. Ierem. 34.a.5. 2.Paral. 16.b.14.

13

Ende namen haer ghebeenten, ende begroeuense onder den boom te Iabes, ende vasteden seuen daghen.