Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxviij. Capittel.

1. So de Philisteen inden strijdt trecken teghen Israel, wert Dauid gheset ten hoofthoeder Achis, 7. Saul beangstighet vraecht raedt eender toouenersse, 11. laet hem (als hy meynt) den Samuel opbrenghen, 16. ende so hy syne, ende des gantschen Israels straffe hoort, ouer syner onghehoorsaemheyt, 20. wert hem so bange, 23. dat hy hem aller lijfs nootdruft afslaet.

A.1

ENde het gheschiedde ter seluer tijt, dat de Philisteen haer heyr vergaderden in eenen strijdt te trecken teghen Israel: ende Achis sprack tot Dauid: Du salt weten, dat du, ende dyne mannen sullen met my wttrecken int heyr.

[fol. 101v]

2

Dauid sprack tot Achis: Wel aen, du salt beuinden wat dijn knecht doen sal. Achis sprack tot Dauid: Daerom wil ick dy ten bewaerder mijns hoofts setten, mijn leefdaghe.

3

^a Ende Samuel was ghestoruen, ende gantsch Israel hadde leedt om hem ghedraghen, ende hem begrauen in syner stadt Rama: ^b so hadde Saul wt den lande verdreuen de Waersegghers ende Teeckenbedieders.

a 1.Sam. 25.a.1. Dat vertelt de Schrift daerom, opdat sy een yegelic waerschouwe dat hy de nauolgende speuckerije van Samuel, recht versta, ende wete dat Samuel doot zy, ende dat sulcx de boose gheest metter toouenersse ende Saul spreeckt ende doet, in Samuels persoon ende name.

b Exod. 22.b.18.

4

Doe hen nu de Philisteen vergaderden, ende quamen ende legherden hen tot Sunen, doe vergaderde Saul oock het gantsche Israel, ende legherden hen tot GilBoa.

5

Doe nu Saul der Philisteen heyr sach, vreesde hy hem, ende zijn herte vertzaechde gantsch seer.

6

^c Ende hy vraechde raet den Heere, doch de Heere en antwoordde hem niet, noch door droomen, noch door het ^d† Licht, noch door Propheten.

c 1.Sam. 14.d.37.

d Dat Licht, is, dat op den borstlap des Ouerpriesters was, Exod. 28.d.

† An. Urim.

7

Doe sprack Saul tot synen knechten: Soeckt my een vrouwe, ^e die eenen waersegghenden gheest heeft, dat ick tot haer gae, ende haer vraghe. Sijn knechten spraken tot hem: Siet, te Endor is een vrouwe, die heeft eenen waerseggenden gheest.

e Leuitic. 20.c.27. Deuter. 18.b.11.

8

Ende Saul wisselde zijn kleederen om, ende tooch ander aen, ⁺ ende ghinck henen ende twee mannen met hem, ende quamen by nacht tot der vrouwen, ende sprack: Lieue, propheteert my door den waerseggenden gheest, ende brengt my op, dien ick dy segghe.

+ Saul vraecht raet eender toouenerssche tot Endor.

9

De vrouwe sprack tot hem: Siet, du weetst wel, wat Saul ghedaen heeft, hoe hy de Waersegghers ende Teeckenbedieders wtgeroeyt heeft vanden lande: waerom wiltu dan mijn ziele in het nette voeren, dat ick ghedoodt worde?

B.10

Saul dan swoer haer by den Heere, ende sprack: So warachtich als de Heere leeft, het en sal dy ter misdaet niet ghedijen.

11

Doe sprack de vrouwe: Wien sal ick dy dan op brenghen? Hy sprack: Brengt my Samuel op.

12

Doe nu de vrouwe Samuel sach, schreydde sy luyde, ende sprack tot Saul: Waerom hebstu my bedroghen? du bist Saul.

13

Ende de Koninck sprack tot haer: Vreest dy niet: wat siestu? de vrouwe sprack tot Saul: Ick sie ^f Goden opklimmen wt der Aerden.

f Dat is, Richters Exod. 22. ende den zijden rock is den Priesterlicken rock, Exod. 28.

14

Hy sprack: Hoe is de ghestalte? Sy sprack: Daer koemt een oudt man op, ende is bekleedt met eenen zijden rock: doe vernam Saul, dat het Samuel was, ende neychde hem met synen aenghesichte ter Aerden, ende badt aen.

15

^g Samuel nu sprack tot Saul: Waerom hebstu my onrustich ghemaeckt, dat du my opbrenghen latest? Saul sprack: Ick ben seer beancxst: de Philisteen krijghen teghen my, ende God is van my gheweken, ende en antwoordt my niet, noch door Propheten, noch door droomen: daerom hebbe ick dy laten eysschen, dat du my wijsest wat ick doen soude.

g Syrac. 46.c.23.

16

Samuel sprack: Wat wiltu my vraghen, dewijle dat de Heere van dy gheweken, ende dijn vyant gheworden is?

17

De Heere sal dy doen, ^h als hy door my ghesproken heeft, ende sal het Rijcke van dyner hant scheuren, ende Dauid dynen naesten gheuen:

h 1.Sam. 15.c.28.

18

Daerom dat du der stemme des Heeren niet ghehoort, ende de grimmicheyt zijns toorns niet wtghericht en hebst teghen Amalek: daerom heeft dy de Heere als nu sulcx ghedaen.

19

Daertoe sal de Heere Israel met dy, oock inder Philisteen handen gheuen: ⁱ morghen saltu ende dyne sonen met my zijn: oock sal de Heere het heyr Israels inder Philisteen hant gheuen.

i 1.Sam. 31.a.5.

C.20

Doe viel Saul haestelick ter Aerden, so lanck als hy was, ende verschricte seer vanden woorden Samuels, dat daer gheen kracht meer in hem en was: want hy en hadde niets ghegheten den gantschen dach, ende den gantschen nacht.

21

Ende de vrouwe ghinck tot Saul in, ende sach dat hy seer verschrict was, ende sprack tot hem: Siet, dyne maecht heeft dyner stemme gehoort, ende hebbe mijn ziele in myne hant geset, dat ick dyne woorden ghehoort hebbe, die du tot my seydest.

22

So hoort nu oock de stemme dyner maecht:^k ick wil dy een bete broots voor setten, dat du etest, dat du tot krachten komest, ende dyne strate gaest.

k Gene. 18.a.5.

23

Doch hy weygerde hem, ende sprack: Ick en wil niet eten: doe noodichden hem zijn knechten, ende de vrouwe, dat hy harer stemmen hoorde: ende hy stont op vander Aerden, ende settede hem opt bedde.

24

Ende de vrouwe hadde een ghemest kalf in huys: doe haeste sy haer, ende slachtedet: ende nam meel, ende kneeddet, ende bieck het ongeheuelt,

25

Ende brachte het voor Saul ende voor syne knechten: ende doe sy ghegheten hadden, stonden sy op, ende ghinghen den nacht ouer.