Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat x. Capittel.

1. Saul wort met sommighe teeckenen tot Koninck ouer Israel ghesalft, 9. krijcht een ander herte, 10. propheteert, 14. ende verbercht des Koninckrijcks handel, 17. Samuel settet den volcke syne sonden voor ooghen, 21. gheeft hen synen Koninck, 27. dien sy niet alle aennemen, 26. ende schrijft desseluen recht in een boeck.

A.1

DOe ^a nam Samuel een olyglas, ⁺ ende goot op zijn hooft, ende kuste hem, ende sprac: ^b Siestu dat dy de Heere ten Vorst ouer ^c zijn erfdeel ghesalft heeft?

a 1.Sam. 16.b.13.

+ Saul wert ten Koninck ouer Israel gesalft.

b Hose. 9.b.15. Act. 13.c.21.

c Deut. 9.c.26.

2

Wanneer du nu van my gaest, so saltu twee mannen vinden by ^d den graue Rahel, in de lantpale BenIamin tot Zelzah, die sullen tot dy segghen: De eselinnen zijn geuonden, die du te soecken bist wt gegaen: ende siet, dijn vader heeft de

d Gen. 35.b.19.

[fol. 94r]

Esels wt der sorghen ghelaten, ende sorghet voor v, ende seyt: Wat sal ick om mynen sone doen?

3

Ende wanneer du van daer voortaen gaest, so saltu komen tot der eycken Thabor, aldaer sullen dy aenkomen dry mannen, die opgaen tot God na ^e BethEl: deen draecht dry bocxkens, de ander dry stucken broots, de derde een flessche met wijn.

e Iosue 18.b.13.

4

Ende sy sullen dy vriendelick groeten, ende dy twee brooden gheuen, die saltu van haren handen nemen.

5

Daer na saltu komen op den berch Gods, daer der Philisteen legher is: ende wanneer du aldaer in de stadt koemst, sal dy ontmoeten eenen hoop Propheten, vander hoochte af komende, ende voor hen een Psalter, ende Tamborijnen, ende pijpen, ende harpen, ende sy propheterende.

6

^f Ende de Gheest des Heeren sal veerdich worden ouer dy, dat du met hen salt propheteren, so saltu een ander man worden.

f Iudic. 25.b.14.

7

Wanneer dy nu dese teeckenen komen, ^g so doet wat dy voor handen koemt, want God is met dy

g 2.Sam. 7.a.3. 2.Paral. 17.a.2.

8

Du salt voor my af gaen na Gilgal, siet, daer wil ick tot dy af komen, te offeren brantoffer ende danckoffer: ^h seuen dagen saltu beyden, tot dat ick tot dy kome, ende dy kondt doe, wat du doen salt.

h 1.Sam. 13.a.8.

9

Ende doe hy zijn schouderen keerde, dat hy van Samuel ghinck, gaf hem God een ander herte, ende alle dese teeckenen quamen op den seluen dach.

B.10

Ende doe sy quamen aen den berch, siet, doe quam eenen hoop ⁱ Propheten tegen, ^k ende den Gheest Gods wert veerdich ouer hem, dat hy onder hen propheteerde.

i By Propheten verstaen de Hebreen Propheten leerionghers, die hen der leere der H. Schriften beulijtighen.

k 1.Sam. 11.a.6.

11

Doe hem nu alle die saghen die hem te voren ghekent hadden, dat hy met den Propheten propheteerde,

12

Spraken sy alle onder malcanderen: Wat is den sone Kis gheschiet? is Saul oock onder den Propheten?

13

Ende een aldaer antwoordde, ende sprack: ^l Wie is haer vader? ^m daer is een spreeckwoort af gekomen: Is Saul oock onder de Propheten?

l Dat is, Laetse propheteren, Het en is hen doch van vader niet aengeboren, maer van God, die is de rechte vader.

m 1.Sam. 19.c.24.

14

Ende doe hy wt ghepropheteert hadde, quam hy op de hoochte.

15

Ende Sauls Oom sprack tot hem, ende tot synen Ionghen: Waer zijt ghy henen ghegaen? Sy antwoordden: De Ezelinnen te soecken: ende doe wy sagen dat sy niet daer en waren, quamen wy tot Samuel.

16

Doe sprack Sauls Oom: Segt my, wat seyde v Samuel?

17

Saul antwoordde synen Oom: Hy seyde ons dat de Ezelinnen gheuonden waren: doch vanden Konincrijcke en seyde hy hem niet, wat Samuel gheseyt hadde.

18

Samuel dan eyschte het volck te samen ten Heere na Mizpa,

19

Ende sprack tot den kinderen Israels: So seyt de Heere de God Israels: Ick hebbe Israel wt Egypten gheleydt, ende v van der Egyptenaren hant verlost, ende vander hant aller Konincrijcken, die v dwonghen.

C.20

ⁿ Ende ghy hebbet heden uwen God verworpen, die v wt alle uwen ongheluck ende droeffenisse gheholpen heeft, ende seydet tot hem: Set eenen Koninck ouer ons: wel aen, so treedt nu voor den Heere, na uwen stammen ende ^o† maechschappen.

n 1.Sam. 8.a.7.

o† And. Hooftlieden.

21

^p Doe nu Samuel alle stammen Israels daer toe bracht, wert geraect den stamme BenIamin.

p Iosue 7.b.16. Ione 1.a.7.

22

Ende doe hy de stamme BenIamin daertoe brachte met synen gheslachten, wert geraect het gheslachte Matri, ⁺ ende wert gheraect Saul de sone Kis: ende sy sochten hem, doch sy en vonden hem niet.

+ Voor de eere salmen vlieden, ende hem daer toe drijuen laten

23

Doe vraechden sy voorder den Heere, Sal hy oock noch herwaerts komen? de Heere antwoordde: Siet, hy heeft hem onder de vaten versteken.

24

Doe liepen sy henen, ende haelden hem van daer: ende doe hy onder het volck tradt, ^q† was hy eens hoofts langher dan alle dat volck.

q† And. doe ginc hy hooch bouen alle het volck van de schouderen aen, ende daer bouen.

25

Ende Samuel sprack tot allen volcke: Daer siet ghy welcken de Heere verkoren heeft: doe iuychte alle dat volck, ende sprack: ^r Gheluck ende Heyl den nieuwen Koninck.

r 1.Reg. 1.c.29.

26

^s Samuel nu, seyde den volcke alle dat recht des Koninckrijcx, ende schreef het in eenen boeck, ende leyde het voor den Heere: ^t ende Samuel liet alle het volck gaen, eenen yegelicken in zijn huys.

s Deut. 17.b.15. 1.Sam. 8.b.11.

t 1.Sam. 8.c.22.

27

Ende Saul ghinck oock thuys na Gibea, ende des heyrs ghinck een deel met hem, welcker herte God roerde.

28

Doch sommighe boose lieden spraken: Wat soude ons dese helpen? ^u ende verachteden hem, ende en brachten hem gheen gheschencken: doch hy dede, als hoorde hy het niet.

u Iudic. 8.a.7. 1.Sam. 11.b.12.