Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxvii. Capittel.

1. Dauid vliedt tot Achis den Koninck tot Gath, 5. die gheeft hem Ziklag in, 8. de Philisteen werden van hem bekrijcht, 11. ende Achis bedroghen.

A.1

DAuid dan dachte in syner herten: ⁺ Ick sal der daghen een Saul in de handen vallen: my is niet beter, dan dat ick ontuliede in der Philisteen lant, dat Saul van my aflate my voortaen te soecken in allen lantpalen Israels, so sal ick synen handen ontkomen.

+ Dauid vlucht voor Saul, tot Achis den Koninck te Gath.

2

^a Ende maecte hem op, ende ghinck ouer met den seshondert mannen, die by hem waren, tot Achis, den sone Maoch, de koninck te Gath.

a 1.Sam. 21.b.10.

3

Also bleef Dauid by Achis tot Gath, met synen mannen, een yeghelick met synen huyse: Dauid oock met synen ^b twee wijuen, Ahinoam de Iesreelitische, ende Abigail Nabals wijf der Carmelitischen.

b 1.Sam. 30.a.5.

4

Ende doe het Saul gheseyt wert, dat Dauid na Gath gheuloden ware, en socht hy hem niet meer.

5

Ende Dauid sprack tot Achis: Hebbe ick ghenade voor dynen ooghen gheuonden, so laet my een ruymte gheuen, in een der steden op den lande, dat ick daerin woone: wat sal dijn knecht in de Konincklicke stadt by dy woonen?

6

Doe gaf hem Achis dies daechs Ziklag: ⁺ daer uan is Ziklag der Koningen Iuda, tot op desen dach.

+ Ziklag Dauids stadt.

7

Den tijt nu die Dauid inder Philisteen lant woonde, is ^c† vier maent.

c† And. maenden, ende sommighe daghen. And. een Iaer, ende vier maenden.

8

Dauid nu tooch op met tsamen synen mannen, ende viel int lant der ^d Gessuriters, ende Girgisiters, ende Amalekiters: want dese waren van oudts af de inwooners deses lants, alsmen koemt tot Sur, tot aen Egypten lant.

d 2.Sam. 13.d.37.

9

Doe dan Dauid dat lant sloech, ^e liet hy noch mans noch vrouwen leuen, ende nam schapen, runderen, Esels, kemelen ende kleederen, ende keerde weder, ende quam tot Achis.

e Deut. 20.b.13.

B.10

Wanneer dan Achis seyde: En hebt ghy heden gheenen inual ghedaen? so sprack Dauid: Teghent Suyden Iuda, ende teghent Suyden der Ierahmeeliters, ende tegent Suyden der Keniters.

11

Ende Dauid en liet noch man noch vrouwe leuendich tot Gath komen, ende dachte: Sy mochten teghen ons spreken, ende klappen: also dede Dauid, ende dat was zijn wijse, so langhe als hy inder Philisteen lant woonde.

12

Daerom geloofde Achis Dauid, ende dachte: Hy heeft hem stinckende gemaect voor zijn volck Israel: daerom sal hy altoos mijn knecht zijn.