Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vi. Capittel.

1. De Philisteen door den raet haerder Papen ende voorsegghers, 10. schicken de Arcke den volcke Gods weder, 17. met sommighe offeren ende gauen, 13. des verblijden hen die van BethSemes, 15. offeren den Heere, 19. ende worden grouwelicken gheslaghen.

A.1

ALso was de Arcke des Heeren, ⁺ seuen maent inden lande der Philisteen.

+ De Arcke Godes is in der Philisteen lant.

2

Ende de Philisteen riepen hare Priesteren ende ^a voorsegghers, ende seyden: Wat sullen wy met der ^b† Arcke des Heeren maken? leert ons waer mede sullen wyse aen haer plaetse senden?

a Of, toekomende dingen voorsegghers.

b† An. kiste, lade

3

Sy spraken: Wilt ghy de Arcke des Gods Israels wech senden, so en sendtse niet ledich wech, maer sullet haer een schuldoffer verghelden, so sult ghy ghesont worden, ende v sal kondt worden, waerom zijn hant niet van v af en laet.

4

Sy spraken dan: Welck is dat schuldtoffer, dat wy hen gheuen sullen? Sy antwoordden: Vijf gulden ersen, ende vijf gulden muysen, na den ghetale der vijf Vorsten der Philisteen: want het is eenerley plage gheweest ouer v alle, ende ouer uwe Vorsten.

5

So moet ghy nu maken ghelijcke ghedaente uwer ersen ende uwer muysen, die uwe lant verdoruen hebben, dat ghy den God Israels de eere gheeft: misschien sal syne hant lichter worden ouer v, ende ouer uwen God, ende ouer uwe lant.

6

Waerom verstockt ghy uwe herte, ghelijck als de Egyptenaers ende Pharao haer herte verstockten: ^c isset niet also, doe hy hem aen hen bewees, lieten syse varen, dat sy wech ghinghen?

c Exod. 12.d.31.

7

^d So neemt nu ende maeckt eenen nieuwen waghen, ende twee ionghe suyghende koeyen, op welcke noyt gheen iock ghekomen is, ende spantse aen den waghen, ende latet hare kalueren van hen te huys blijuen,

d 2.Sam. 6.a.3.

8

Ende neemt de Arcke des Heeren, ende setse op den waghen: ende de gulden kleynoden, die ghy hem ten schuldoffer gheeft, legghet in een kistken by harer zijden, ende sendtse henen, ende laetse gaen.

9

Ende siet ghy toe: gaet sy henen op den wech harer lantpalen, na BethSemes, so heeft hy ons alle dat groote quaet ghedaen: is dat niet, so sult ghy weten, dat ons syne hant niet gheroert en heeft, maer het is ons sus ^e by gheualle geschiet.

e Of, toeualliger wijse ghebeurt

B.10

De lieden deden also, ende namen twee ionge suygende koeyen, ende spandense aen eenen waghen ende behielden haer kalueren te huys.

11

Ende setteden de Arcke des Heeren op den waghen, ende het kistken metten gulden muysen, ende metten beelden harer ersen.

12

Ende de koeyen ghinghen stracks weechs na BethSemes toe, op eener strate: ende ghingen ende loeyden, ende weken niet, noch ter rechter noch ter slincker hant: ende de Vorsten der Philisteen ghinghen hen na, tot aen de lantpalen BethSemes.

13

Ende de BethSemiters maeyden euen inder tarwenoogst in der leechte, ⁺ ende hieuen hare ooghen op, ende saghen de Arcke, ende verblijdden hen de selue te sien.

+ De BethSemiters ontfangen de Arcke Godes.

14

Den wagen dan quam op den acker Iosua des BethSemiters, ende stondt aldaer stille: ende aldaer was eenen grooten steen, ende sy klouen het hout van den waghen, ende offerden de koeyen den Heere ten brantoffer.

15

Doch de Leuiten hieuen de Arcke des Heeren af, ende de kiste die daer by was, daer de gulden kleynoden in waren, ende settense op den grooten steen: ende de lieden tot BethSemes offerden den Heere desseluen daechs brantoffer ende ander offer.

16

Doe nu de vijf Vorsten der Philisteen toegesien hadden, togen sy wederom na ^f† Ekron desseluen daechs.

f† And. Accaron

17

Dit zijn de gulden ersen die de Philisteen den Heere ten schuldoffer gauen: Asdod eenen, Gasa eenen, Anklon eenen, Gath eenen, ende Ekron eenen.

18

Ende gulden muysen na den ghetale aller steden der Philisteen onder den vijf Vorsten beyde der gemuerden steden ende dorpen, ende tot aen den grooten ^g† Abel, daer sy de Arcke des Heeren op lieten, tot op desen dach, op den acker Iosua des BethSemiters.

g† An. klaechsteen

19

Ende sommige te BethSemes werden gheslaghen, daerom dat sy de Arcke des Heeren gesien hadden: ende hy sloech des volcks vijftich duysent ende tseuentich mannen: doe droech dat

[fol. 93r]

volck leedt, om dat de Heere sulck een groote slachtinghe in den volcke ghedaen hadde.

C.20

Ende de lieden tot BethSemes spraken: Wie kan staen voor den Heere sulcken heyligen God? ende tot wien sal hy van ons trecken?

21

Ende sy sonden boden totten burgheren KiriathIearim, ende lieten hen segghen: De Philisteen hebben de Arcke des Heeren weder ghebracht, koemt af, ende haeltse tot v opwaerts.