Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xi. Capittel.

1. De Ammoniters bekrijgen Israel, 6. den Gheest Gods koemt ouer Saul, 11. die slaetse, 14. ende wert in synen Rijcke beuesticht.

A.1

ENde Nahas de Amoniter tooch opwaerts, ⁺ ende belegherde Iabes in Gilead: ende alle mannen te Iabes, spraken tot Nahas: Maeckt een verbont met ons, so willen wy dy dienen.

+ Nahas bekrijcht Israel. Iudic. 10.b.17.

2

Doch Nahas de Amoniter antwoordde hen: Daer wil ick een verbont met v in maken, dat ick v alle de rechte ooghe wt steke, ende make v te schanden onder het gantsche Israel.

3

Doe spraken tot hem alle Oudtsten te Iabes: Gheeft ons seuen dagen, dat wy boden senden in alle lantpalen Israels: is daer dan niemant die ons verlosse, so willen wy tot dy wt gaen.

4

Doe quamen de boden te Gibea tot Saul, ende seyden sulcx voor de ooren des volcx: doe hief alle dat volck zijn stemme op, ende weende.

5

Ende siet, doe quam Saul vanden velde, achter den runderen, ende sprack: Wat is den volcke, dat het weent? doe vertelden sy hem de sake der mannen van Iabes.

6

^a Doe wert den Gheest Gods veerdich ouer hem, ⁺ als hy sodanighe woorden hoorde, ende synen toorn vergrimde seer.

a 1.Sam. 10.b.10.

+ Den Gheest Gods koemt ouer Saul.

7

Ende nam een paer ossen, ^b ende hieuse in stucken, ende sandtse in alle lantpalen Israels, door de boden, ende liet segghen: Wie niet wttreckt Saul ende Samuel na, diens runderen salmen also doen: doe viel de vreese des Heeren op het volck, dat sy wttogen, gelijck als een eenich man.

b Iudic. 19.c.29.

8

^c Ende men maecte de ordeninge te Basek: ende der kinderen Israels waren, dry hondert mael duysent mannen, ende der kinderen Iuda xxx. duysent.

c 1.Sam. 13.b.15. ende 15.a.4.

9

Ende sy seyden den boden die daer ghekomen waren: Also segghet den mannen te Iabes Gilead: Morghen sal v hulpe gheschieden, wanneer de Sonne beghint heet te schijnen: doe de boden quamen, ende verkondigen dat den mannen te Iabes, doe werden sy vrolick.

B.10

Ende de mannen Iabes spraken: Morghen willen wy tot v wtgaen, dat ghy ons doet alles wat v behaecht.

11

^d Ende des anderen morgens, ordineerde Saul het volck in dry hoopen, ende quamen inden leger om de morghenwake, ende sloech de Ammoniten tot dat den dach heet wert: die nu ouerbleuen, die werden also verstroyt, dat haerder niet twee by malcanderen en bleuen.

d Iudic. 7.b.16. 1.Sam. 18.a.2.

12

Doe sprack het volck tot Samuel: Wie zijn sy die daer seyden: ^e Soude Saul ouer ons heerschen? gheeftse herwaerts de mannen, dat wyse dooden:

e 1.Sam. 10.c.28.

[fol. 94v]

13

Saul daerenteghen sprack: Daer en sal op desen dach niemant steruen: want de Heere heeft heden Heyl ghegheuen in Israel.

14

Samuel sprack ten volcke: Koemt, laet ons na Gilgal gaen, ende het Koninckrijcke aldaer vernieuwen.

15

Doe ginck alle dat volck na Gilgal, ende maecten aldaer Saul ten Koninck, voor den Heere tot Gilgal, ende offerden danckoffer voor den Heere: ende Saul met tsamen allen mannen Israels verblijdden hen aldaer gantsch seer.