Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xiij. Capittel.

1. De Philisteen van Saul ende Ionathan gheslaghen, 5. wedergaen den strijdt met ontallicke krijchsrustinghe, 6. Israel versteeckt hem van banghicheydt, 9. Saul wert gestraft zijns offers haluen, 15. telt zijn volck, 19. ende vindt het ouer al wapenloos.

A.1

SAul was ^a† een Iaer Koninc geweest, ende doe hy twee Iaer ouer Israel gheregeert hadde,

a† an. [als] een iarich kint in synen Rijcke, ende doe etc. 1.Sam. 15.b.17.

2

Verkoos hy hem dry duysent mannen wt Israel: twee duysent waren met Saul te Michmas ende op het gheberchte BethEl, ende een duysent met Ionathan tot Gibea BenIamin, nu het ander volck liet hy gaen, eenen yeghelicken in zijn hutte.

3

Doch Ionathan sloech de Philisteen in haren legher, ^{+ b} die tot Gibea was: dat quam voor de Philisteen: ende Saul liet de basuynen blasen inden gantschen lande, ende segghen: Dat latet de Hebreen hooren.

+ Ionathan slaet de Philisteen.

b 1.Sam. 10.a.5.

4

Ende het gantsche Israel hoorde seggen: Saul heeft der Philisteen legher gheslagen: want Israel stanck voor den Philisteen: ende alle dat volck schreydde Saul na, na Gilgal.

[fol. 95r]

5

Doe vergaderden hen de Philisteen te strijden met Israel, dertich duysent wagenen, ses duysent ruyters, ende ander volck, so vele als des zandts aenden Oeuer der Zee: ende toghen op, ende legherden hen te Michmas, tegent Oosten voor BethAuen.

6

Doe dat de mannen Israels saghen dat sy in nooden waren (want den volcke was banghe) verstaken sy hen in de speloncken ende kuylen, ende rotzsteenen, ende holen, ende bornputten.

7

De Hebreen nu, ghinghen ouer de Iordane, int lant Gad ende Gilead: ende Saul was noch tot Gilgal, ende alle dat volck wert achter hem vertzaecht.

8

^c Doe toefde hy seuen daghen, op den tijt van Samuel bestemt: ende doe Samuel niet en quam tot Gilgal, verstroyde hen het volck van hem.

c 1.Sam. 10.a.8.

9

Doe sprack Saul: ⁺ Brengt my herwaerts brantoffer ende danckoffer: ende hy offerde brantoffer.

+ Saul offert brantoffer.

B.10

Als hy nu dat brandtoffer volbracht hadde, siet, doe quam Samuel: doe ghinc Saul wt hem teghen, hem te seghenen.

11

Samuel daerentegen sprack: ⁺ Wat hebstu ghemaeckt? Saul antwoordde: Ick sach dat hen het volck van my verstroyde, ende du en quaemst niet ter bestemder tijt, ende de Philisteen waren vergadert te Michmas.

+ Samuel straft Saul.

12

Doe sprack ick: Nu sullen de Philisteen tot my afkomen te Gilgal, ende ick en hebbe het aenghesicht des Heeren niet ghebeden: doe waechde ick het, ende offerde brantoffer.

13

Samuel daerenteghen sprack tot Saul: Du hebst sottelick ghedaen, ende niet ghehouden des Heeren dijns Godts ghebot, dat hy dy gheboden heeft: want hy hadde dijn Rijcke ^d beuesticht ouer Israel voort ende voort.

d Of, stadtgrijpich ghemaeckt

14

Doch nu en sal dijn Rijcke niet bestaen, ^e de Heere heeft hem eenen man wtghesocht na zijnder herten, dien heeft de Heere gheboden, Vorst te zijn ouer zijn Rijck: want du en hebst des Heeren ghebot niet ghehouden.

e 1.Sam. 16.b.13. Psalm. 78.h.70. Act. 13.c.22.

15

Ende Samuel maeckte hem op, ende ghinck van Gilgal op na Gibea BenIamin: ^f ende Saul telde het volck dat by hem was, by ses hondert mannen.

f 1.Sam. 11.a.8. ende 15.a.4.

16

Saul ende zijn sone Ionathan, ende het volck dat by hem was, bleuen op den kleynen berch te BenIamin, de Philisteen daerentegen hadden hen gheleghert te Michmas.

17

Ende wt den legher der Philisteen togen dry hoopen, het lant te verderuen: den eenen keerde hem op de strate na Ophra, int lant Sauls:

18

Den anderen keerde hem op de strate BethHoron, den derden keerde hem op de strate, die daer gaet na den dale Zeboim, aen der woestijne.

19

^g Ende daer en wert gheen smit inden gantschen lande Israels gheuonden, want de Philisteen dachten: De Hebreen mochten sweerden ende spiessen maken.

g Iudic. 5.a.7.

C.20

Ende gantsch Israel moest af trecken tot den Philisteen, wanneer yemant hadde een ploechijser, houweel, bijl, of ^h† seyssen te scherpen.

h† And. saegijser

21

Ende de sneden aen de seyssens, ende houweelen, ende gaffelen, ende bijlen waren afghearbeydet, ende de scherpen stomp gheworden.

22

Doe nu den strijdtdach quam, en wert daer gheen sweert, noch spiesse geuonden in des gantschen volcx hant, dat met Saul ende Ionathan was, behaluen Saul ende zijn sone hadden wapen.

23

Ende der Philisteen legher tooch wt voor Michmas ouer.