Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xix. Capittel

1. Ionathan waerschout Dauid, 4. spreeckt van hem het beste, 6. ende stilt zijns vaders quaden moet, 8. Dauid slaet wederom de Philisteen, 10. verkrijght daermede datmen hem na zijn leuen stelt, 11. ende moet hem door hulpe Michal met vluchte daeruan brengen, 19. Saul ende syne dienaers, so sy den Dauid naiaghen, worden met den propheterenden Propheten.

A.1

SAul dan sprack met synen sone Ionathan, ⁺ ende met alle syne knechten, dat sy Dauid souden dooden: ^a doch Ionathan Sauls sone hadde hem seer lief,

+ Ionathan waerschout Dauid.

a 1.Sam. 18.a.1.3.

2

Ende verkondichde het hem, ende sprack: Mijn vader Saul poghet daer na, dat hy dy doode: so bewaert dy nu des morgens, ende blijft verborghen, ende versteeckt dy.

3

Doch ick wil wtgaen, ⁺ ende by mynen vader staen, op den velde daer du bist, ende van dy

+ Ionathan spreeckt voor Dauid.

[fol. 98r]

met mynen vader spreken, ende wat ick sie, dat wil ick dy kondt doen.

4

Ende Ionathan sprack het beste van Dauid, met synen vader Saul, ende seyde tot hem: De Koninck besondige hem niet aen synen knecht Dauid, want hy heeft gheen sonde teghen dy ghedaen: ende zijn doen is dy seer nut.

5

^b Ende hy heeft zijn leuen in zijn hant gheset, ende sloech den Philisteus, ende de Heere dede eenen grooten Heyl den gantschen Israel: dat hebstu ghesien, ende dy des verblijdt, waerom wiltu dy dan, aen onschuldich bloedt besondighen, dat du Dauid sonder oorsake doodest?

b 1.Sam. 17.e.49.

6

Doe hoorde Saul der stemme Ionatha, ende swoer: So warachtich als de Heere leeft, hy en sal niet steruen.

7

Doe riep Ionathan Dauid, ende seyde hem alle dese woorden, ende brachte hem tot Saul, dat hy voor hem was, als te voren.

8

Daer verhief hem eenen krijch weder: ende Dauid tooch wt, ende krijchde tegen de Philisteen, ende dede eenen grooten slach, dat sy voor hem vloden.

9

^c Doch de boose gheest van den Heere quam ouer Saul, ⁺ ende hy sat in synen huyse, ende hadde een spiesse in syner hant: ende Dauid speelde op de snaren met der hant.

c 1.Sam. 16.b.14. ende 18.b.10.

+ Saul legghet Dauid laghen op dat hy hem ombrenghe.

B.10

Ende Saul poochde Dauid met der spiesse aen de wandt te spitten: doch hy ontweeck van Saul, ende de spiesse vlooch in de wandt: Dauid dan vluchtede, ende ontquam denseluen nacht.

11

Saul nu sandt boden henen tot Dauids huys, dat sy hem bewaerden, ende doodden des morghens: dat verkondichde den Dauid zijn wijf Michal, ende sprack: Ist dat du desen nacht dijn ziele niet ^d verlossest, so moestu morghen steruen.

d Oft, behoedest, daer van makest,

12

^e Doe liet hem Michal door de venster neder, ⁺ dat hy henen ghinck, ontuluchte ende ontquam.

e Iosue 2.b.15. Actu. 9.c.28

+ Michal helpet Dauid daeruan.

13

Ende Michal nam een beelt, ende leyde het int bedde, ende leyde een geytenvel tot synen hoofde, ende decte het met kleederen toe.

14

Doe sandt Saul boden henen, dat sy Dauid haleden: doch sy sprack: Hy is kranck.

15

Saul dan sandt boden henen, Dauid te besien, ende ende sprac: Brengt hem op tot my met den bedde, dat hy ghedoodt worde.

16

Doe nu de boden quamen, siet, doe lach dat beeldt int bedde, ende een geytenvel tot synen hoofde.

17

Doe sprack Saul tot Michal: Waerom hebstu my bedroghen, ende mynen vyandt verlaten, dat hy ontuluchte: Michal sprack tot Saul: Hy sprack tot my: Laet my gaen, of ick doode dy.

18

Dauid dan ontuluchte, ⁺ ende ontliep, ende quam tot Samuel te Rama, ende seyde hem aen alles wat hem Saul ghedaen hadde: ende hy ghinck henen met Samuel, ende bleuen te Naioth.

+ Dauid vlucht voor Saul.

19

Ende het werdt Saul aengheseyt: Siet, Dauid is te Naioth in Rama.

C.20

Doe sandt Saul boden henen, dat sy Dauid haleden: ende sy saghen ^f† twee chooren Propheten propheteren, ende Samuel was haer Opsiender: Doe quam den Geest Gods op de boden Sauls, dat sy oock propheteerden.

f† an. eenen hoop

21

Doe dat Saul wert aengheseyt, sandt hy andere boden henen, die propheteerden oock: Doe sandt hy de derde boden henen, die propheteerden oock.

22

Doe ghinck hy selue na Rama, ende doe hy quam ten grooten bornput, die tot Seku is, vraechde hy, ende sprack: Waer is Samuel ende Dauid? doe wert hem gheseyt: Siet, te Naioth in Rama.

23

Ende hy ghinck aldaer henen, na Naioth in Rama: ende de Gheest Gods quam oock op hem, ende ghinck, ende propheteerde tot dat hy quam te Naiothin Rama.

24

Ende hy tooch oock syne kleederen wt, ende propheteerde oock voor Samuel, ende viel ^g bloot neder den gantschen dach ende den gantschen nacht: daer wt spreecktmen: ^h Is Saul oock onder de Propheten?

g Niet dat hy naect geweest zy, maer hy heeft de Konincklicke kleederen afgeleyt, ende slechts ghemeyne kleederen aen behouden, als een ander mensche. Ende viel neder etc. dat is, hy badt met hen, ende wanneer sy neder vielen, so viel hy oock neder met hen.

h 1.Sam. 10.b.12.