Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

HET BOECK Ruth.

Dat Eerste Capittel.

1. EliMelech treckt des dieren tijts haluen met synen wijue ende twee sonen inder Moabiten lant, 5. Naemi na den doot haers mans ende beyder sonen, keert weder int lant Iuda, 8. ende heet haer schoondochteren na huys gaen, 14. Arpa verlaetse, 18. Ruth koemt met haer te Bethlehem.

A.1

TE dier tijt, ⁺ doe de Richters regeerden, werdt eenen dieren tijt inden lande: ende een man van Bethlehem Iuda tooch wt, ende wandelde in der Moabiten lant, met synen wijue ende twee sonen,

+ Eenen dieren tijt by de Richters tijden.

2

Die hiet EliMelech, ⁺ ende zijn wijf Naemi, ⁺ ende syne twee sonen, Mahelon ende ChilIon, die waren Ephraiters van Bethlehem Iuda: ende doe sy quamen int lant der Moabiten, woonden sy aldaer.

+ EliMelech.

+ Naemi.

3

Ende EliMelech der Naemi man sterf, ende sy bleef ouer met haren twee sonen,

4

^a Die namen Moabitische wijuen, de eene hiet Arpa, ⁺ de ander Ruth: ⁺ ende doe sy aldaer by thien Iaren ghewoont hadden,

a Ruth 4.a.5.

+ Arpa.

+ Ruth.

5

Storuen sy alle beyde, Mahelon ende ChilIon, dat dat wijf ouerbleef, den beyden sonen, ende haren man.

6

Doe maeckte sy haer op met haren twee soons wijuen, ende tooch weder wt der Moabiten lant: want sy hadde vernomen inder Moabiten lant, dat de Heere zijn volck hadde besocht, ende hen broot ghegheuen.

7

Ende ghinck wt van de plaetse daer sy gheweest was, ende hare beyde soons wijuen met haer: ende doe sy ghinck op den weghe, dat sy weder quame int lant Iuda,

8

Sprack sy tot haren beyden soons wijuen: Gaet henen, ende keert wederom, een yeghelick tot haers moeders huys: de Heere doe aen v barmherticheyt, ghelijck als ghy aen den dooden ende aen my ghedaen hebt,

9

De Heere gheue v, dat ghy ruste vindet, een yeghelick in haers mans huys: ende kustese: doe hieuen sy hare stemme op, ende weenden,

B.10

Ende spraken tot haer: Wy willen met dy, tot dynen volcke gaen.

11

Doch Naemi sprack: Keert wederom mijn dochteren: waeromme wilt ghy met my gaen? ^b† hoe kan ick nu voortaen kinderen in mynen lijue hebben, die uwe mannen zijn mochten?

b† An. Hebbe ick noch sonen in mijn lichaem, die etc. Deuter. 25.a.5.

12

Keert wederom myne dochteren, ende gaet henen: want ick ben nu te oudt, dat ick eenen man neme: ende wanneer ick spreke: Het is te hopen dat ick in deser nacht eenen man neme, ende kinderen ghebare,

[fol. 90r]

13

Hoe kondet ghy doch beyden, tot dat sy groot worden? Hoe? wilt ghy vertoeuen, dat ghy geen mannen en soudt nemen? niet myne dochteren, want my iammert uwer seer: want des Heeren hant is ouer my wtghegaen.

14

Doe hieuen sy haer stemmen op, ⁺ ende weenden noch meer: ende Arpa kustede haer sweerinne: Ruth daerenteghen bleef by haer.

+ Arpa verlaet Naemi.

15

Sy sprack dan: Siet, dijn swagerinne is omgekeert tot haren volcke, ende tot haren Gode: Keert du oock wederom dyner swagherinne na.

16

Ruth antwoordde: ^c Spreeckt my dat niet in, dat ick dy verlaten soude, ⁺ ende van dy omkeeren: waer du henen gaest, daer wil ick oock henen gaen: waer du blijfst, daer blijue ick oock: dijn volc is mijn volck, ^d ende dijn God is mijn God.

c 2.Sam. 15.c.21.

+ Ruth wil van Naemi niet wijcken.

d Iudith. 11.c.21.

17

Waer du steruest, daer sterue ick oock, daer wil ick oock begrauen worden: de Heere doe my dit ende dat, de doot moet my ende dy scheyden.

18

Als sy nu sach dat sy haer vast in haren sin voorgeset hadde met haer te gaen, liet sy af met haer daeruan te spreken.

19

Also ghinghen die beyde met malcanderen, tot dat sy te Bethlehem quamen: ende doe sy te Bethlehem inquamen, beweechde haer de gantsche stadt ouer hen, ende spraken: Is dat de Naemi?

C.20

Sy sprack daerentegen tot hen: Heet my niet ^e Naemi, maer Mara, ⁺ want de Almachtighe heeft my seer bedroeft.

e Naemi, heet mijn lust.

+ Mara, heet bitter oft bedroeft.

21

Vol tooch ick wt, doch ledich heeft my de Heere weder thuys gebracht: waerom heet ghy my dan Naemi? so my doch de Heere verootmoedicht, ende de Almachtighe bedroeft heeft.

22

Ende het was om de tijt, dat den gerstenoogst aenghinck, doe Naemi ende haer soons wijf Ruth de Moabitische weder quamen, vanden lande der Moabiten tot Bethlehem.