Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxix. Capittel.

1.Der Philisteen Uorsten en betrouwen hen Dauid ende syner mannen inden krijchstocht niet, 6. De Koninck schicktse weder thuys.

A.1

DE Philisteen vergaderden alle haer heyr te Aphek: ende Israel legherde hem te ^a† Ain in Iesrael.

a† And. fonteyne

2

Ende de Vorsten der Philisteen, ghinghen daer henen met honderden ende met duysenden: ende Dauid ende syne mannen ghinghen achter na by Achis.

3

Doe spraken de Vorsten der Philisteen: Wat sullen dese Hebreen? Achis sprack tot hen: Is dat niet Dauid de knecht Sauls, des Konincx Israels? die nu by my gheweest is Iaer ende dach, ende ick en hebbe niets aen hem gheuonden, sindt der tijt dat hy afgheuallen is, tot nu toe?

4

^b Doch de Vorsten der Philisteen werden toornich op hem, ende spraken tot hem: Laet den man omkeeren, ende aen ^c zijn plaetse blijuen, daer du hem henen bestelt hebst, dat hy niet met ons af en trecke ten strijde, ende onse wederpartije worde inden strijdt: want hoe konde hy synen heere beter een welbehaghen aen doen, dan aen de hoofden deser mannen?

b 1.Paral. 12.b.19.

c 1.Sam. 27.a.6.

5

Is hy niet die Dauid, daer sy van songhen inden reye: ^d Saul heeft duysent gheslaghen, Dauid daerenteghen thien duysent?

d 1.Sam. 18.a.7. ende 21.b.12. Syra. 47.a.7.

6

Doe riep Achis Dauid, ende sprack tot hem: So warachtich als de Heere leeft, ick houde dy redelick, ende dynen wtganck ende inganck met my inden heyre, behaecht my wel, ende en hebbe niet quaets aen dy gespeurt, sindt der tijt, dat du tot my ghekomen bist, tot nu toe: doch du en behaechst den Vorsten niet.

7

So keert nu om, ende gaet henen met vreden, op dat du niet quaets en doest, voor den ooghen der Vorsten der Philisteen.

8

Dauid daerenteghen sprack tot Achis: Wat hebbe ick ghedaen, ende wat hebstu ghespeurt aen dynen knecht, sindt der tijt dat ick voor dy gheweest ben, tot nu toe, dat ick niet sal komen ende strijden, teghen de vyanden mijns heeren des Konincx?

9

Achis antwoordde ende sprack tot Dauid: Ick weet het wel: want du behaghest mynen oogen, als een Enghel Gods: doch der Philisteen Vorsten hebben gheseyt: Laet hem niet met ons op inden strijdt trecken.

[fol. 102r]

B.10

So maect dy nu morghen vroech op, ende de knechten dijns heeren, die met dy gekomen zijn: ende wanneer ghy v morghen vroech opgemaeckt hebt, dat het licht is, so gaet henen.

11

Also maecten hen Dauid ende syne mannen vroech op, dat sy des morgens wech ghinghen, ende weder in der Philisteen lant quamen, de Philisteen daerenteghen toghen op na Iesrael.