Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iiij. Capittel.

1. Israel wert vanden Philisteen hardt gheslagen, 3. ghedenct met teghenwoordicheyt der Arcke Gods, denseluen te ouerwinnen, 9. ende wert noch harder gheslaghen, 11. de Arcke wert ghenomen, Hophni ende Pinehas komen om, 12. Eli, 19. ende zijn schoondochter, so sy het hooren steruen van grooten rouwe.

A.1

ENde Samuel begonst te prediken den gantschen Israel: Doch Israel tooch wt, den Philisteen teghen inden strijdt, ende legerden hen by ^a† EbenEzer: de Philisteen daerenteghen hadden hen gheleghert tot Aphek,

a† And. Holpensteen.

2

Ende rusteden hen teghen Israel: ende den strijdt deylde hem van malcanderen, ende Israel wert voor den Philisteen gheslaghen, ende sloeghen inder ordeninghe inden velde by vier duysent mannen.

3

Ende doe dat volck inden legher quam, spraken de Oudtsten Israels: Waerom heeft ons de Heere heden slaen laten vanden Philisteen? latet ons tot ons nemen de Arcke des verbondts des Heeren van Silo, ende laetse onder ons komen, dat sy ons helpe vander hant onser vyanden.

4

Ende het volck sandt henen na Silo, end liet van daer halen de Arcke des verbonts des Heeren Zebaoth, die bouen de Cherubim sit: ende daer waren de twee sonen Eli, met de Arcke des verbonts Gods, Hophni ende Pinehas.

5

Ende doe de Arcke des verbonts des Heeren in den legher quam, iuychte het gantsche Israel met een groot iuychen, dat de Aerde klanck.

6

Doe nu de Philisteen hoorden het gheschrey sulckes iuychens, spraken sy: Wat is dat voor een gheschrey sulcx grooten iuychens inder Hebreen legher? ende doe sy vernamen dat de Arcke des Heeren inden legher ghekomen was,

7

Vreesden sy hen, ende spraken: God is inden legher gekomen: ende spraken voorder: Wee ons, want het en heeft te voren also niet ghestaen.

8

Wee ons, wie wil ons verlossen vander hant deser machtigher Goden? dat zijn de Goden die Egypten sloeghen met alderley plaghen inder woestijne.

9

So hebt nu eenen goeden moet, ende weest mannen ghy Philisteen, op dat ghy niet dienen en dorst den Hebreeren, ^9b als sy ons ghedient hebben: weest mannen ende strijdet.

9b Iudic. 13.a.1.

B.10

Doe streden de Philisteen, ⁺ ende Israel wert gheslaghen, ende een yeghelick vluchte in syne hutten: ende het was eenen gantschen grooten slach, dat wt Israel vielen dertich duysent mannen voetvolcx.

+ De Philisteen nemen de Arcke Gods, ende slaen Israel.

11

Ende de Arcke Gods wert genomen, ^c ende de twee sonen Eli Hophni ende Pinehas storuen.

c 1.Sam. 2.d.34.

12

Doe liep een van BenIamin wt den heyre, ende quam tot Silo desseluen daechs, ende hadde zijn kleedt verscheurt, ende hadde Aerde op zijn hooft ghestroyt.

13

Ende siet, als hy daer in quam, sat Eli op eenen stoel, dat hy op den wech saghe, want zijn herte was schroemende ouer de Arcke Gods: ende doe de man in de stadt quam, seyde hy het van hem, ende de gantsche stadt schreydde.

14

Ende doe Eli dat luyde schreyen hoorde, vraechde hy: Wat is dat voor een luydt rumoer? doe quam de man haestelick, ende seyde het Eli aen.

15

(Eli nu, was acht ende tneghentich Iaer oudt, ^d ende syne ooghen waren doncker, dat hy niet sien en konde.)

d 1.Sam. 3.a.2.

16

De man dan sprack tot Eli, Ick kome, ende ben heden wt den heyre gheuloden. Hy sprack dan: Hoe gaet het toe, mijn sone?

17

Doe antwoordde de verkondigher, ende sprack: Israel is gheuloden voor den Philisteen, ende daer is eenen grooten slach inden volcke gheschiet, ende dyne twee sonen Hophni ende Pinehas zijn ghestoruen: daertoe de Arcke Gods is ghenomen.

18

^e Doe hy nu der Arcken Gods gedachte, viel hy te rugghe vanden stoel aen der deure, ende brack synen hals ontwee, ende sterf: want hy was oudt, ende een swaer man: hy richtede Israel veertich Iaer.

e Wanneer de menschen ende vernuft bouen leyt, so gaet Gods woort ende alle eere onder, so valt dat rechte Priesterlicke ampt te rugge, ende sterft, ende dat alles wt Gods toorne. Maer de gene die daer ghewinnen hebben daer na geen ruste inder consciencien: want waer Gods woort niet recht en gaet, daer leyt het der consciencien alle plage ende hertenleedt aen, gelijck als hier de Arcke Gods den Philisteen, So lange tot dat sy ten lesten haer schande bekennen moeten, dat sy Gods woort verkeert hebben, ende met eenen weder te recht brengen moeten, dat is hier bediet metten gouden ersen ende muysen: dwelck niet anders en is, dan de heymelicke plage der consciencien, die ten lesten openbaer wort dor Godes woort, als S. Paulus seyt, 1.Timoth. 4. Hare dwaesheyt sal allen menschen openbaer worden.

19

Sijn schoondochter oock, Pinehas wijf, was swanger, ende soude schier int kinderbedde: doe sy dat geruchte hoorde, dat de Arcke Gods ghenomen, ende haer sweer ende man doot waren, kromde sy haer, ende baerde, want haren noot quam haer aen.

C.20

Ende doe sy nu starf, spraken de vrouwen die by haer stonden: Vreest dy niet, du hebst eenen iongen sone: doch sy en antwoordde niet, ende en nam het oock niet ter herten.

21

Ende sy hiet dat kint ^f Icabod, ende sprack: De heerlicheyt is wech van Israel, dewijle dat de Arcke Gods ghenomen was, ende haer sweer ende haer man.

f Is sonder eere.

22

Ende sprack noch eenmael: De heerlicheyt is wech van Israel, want de Arcke Gods is ghenomen.