Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxij. Capittel.

1. Dauid staet zijn vrienden ende anderen bekommerden lieden voor, tot Adullam, 3. laet zijn ouderen by der Moabiten Koninc, 5. ende gaet wt rade Gads, in het landt Iuda, 7. Saul beschuldicht de synen heymelickes verbondts met hem, 9. laet wt verraden ende hantplicht Doeg, den Ahimelich met tsamen zijns vaders gantsche huys, vijf ende tachtentich Priesters, schandelicken vermoorden, 19. ende haer stadt Nobe met den sweerde slaen, 20. Abiathar een sone Ahimelech ontloopt, ende seyt het Dauid aen.

A.1

DAuid ghinck van daer, ende vluchte in de ^a† speloncke Adullam: doe dat syne broederen hoorden, ende het gantsche huys zijns vaders, quamen sy derwaerts tot hem af.

a† and. het hol Psalm. 57.a.1.

2

^b Ende allerley mannen die in noot ende schult, ende eens bedroefden herten waren, vergaderden haer tot hem: ende hy was haer Ouerste, ^c dat daer by vier hondert mannen by hem waren.

b Iudic. 11.a.3.

c 1.Sam. 23.b.13.

3

Ende Dauid ghinck van daer na Mizpe, in der Moabiten lant, ende sprack tot der Moabiten Koninc: Laet mynen vader ende myne moeder by v wt ende in gaen, tot dat ick verneme, wat God met my doen sal.

4

Ende hy lietse voor den Koninck der Moabiten, dat sy by hem bleuen, so lange als Dauid in de Borcht was.

5

Ende de Propheet Gad sprac tot Dauid: ⁺ Blijft niet in de Borcht, ^d maer gaet henen, ende koemt int lant Iuda: ^e doe ghinck Dauid henen, ende quam in het wout Hareth.

+ De Propheet Gad is by Dauid.

d Matth. 2.c.20.

e Psalm. 63.a.1.

6

Ende het quam voor Saul, dat Dauid ende de mannen die by hem waren, hier voor gekomen waren: als nu Saul tot Gibea woonde, onder eenen ^f† hagen in Rama, ⁺ hadde hy zijn^g† spiesse in de hant, ende alle syne knechten stonden by hem.

f† and. wout

+ Saul poget na Dauid.

g† and. speer.

7

Doe sprack Saul tot synen knechten, die by hem stonden: Hoort ghy kinderen Iemini, Sal oock de sone Isai v alle ackers, ende wijnberghen geuen, ende v alle ouer duysent ende ouer hondert tot Ouersten maken?

8

Dat ghy v alle verbonden hebt teghen my, ^h ende daer en is niemandt die het mynen ooren openbaerde, ⁱ dewijle dat oock mijn soon een verbont gemaect heeft met den sone Isai: daer en is niemant onder v, die het krencke mynent haluen, ende het mynen ooren openbare: want mijn soon heeft mynen knecht teghen my opghewect, dat hy my nastelt, als het aen den dach is.

h 2.Reg. 6.b.11.

i 1.Samue. 18.a.3. ende 20.a.8.b.16. ende 23.b.18.

9

Doe antwoordde Doeg de Edomiter, ⁺ die by den knechten Sauls stondt, ende sprack: ^k Ick sach den sone Isai, dat hy tot Nobe quam tot Ahimelech den sone Achitob,

+ Doeg.

k 1.Sam. 21.a.7. Psalm. 50.c.20. ende 52.a.2.

B.10

Die vraechde raedt voor hem den Heere, ende gaf hem spijse, ende het sweerdt Goliath des Philisteus.

11

Doe sandt de Koninc henen, ende liet roepen Ahimelech den Priester, den sone Achitob, ende zijns vaders gantsche huys, ende de Priesters die tot Nobe waren: ende sy quamen alle totten Koninck.

12

Ende Saul sprack: Hoort du sone Achitob: Hy sprack: hier ben ick mijn heere.

13

Ende Saul sprack tot hem: Waerom hebt ghy een verbont teghen my ghemaect, du ende de sone Isai, dat du hem broot ende dat sweert gegeuen, ende God voor hem raedt gheuraecht hebst, dat du hem verweckest, dat hy my na stelle, als het aen den dach is?

14

Ahimelech antwoordde den Koninck, ende sprack: Ende wie is onder dynen knechten, als Dauid, die trouwe is, ende des Konincx Schoonsoon, ende gaet in dyne ghehoorsaemheyt, ende is heerlick ghehouden in dyne huyse?

15

Hebbe ick dan heden eerst aen gheuanghen God voor hem raedt te vraghen? dat zy verre van my: de Koninc en legge sulcx synen knecht niet op, in den gantschen huyse mijns vaders: want dijn knecht heeft van allen desen niets geweten, noch kleyn noch groot.

16

Doch de Koninck sprack: Ahimelech, du moetest den doot steruen, du ende dijns vaders gantsche huys.

17

Ende de Koninck sprack tot synen Trawanten, ⁺ die by hem stonden: Wendet v, ende doodt des Heeren Priesters: want haer handt is oock met Dauid: ende doe sy wisten dat hy vluchte, hebben sy het my niet geopenbaert: Doch de knechten des Konincks wouden hare handen aen de Priesters des Heeren niet legghen, hen te verslaen.

+ Saul laet 85. Priesters vermoorden om Dauids wille.

18

Doe sprack de Koninc tot Doeg: Wendet du dy, ende verslaet de Priesters: ^l Doeg de Edomiter wendde hem, ⁺ ende versloech de Priesters, dat dies daechs storuen vijf en tachtentich mannen, die lijnen ^m† lijfrocken droeghen.

l 1.Samu. 2.d.31. 2.Samu. 21.a.1.

+ Doeg moordet de Priesters.

m† and. Ephod

19

Ende de stadt der Priesters Nobe, sloech hy met der scherpte des sweerdts, beyde mannen ende vrouwen, kinderen ende soochkinderen, ossen, ende ezels, ende schapen.

C.20

Daer ontquam dannoch een soon Ahimelech, ⁺ des soons Achitob, die hiet Abiathar, ende vluchtede tot Dauid.

+ Abiathar een sone Ahimelech, ontloopt.

21

Ende verkondichde hem, dat Saul de Priesters des Heeren verworcht hadde.

22

Dauid dan sprack tot Abiathar: Ick wiste het wel aen dien daeghe, doe de Edomiter Doeg daer was, dat hy het Saul soude seggen: ick ben schuldich aen allen zielen des huys dijns vaders.

23

Blijft by my, ende vreest dy niet: wie na mynen leuen staet, die sal ooc na dynen leuen staen, ende salt met my behouden worden.