Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat iij. Capittel.

1. Samuel viermael vanden Heere gheroepen, 11. hoort wat ouer Eli ende ouer zijn huys, om der sonde wille syner kinderen komen sal, 16. ende seyt het hem altemael aen, 19. God is met Samuel, 20. so wert zijn ampt allen volcke kondt.

A.1

ENde doe Samuel den Iongen, den Heere diende onder Eli, was des Heeren woort seltsaem ende ^a dierbaer te dier seluer tijt, ende daer was weynich ^b† prophetie.

a Dat is, Daer en waren niet predikers noch parochiheeren genoecht: de Bijbel heeft doe onder de banck ghelegen, niemant heeft gestudeert, doch Samuel is gekomen, ende heeft dat woort weder voortghebracht.

b† And. gheen openbaer gesicht.

2

Ende het gheschiedde ter seluer tijt: Eli lach aen zijn plaetse, ^c ende zijn oogen begonsten doncker te worden, dat hy niet sien en konde.

c 1.Sam. 4.b.15.

3

Ende Samuel hadde hem geleyt inden Tempel des Heeren, daer de Arcke Gods was, eer dan de lampe Gods wtbluschte.

4

Ende de Heere riep Samuel: Hy antwoordde dan: Siet, hier ben ick.

5

Ende liep tot Eli, ende sprack: Siet, hier ben ick, du hebst my gheroepen: hy sprack daerenteghen: Ick en hebbe dy niet gheroepen, gaet weder henen, ende legt dy weder slapen: ende hy ginck henen, ende leyde hem slapen.

6

De Heere riep weder: Samuel. Ende Samuel stont op, ende ginck tot Eli, ende sprack: Siet, hier ben ick, du hebst my gheroepen: hy sprack daerenteghen: Ick en hebbe dy niet gheroepen, mijn sone gaet weder henen, ende legt dy slapen.

7

Doch Samuel en kende den Heere noch niet, ende des Heeren woort en was hem noch niet gheopenbaert.

[fol. 92r]

8

Ende de Heere riep Samuel weder ten derdenmale: ende hy stont op, ende ghinck tot Eli, ende sprack: Siet, hier ben ick, du hebst my gheroepen: doe merckte Eli, dat de Heere den Ionghen riep.

9

Ende sprack tot hem: Gaet weder henen, ende legt dy slapen: so dy gheroepen wort, so segt: Spreeckt Heere, want dijn knecht hooret: Samuel ghinck henen, ende leyde hem aen zijn plaetse.

B.10

Doe quam de Heere, ⁺ ende tradt daerhenen, ende riep als te voren: Samuel, Samuel: ende Samuel sprack: Spreect, want dijn knecht hooret.

+ God spreeckt met Samuel.

11

Ende de Heere sprack tot Samuel: Siet, ick doe een dinck in Israel, dat wie dat hooren sal, dien sullen syne beyde ooren klincken.

12

^d Aen dien daghe wil ick verwecken ouer Eli, alles wat ick teghen zijn huys ghesproken hebbe: ick wilt beghinnen ende volbrenghen.

d 1.Sam. 2.d.31.

13

Want ick hebt hem aengheseyt, dat ick Richter zijn wil ouer zijn huys eewichlick, om der misdaet wille, dat hy wiste dat hen syne kinderen schandtlicken hielden, ende en hadde ^e† niet eenmael daerom suer ghesien.

e† And. het hen niet met ernste gheweert.

14

Daerom hebbe ick den huyse Eli ghesworen, dat dese misdaet des huys Eli, niet en soude versoent worden, noch met offer, noch met spijsoffer eewichlick.

15

Ende Samuel lach tot aen den morgen, ende dede de deure op aenden huyse des Heeren: doch Samuel vreesde hem dat gesichte Eli te seggen.

16

Doe riep hem Eli, ende sprack: Samuel mijn sone. Hy antwoordde: ^f Siet, hier ben ick.

f Gene. 37.b.13.

17

Hy sprack: Wat is dat woort, dat tot dy gheseyt is? en verborget niet voor my: God doe my dit ende dat, so du my wat verborgest, van allen dat met dy ghesproken is.

18

Doe seydet hem Samuel altemael, ende en verberch niet voor hem: Ende hy sprack: Het is de Heere, hy doe wat hem wel gheualt.

19

Samuel nu nam toe, ende de Heere was met hem, ende daer en viel niet een van alle syne woorden op de Aerde.

C.20

Ende gantsch Israel van Dan aen tot Bersaba toe, bekende dat Samuel een getrouwe Propheet des Heeren was.

21

Ende de Heere ^g verscheen voortaen meer te Silo, want de Heere was Samuel openbaer worden te Silo door het woort des ^h Heeren.

g Id est, Deus cepit apparere copioso verbo sub Samuele, etc.

h Luth. Heeren, ende Samuel, etc. Israel. Cap. iiij. Doch Israel tooch, etc.